20 രാജ്യങ്ങളിൽ നിന്നുള്ള എഴുപത് വ്യത്യസ്ത ഇടപാടുകാരുടെ 319 ഉപഗ്രങ്ങളാണ് 1994നും 2019നും ഇടയിൽ പിഎസ്എൽവി വിജയകരമായി വാണിജ്യാടിസ്ഥാനത്തിൽ ഭ്രമണപഥത്തിലെത്തിച്ചത്.
ശ്രീഹരിക്കോട്ട: അമ്പതാം വിക്ഷേപണത്തിലും പതിവ് തെറ്റിച്ചില്ല, കണക്ക് കൂട്ടലുകൾ അണുവിട മാറാതെ അത്യാധുനിക റഡാർ ഇമേജിംഗ് ഉപഗ്രഹമായ റിസാറ്റ് 2ബിആർ1നെയും വാണിജ്യാടിസ്ഥാനത്തിൽ വിക്ഷേപിക്കപ്പെട്ട 9 വിദേശ ഉപഗ്രങ്ങളെയും പിഎസ്എൽവി ഭ്രമണപഥത്തിലെത്തിച്ചു. ജപ്പാനിൽ നിന്നുള്ള റഡാർ ഇമേജിംഗ് ഉപഗ്രഹമായ ക്യുപിഎസ് എസ്എആർ, ഇറ്റലിയിൽ നിന്നുള്ള ടൈവാക്ക് 0092, അമേരിക്കയിൽ നിന്നുള്ള ടൈവാക് 0129, ഹോപ്സാറ്റ്, നാല് ലിമുർ ഉപഗ്രഹങ്ങൾ, ഇസ്രയേലിലെ സ്കൂൾ വിദ്യാർത്ഥികൾ നിർമ്മിച്ച ഡുചിഫാറ്റ് 3, എന്നിവയാണ് ഇന്ന് പിഎസ്എൽവി സി 48 ദൗത്യ വിജയകരമായി വാണിജ്യാടിസ്ഥാനത്തിൽ വിക്ഷേപിച്ച ഉപഗ്രങ്ങൾ.
ഇന്നത്തെ വിക്ഷേപണത്തോട് കൂടി പിഎസ്എൽവി വാണിജ്യാടിസ്ഥാനത്തിൽ വിജയകരമായി ബഹിരാകാശത്തെത്തിച്ച വിദേശ ഉപഗ്രങ്ങളുടെ എണ്ണം 319 ആയി ഉയർന്നു. 20 രാജ്യങ്ങളിൽ നിന്നുള്ള എഴുപത് വ്യത്യസ്ത ഇടപാടുകാരുടെ ഉപഗ്രങ്ങളാണ് 1994നും 2019നും ഇടയിൽ പിഎസ്എൽവി വിജയകരമായി ഭ്രമണപഥത്തിലെത്തിച്ചത്.
ചരിത്ര വിജയത്തിന്‍റെ വേളയിൽ പിഎസ്എൽവിക്ക് പിന്നിൽ പ്രവർത്തിച്ച ശാസ്ത്രജ്ഞരെ ഇസ്രൊ ചെയർമാൻ ഡോ കെ ശിവൻ ഓർമ്മിച്ചു. പിഎസ്എൽവി വിഭാവനം ചെയ്ത ഡോ ശ്രീനിവാസൻ, പ്രവർത്തനക്ഷമമാക്കിയ ഡോ ജി മാധവൻ നായർ, പിന്നീട് പദ്ധതിയെ മുന്നോട്ട് നയിച്ച ആർ വി പെരുമാൾ, എസ് രാമകൃഷ്ണൻ, നാരായണ മൂർത്തി, ജോർജ്ജ് കോശി, ഡോ കുഞ്ഞികൃഷ്ണൻ, ജയകുമാർ, ഹട്ടൻ എന്നിവരെ ഇസ്രൊ മേധാവി പേരെടുത്ത് പറഞ്ഞ് സ്മരിച്ചു. നിലവിലെ പ്രൊജക്ടർ ഡയറക്ടർ എസ് ആർ ബിജുവിനെയും അഭിനന്ദിച്ച ഇസ്രൊ ചെയർമാൻ ഇനിയും ഏറെ ദൗത്യങ്ങൾ ഇസ്രൊയ്ക്ക് മുന്നിലുണ്ടെന്നും ഓർമ്മിപ്പിച്ചു.
ഇത് വരെയുള്ള പിഎസ്എൽവിയുടെ ചരിത്രവും, അതിന് പിന്നിൽ പ്രവർത്തിച്ച ശാസ്ത്രജ്ഞരുടെ വിവരങ്ങളും അടങ്ങിയ പ്രത്യേക പുസ്തകവും ഇസ്രൊ ചെയർമാൻ പ്രകാശനം ചെയ്തു. പിഎസ്എൽവിയുടെ അടുത്ത 50 വിക്ഷേപണങ്ങൾ അടുത്ത അഞ്ച് വർഷത്തിനുള്ളിൽ പൂർത്തിയാക്കുകയാണ് ഇനിയുള്ള ലക്ഷ്യമെന്ന് വിഎസ്എസ്എസി ഡയറക്ടർ ഡോ എസ് സോമനാഥ് വിജയവേളയിൽ പ്രഖ്യാപിച്ചു.
