ഉറ്റ സുഹൃത്തിന്‍റെ ചതി, യുവാവിനെ കത്തിമുനയിൽ നിർത്തി ഭീഷണിപ്പെടുത്തി കവർച്ച

യുവാവിനെ കത്തിമുനയിൽ നിർത്തി ഭീഷണിപ്പെടുത്തി കവർച്ച. പ്രതി കത്തി വീശി തന്നെ കൊല്ലുമെന്ന് ഭീഷണിപ്പെടുത്തിയതായും ജീവൻ രക്ഷിക്കാൻ കൈവശമുണ്ടായിരുന്ന 36 ദിനാർ നൽകാൻ നിർബന്ധിതനായെന്നും പരാതിക്കാരൻ പറഞ്ഞു.

കുവൈത്ത് സിറ്റി: കുവൈത്തിലെ അബ്ദലി അതിർത്തിക്ക് സമീപമുള്ള ഒരു ക്യാമ്പിൽ വെച്ച് 36 വയസ്സുകാരനായ കുവൈത്ത് പൗരനെ കത്തികാട്ടി ഭീഷണിപ്പെടുത്തി പണം കവർന്നതായി പരാതി. സ്വന്തം സുഹൃത്ത് തന്നെയാണ് തന്നെ വധിക്കുമെന്ന് ഭീഷണിപ്പെടുത്തി പണം തട്ടിയെടുത്തതെന്ന് ഇരയായ യുവാവ് പൊലീസിൽ മൊഴി നൽകി. അൽ-ഖ്‌ഷാനിയ പൊലീസ് സ്റ്റേഷനിലാണ് പരാതി രജിസ്റ്റർ ചെയ്തിരിക്കുന്നത്. പ്രതി കത്തി വീശി തന്നെ കൊല്ലുമെന്ന് ഭീഷണിപ്പെടുത്തിയതായും ജീവൻ രക്ഷിക്കാൻ കൈവശമുണ്ടായിരുന്ന 36 ദിനാർ നൽകാൻ നിർബന്ധിതനായെന്നും പരാതിക്കാരൻ പറഞ്ഞു.

സംഭവത്തെത്തുടർന്ന് ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെന്റ് അന്വേഷണം ആരംഭിച്ചു. ഇതൊരു ഗുരുതരമായ കുറ്റകൃത്യമായി രജിസ്റ്റർ ചെയ്തിട്ടുണ്ട്. പ്രതിയെ ഉടൻ തന്നെ ചോദ്യം ചെയ്യലിനായി വിളിപ്പിക്കുമെന്നും ക്യാമ്പിലുണ്ടായിരുന്ന ദൃക്‌സാക്ഷികളുടെ മൊഴി രേഖപ്പെടുത്തുമെന്നും സുരക്ഷാ ഉദ്യോഗസ്ഥർ അറിയിച്ചു. സൗഹൃദങ്ങൾക്കിടയിൽ ഇത്തരം ക്രിമിനൽ സ്വഭാവമുള്ള സംഭവങ്ങൾ റിപ്പോർട്ട് ചെയ്യപ്പെട്ടത് പ്രദേശവാസികൾക്കിടയിൽ ആശങ്കയുണ്ടാക്കിയിട്ടുണ്ട്.