60-ാം ജന്മദിനാഘോഷം ഒന്നും ഓര്മ്മയില്ല, കാരണം മദ്യപിച്ച് 'ബ്ലാക്ക് ഔട്ടായി': തുറന്നു പറഞ്ഞ് ആമിര് ഖാന്
Synopsis
60-ാം ജന്മദിനാഘോഷത്തിനിടെ അമിതമായി മദ്യപിച്ചതിനാൽ ആ ദിവസത്തെ സംഭവങ്ങൾ മറന്നുപോയെന്ന് ആമിർ ഖാൻ വെളിപ്പെടുത്തി.
മുംബൈ: ബോളിവുഡ് സൂപ്പർതാരം ആമിർ ഖാൻ തന്റെ 60-ാം ജന്മദിനാഘോഷത്തിനിടെ അമിതമായി മദ്യപിച്ചതിനാൽ ആ ദിവസത്തെ സംഭവങ്ങൾ എല്ലാം മറന്ന് പോയെന്ന് വെളിപ്പെടുത്തി. മാർച്ച് 14-ന് നടന്ന ജന്മദിനാഘോഷം മകൾ ഇറയും മുൻ ഭാര്യ റീന ദത്തയും ചേർന്നാണ് സംഘടിപ്പിച്ചത്. എന്നാൽ, ആഘോഷത്തിനിടെ സുഹൃത്തുക്കളുടെ നിർബന്ധത്തെ തുടർന്ന് മദ്യപാനം അതിരുകവിഞ്ഞതായി താരം പറഞ്ഞു.
"ഞാൻ സാധാരണ മദ്യം വളരെ കുറച്ചാണ് കഴിക്കാറ്. എന്നാൽ, ആ ദിവസം സുഹൃത്തുക്കൾ നിർബന്ധിച്ചപ്പോൾ ഞാൻ അൽപ്പം കൂടുതൽ കഴിച്ചു. എനിക്ക് അതിവേഗം തന്നെ മത്ത് പിടിച്ചു. അടുത്ത ദിവസം രാവിലെ എഴുന്നേറ്റപ്പോൾ എനിക്ക് ഒന്നും ഓർമ്മയില്ല. ഏഴു മണിക്കാണ് ഞങ്ങള് തുടങ്ങിയത് ഒന്പത് മണി ആയപ്പോള് തന്നെ ഞാന് പറക്കുന്ന അവസ്ഥയില് ആയിരുന്നു" ആമിർ ഒരു അഭിമുഖത്തിൽ പറഞ്ഞു.
ആമിർ ഖാൻ, മദ്യപാനം ഗണ്യമായി കുറച്ചിരുന്നതായും എന്നാൽ ജന്മദിനത്തിന്റെ ആഹ്ലാദത്തിൽ അത് മറികടന്നുപോയതായും വ്യക്തമാക്കി. "ഞാൻ ഒരു എക്സ്ട്രീം അവസ്ഥയിലാണ്. അതുകൊണ്ട് ആ ദിവസം എന്താണ് സംഭവിച്ചതെന്ന് എനിക്ക് ഒരു ഓർമ്മയും ഇല്ല," അദ്ദേഹം കൂട്ടിച്ചേർത്തു.
ഈ വെളിപ്പെടുത്തൽ ആരാധകർക്കിടയിൽ ചർച്ചയായി മാറിയിരിക്കുകയാണ്. സോഷ്യൽ മീഡിയയിൽ, ആമിറിന്റെ തുറന്നുപറച്ചിൽ ചിലർ രസകരമായി കാണുമ്പോൾ, മറ്റുചിലർ താരത്തിന്റെ ആത്മാർത്ഥതയെ അഭിനന്ദിച്ചു. ആമിറിന്റെ ഈ വെളിപ്പെടുത്തൽ, താരത്തിന്റെ മനുഷ്യത്വവും ലാഘവവും വെളിവാക്കുന്നതായി ആരാധകർ കരുതുന്നു. "എല്ലാവർക്കും ഇത്തരം നിമിഷങ്ങൾ ഉണ്ടാകും, അത് തുറന്നുപറയാൻ ആമിറിന്റെ ധൈര്യം അഭിനന്ദനീയമാണ്" എന്നാണ് ഒരു ആരാധകന് എക്സില് കുറിച്ചത്.
നിലവിൽ, ആമിർ ഖാൻ തന്റെ പുതിയ ചിത്രമായ 'സിതാരേ സമീൻ പർ' എന്ന സിനിമയുടെ പ്രൊമോഷനിലാണ്. ഈ സിനിമയിലൂടെ, 'താരേ സമീൻ പർ' എന്ന ചിത്രത്തിന്റെ ആത്മീയ തുടര്ച്ച എന്നാണ് താരം വിശേഷിപ്പിക്കുന്നത്. പ്രസന്ന സംവിധാനം ചെയ്യുന്ന ചിത്രം ജൂണ് 20ന് തീയറ്ററുകളില് എത്തും. സ്പാനിഷ് ചിത്രമായ ചാമ്പ്യൻസിന്റെ പുനരാവിഷ്കരണമാണ് ഈ ചിത്രം.