200 കി.മീ വരെ നീളം, കഴുകുന്നത് അഞ്ച് ഘട്ടങ്ങളിലായി, ഗ്രാൻഡ് മോസ്കിൽ വിരിച്ചിരിക്കുന്നത് 33,000 ആഡംബര പരവതാനികൾ

റമദാനിലും സാധാരണ വെള്ളിയാഴ്ചകളിലുമാണ് മുന്തിയ ഇനം കാർപറ്റുകൾ ​ഗ്രാൻഡ് മോസ്കിൽ ഉപയോ​ഗിക്കുന്നത്

മക്ക: റമദാനിൽ മക്കയിലെ ​ഗ്രാൻഡ് മോസ്കിലെത്തുന്ന വിശ്വാസികളെ വരവേൽക്കുന്നതിനായി വിരിച്ചിട്ടുള്ളത് 33,000 ആഡംബര പരവതാനികൾ. ​ഗ്രാൻഡ് മോസ്കിന്റെയും പ്രവാചക പള്ളിയുടെയും സംരക്ഷണ ചുമതലയുള്ള ജനറൽ അതോറിറ്റിയാണ് ഇക്കാര്യം അറിയിച്ചത്. സൗദി അറേബ്യയിൽ തന്നെ നിർമിച്ചതും ഉന്നത നിലവാരത്തിലുള്ളതുമാണ് ഈ പരവതാനികൾ. 1.2 മീറ്റർ മുതൽ 4 മീറ്റർ വരെയും 1.2 മീറ്റർ മുതൽ 3 മീറ്റർ വരെയും വലിപ്പമുണ്ടാകും. 1.6 സെന്റീമീറ്റർ കനത്തിലുള്ള ഇവയ്ക്ക് 200 കി.മീ വരെയായിരിക്കും ആകെ നീളം. കേടുപാടുകൾ കൂടാതെ ദീർഘകാലം നീണ്ടുനിൽക്കുന്നതാണ് ഇത്തരം പരവതാനികൾ. 

റമദാനിലും സാധാരണ വെള്ളിയാഴ്ചകളിലുമാണ് മുന്തിയ ഇനം കാർപറ്റുകൾ ​ഗ്രാൻഡ് മോസ്കിൽ ഉപയോ​ഗിക്കുന്നത്. ഈ സമയങ്ങളിൽ നിരവധി വിശ്വാസികളാണ് പള്ളിയിലേക്കെത്തുന്നത്. ഉയർന്ന നിലവാരമുള്ളതും അതി മനോഹരമായ കരകൗശല വൈദ​ഗ്ധ്യത്തിൽ നിർമിക്കപ്പെട്ടതുമാണ് ഈ കാർപ്പറ്റുകളെന്ന് ഇരു ഹറമുകളുടെയും ജനറൽ അതോറിറ്റി പറഞ്ഞു. ​ഗ്രാൻഡ് മോസ്കിലെത്തുന്ന വിശ്വാസികൾക്കും തീർത്ഥാടകർക്കും മികച്ച സേവനങ്ങൾ നൽകുകയാണ് ഇതിലൂടെ ലക്ഷ്യം വെക്കുന്നതെന്നും അധികൃതർ പറഞ്ഞു. പരവതാനികൾ വൃത്തിയാക്കാനും അണുവിമുക്തമാക്കാനും സു​ഗന്ധം പൂശാനുമായി പ്രത്യേകം ജീവനക്കാരെയും നിയോ​ഗിച്ചിട്ടുണ്ട്.  

അഞ്ച് ഘട്ടങ്ങളിലായാണ് ശുചിയാക്കൽ പ്രക്രിയ നടക്കുന്നത്. ഇതിനായി നൂതന ഉപകരണങ്ങൾ ഉപയോ​ഗിക്കുന്നുണ്ടെന്നും അധികൃതർ അറിയിച്ചു. ആഴ്ചയിൽ 1200 കാർപറ്റുകൾ വീതമാണ് ​ഗ്രാൻഡ് മോസ്കിൽ നിന്ന് ശുചിയാക്കാനായി വാഷിങ് പ്ലാന്റിൽ എത്തിക്കുന്നത്. ആദ്യ ഘട്ടത്തിൽ ഈ കാർപറ്റുകൾ ഒരു ഓട്ടോമാറ്റിക് ഉപകരണത്തിലേക്ക് കയറ്റിയ ശേഷം അതിലെ പൊടിയും അഴുക്കുമെല്ലാം നീക്കം ചെയ്യുകയാണ് ചെയ്യുന്നത്. രണ്ടാം ഘട്ടത്തിലാണ് കാർപ്പറ്റ് കഴുകുന്നതും അണു നശീകരണം നടത്തുന്നതും. ഇതിനായി വലിയ വാഷിങ് മെഷീനാണ് ഉപയോ​ഗിക്കുന്നത്. ഉയർന്ന നിലവാരത്തിലുള്ളതും പ്രത്യേകവുമായ അണുനാശിനികളും ഡിറ്റർജന്റുകളുമാണ് കഴുകാൻ ഉപയോ​ഗിക്കുന്നത്. അതിനുശേഷം മൂന്നാം ഘട്ടത്തിലാണ് കാർപറ്റുകൾ ഉണക്കുന്നത്. ഇതിനായി പ്രത്യേകം മെഷീനുകൾ ഉപയോ​ഗിച്ച് രണ്ടര മിനിറ്റുകൾ കൊണ്ടാണ് കാർപറ്റ് ഉണക്കിയെടുക്കുന്നത്. നാലാം ഘട്ടത്തിൽ ഇത് വീണ്ടും സൂര്യപ്രകാശത്തിൽ ഉണക്കിയെടുക്കുകയാണ് ചെയ്യുന്നത്. അഞ്ചാം ഘട്ടത്തിൽ പ്രകൃതിദത്തമായ റോസ് വാട്ടർ ഉപയോ​ഗിച്ച് സു​ഗന്ധപൂരിതമാക്കും. ഇത് തിരികെ ​ഗ്രാൻഡ് മോസ്കിൽ എത്തിക്കും വരെയും ശുചീകരണം നടക്കുന്ന വെയർഹൗസുകളിൽ സൂക്ഷിക്കുകയാണ് പതിവ്.