ഇസ്രൊയുടെ പടക്കുതിര
ഇരുപത്തിയാറ് വ‌‌‌‌ർഷങ്ങൾ കൊണ്ട് നേടിയെടുത്തതാണ് ഈ വിശേഷണം. 50 ദൗത്യങ്ങൾ അതിൽ 46 എണ്ണവും നൂറ് ശതമാനം വിജയം. പരാജയം രുചിച്ചത് രണ്ട് വട്ടം മാത്രം. 1997ലെ പിഎസ്എൽവി സി 1ദൗത്യത്തെ ഭാഗിക പരാജയമായാണ് കണക്കാക്കുന്നത്. ഐആർഎസ് 1ഡി ഉപഗ്രഹവുമായി കുതിച്ച പിഎസ്എൽവിയുടെ നാലാം ദൗത്യം ഇന്ധന ചോ‍ർച്ചയെ തുടർന്ന് പ്രതീക്ഷിച്ചതിലും താഴ്ന്ന ഭ്രമണപഥത്തിലാണ് ഉപഗ്രഹത്തെ സ്ഥാപിച്ചത്. എന്നാൽ ഉപഗ്രഹം ദൗത്യ കാലാവധി പൂർത്തിയാക്കിയതിനാൽ ദൗത്യം പരാജയമായല്ല വിലയിരുത്തപ്പെടുന്നത്.
1994നും 2019നും ഇടയിൽ 55ലധികം ഇന്ത്യൻ ഉപഗ്രഹങ്ങളും, 20 രാജ്യങ്ങളിൽ നിന്നുള്ള എഴുപത് വ്യത്യസ്ത ഇടപാടുകാരുടെ 310 ഉപഗ്രഹങ്ങളും പിഎസ്എൽവി വിജയകരമായി ഭ്രമണപഥത്തിലെത്തിച്ചു. ഒരു പിഎസ്എൽവി വിക്ഷേപണത്തിന് ചെലവാകുന്ന ശരാശരി തുക 200 കോടി രൂപയാണ്. ജയപരാജയങ്ങളുടെയും വിക്ഷേപിച്ച ഉപഗ്രങ്ങളുടെയും ചെലവിന്റെയുമെല്ലാം കണക്കെടുപ്പിൽ ലോകത്തെ ഏത് വിക്ഷേപണ വാഹനത്തെയും മല‌ർത്തിയടിക്കാൻ പോന്ന എതിരാളിയാണ് ഐഎസ്ആ‌‌‌ർഒയുടെ സ്വന്തം പിഎസ്എൽവി എന്ന് ചുരുക്കം.
തുടക്കം പരാജയത്തിൽ നിന്ന്
വിക്ഷേപണ പരാജയങ്ങളുടെ ആവ‌ർത്തനം മൂലം സീ ലവിങ്ങ് വെഹിക്കിളെന്ന് പഴികേട്ട എസ്എൽവിക്കും, ആൾവെയ്സ് സീ ലവിങ്ങ് വെഹിക്കിളെന്ന പരിഹാസം കേട്ട എഎസ്എൽവിക്കും ശേഷം പിഎസ്എൽവിയുടെ പ്രഖ്യാപനമുണ്ടായപ്പോൾ പലരും അന്ന് തന്നെ പരാജയമെന്ന് വിധിച്ചിരുന്നു. 1993 സെപ്റ്റംബ‌‌ർ 23ന് നടന്ന ആദ്യ പരീക്ഷണ വിക്ഷേപണം പരാജയമായപ്പോൾ ഇന്ത്യയുടെ മൂന്നാം തലമുറ വിക്ഷേപണ വാഹനത്തിന്‍റെ കഥയും മറ്റൊന്നാകില്ലെന്ന് പലരും കരുതി. എന്നാൽ മുൻഗാമികളുടെ പേരു ദോഷം പിഎസ്എൽവി മായ്ച്ചു കളഞ്ഞു.
എസ്എൽവിയെക്കുറിച്ചുള്ള അടിസ്ഥാന വിവരങ്ങൾ
എഎസ്എൽവിയെക്കുറിച്ചുള്ള അടിസ്ഥാന വിവരങ്ങൾ
പിഎസ്എൽവിയുടെ ചുമലിലേറി തന്നെയാണ് 2008 ഒക്ടോബ‌ർ 28ന് ചന്ദ്രയാനും, 2013 നവംബറിൽ 5ന് മംഗൾയാനും ചരിത്രം കുറിച്ചത്. 2017 ഫെബ്രവരിയിൽ പിഎസ്എൽവി സി 37 ദൗത്യത്തിലൂടെ 104 ഉപഗ്രങ്ങൾ ബഹിരാകാശത്തെത്തിച്ച് ഒരു റോക്കറ്റിൽ എറ്റവും കൂടുതൽ ഉപഗ്രങ്ങൾ വിജയകരമായി വിക്ഷേപിച്ചതിന്റെ റിക്കോ‍‌ർഡും ഇസ്രൊ സ്വന്തമാക്കി. ഇതിനിടയിൽ ഒരു വട്ടം കൂടി പരാജയം തേടിയെത്തി.
പിഎസ്എൽവി ഒറ്റനോട്ടത്തിൽ
2017 ആഗസ്റ്റ് 31ന് ഐആ‌‌ർഎൻഎസ്എസ് ശ്രേണിയിലെ ഉപഗ്രഹവുമായി കുതിച്ച പിഎസ്എൽവി സി 39 പരാജയപ്പെട്ടു. 39 തുട‌ർ വിക്ഷേപണ വിജയങ്ങളുടെ കുതിപ്പിന് ഒരു താൽക്കാലിക വിരാമം മാത്രമായിരുന്നു അത്. തൊട്ടടുത്ത ജനുവരിയിൽ കാ‌ർട്ടോസാറ്റ് രണ്ട് വിജയകരമായി വിക്ഷേപിച്ച് പിഎസ്എൽവി വിജയക്കുതിപ്പ് പുനരാരംഭിച്ചു. അതിന് ശേഷമൊരു പരാജയം ഇതുവരെയില്ല.