അഞ്ച് മിനിറ്റിനുള്ളിൽ വിസ ലഭിക്കും, സുപ്രധാന മാറ്റം പ്രഖ്യാപിച്ചു, നടപടിക്രമങ്ങൾ ലളിതമാക്കി കുവൈത്ത്

കുവൈത്തിൽ വിസകളും റെസിഡൻസി പെർമിറ്റുകളും ഇനി എളുപ്പത്തിൽ ലഭിക്കും. 'കുവൈത്ത് ഇ-വിസ' സംവിധാനം വഴി ഒരു വിസ അഞ്ച് മിനിറ്റിനുള്ളിൽ ഇഷ്യൂ ചെയ്യാൻ സാധിക്കും. 

കുവൈത്ത് സിറ്റി: കുവൈത്തിൽ സന്ദർശക നടപടിക്രമങ്ങൾ ലളിതമാക്കുന്നതിലെ സുപ്രധാന മാറ്റങ്ങൾ പ്രഖ്യാപിച്ച് ആഭ്യന്തര മന്ത്രി ശൈഖ് ഫഹദ് അൽ-യൂസഫ്. വിസകളും റെസിഡൻസി പെർമിറ്റുകളും ഇനി എളുപ്പത്തിൽ ലഭിക്കും. 'കുവൈത്ത് ഇ-വിസ' സംവിധാനം വഴി ഒരു വിസ അഞ്ച് മിനിറ്റിനുള്ളിൽ ഇഷ്യൂ ചെയ്യാൻ സാധിക്കും. പുതിയ നിയമങ്ങൾ നടപ്പിലാക്കുന്നതിലൂടെ എല്ലാ മേഖലകളിലും ദ്രുതഗതിയിലുള്ള വികസനത്തിന് നമ്മൾ സാക്ഷ്യം വഹിക്കുന്നതിനാൽ രാജ്യത്തിന്‍റെ ഇന്നത്തെ യാഥാർത്ഥ്യം മുൻപത്തേതിൽ നിന്ന് വളരെയധികം വ്യത്യസ്തമാണെന്നും ശൈഖ് ഫഹദ് അൽ-യൂസഫ് പറഞ്ഞു.

ഗ്രീൻ അർബൻ ഡെവലപ്‌മെന്‍റ് ഇനിഷ്യേറ്റീവ്‌സ് ഫോറമിന്‍റെ ഇടവേളയിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. കുവൈത്തിന്‍റെ പ്രത്യേക കാലാവസ്ഥയെ ഉയർത്തിക്കാട്ടിക്കൊണ്ട്, ഒക്ടോബർ 15-നും ഏപ്രിൽ 15-നും ഇടയിലുള്ള കാലയളവിൽ രാജ്യം ഒരു മികച്ച വിനോദസഞ്ചാര കേന്ദ്രമായെന്നും ഇത് പല അയൽരാജ്യങ്ങളിൽ നിന്നും കുവൈത്തിനെ വേറിട്ടു നിർത്തുന്ന സവിശേഷതയാണെന്നും പ്രഥമ ഉപപ്രധാനമന്ത്രി കൂടിയായ അദ്ദേഹം അഭിപ്രായപ്പെട്ടു.