കുവൈത്തി വനിതകൾക്ക് അംഗീകാരം, 2024- 2025ലെ 'ലോറിയൽ-യുനെസ്കോ ഫോർ വിമൻ ഇൻ സയൻസ്' അവാർഡ് നേടി രണ്ട് ഗവേഷകർ

ലോറിയൽ-യുനെസ്കോ ഫോർ വിമൻ ഇൻ സയൻസ് മിഡിൽ ഈസ്റ്റ് അവാർഡ് ഗവേഷകർക്ക്. രസതന്ത്രം, ജനിതകശാസ്ത്രം എന്നീ മേഖലകളിലെ ശ്രദ്ധേയമായ സംഭാവനകൾക്കാണ് ഈ അംഗീകാരം.

കുവൈത്ത് സിറ്റി: ശാസ്ത്രരംഗത്തെ മികച്ച സംഭാവനകൾക്ക് രണ്ട് കുവൈത്തി ഗവേഷകർക്ക് 2024, 2025 വർഷങ്ങളിലെ ലോറിയൽ-യുനെസ്കോ ഫോർ വിമൻ ഇൻ സയൻസ് മിഡിൽ ഈസ്റ്റ് അവാർഡ് ലഭിച്ചതായി കുവൈത്തി ഫൗണ്ടേഷൻ ഫോർ ദി അഡ്വാൻസ്‌മെന്‍റ് ഓഫ് സയൻസസ് വെള്ളിയാഴ്ച പ്രഖ്യാപിച്ചു. രസതന്ത്രം, ജനിതകശാസ്ത്രം എന്നീ മേഖലകളിലെ ശ്രദ്ധേയമായ സംഭാവനകൾക്കാണ് ഈ അംഗീകാരം. കുവൈത്ത് യൂണിവേഴ്‌സിറ്റിയിലെ രസതന്ത്ര പ്രൊഫസറായ ഡോ. ഇൻതിസാർ അൽ-ഹത്‌ലാനിക്ക്, ഡീപ് അൾട്രാവയലറ്റ് രാമൻ സ്പെക്ട്രോസ്കോപ്പിയിലും ഫോറൻസിക്, മെറ്റീരിയൽസ് കണ്ടെത്തലുകളിലെ അതിന്‍റെ പ്രയോഗങ്ങളിലും നടത്തിയ ഗവേഷണത്തിനാണ് 2024-ലെ അവാർഡ് ലഭിച്ചത്.

ദാസ്മാൻ ഡയബറ്റിസ് ഇൻസ്റ്റിറ്റ്യൂട്ടിലെ ഗവേഷകയായ ഡോ. ഫാത്തിമ ബഹ്മാന്, ഭക്ഷണക്രമവും വീക്കവും തമ്മിലുള്ള ജനിതക ബന്ധങ്ങളെക്കുറിച്ചും അവ മെറ്റബോളിക് രോഗങ്ങളുമായി എങ്ങനെ ബന്ധപ്പെട്ടിരിക്കുന്നു എന്നതിനെക്കുറിച്ചുമുള്ള ഗവേഷണത്തിനാണ് 2025-ലെ അവാർഡ് ലഭിച്ചത്. സയൻസ്, ടെക്നോളജി, എഞ്ചിനീയറിംഗ്, മാത്തമാറ്റിക്സ് എന്നീ മേഖലകളിൽ സ്ത്രീകളുടെ പങ്കാളിത്തം പ്രോത്സാഹിപ്പിക്കുക, പിന്തുണയ്ക്കുക എന്ന ലക്ഷ്യത്തോടെ ദുബൈയിൽ നടന്ന ചടങ്ങിലാണ് മിഡിൽ ഈസ്റ്റ് മേഖലയിലെ തിരഞ്ഞെടുക്കപ്പെട്ട വനിതാ ശാസ്ത്രജ്ഞരെ ആദരിച്ചതെന്ന് കെഎഫ്എഎസ് അറിയിച്ചു.