അതാണോ 'ലൂസിഫറി'ലെ നായകന്റെ ഇന്ട്രൊ?; മോഹന്ലാലും മുരളി ഗോപിയും പ്രതികരിക്കുന്നു
Synopsis
ഇന്ദ്രജിത്ത്, ടൊവീനോ തോമസ്, സംവിധായകന് ഫാസില്, മംമ്ത മോഹന്ദാസ്, ജോണ് വിജയ് എന്നിങ്ങനെ വലിയ താരനിരയുണ്ട് ചിത്രത്തില് സുജിത്ത് വാസുദേവ് ആണ് ഛായാഗ്രഹണം. സംഗീതം ദീപക് ദേവ്.
മലയാളസിനിമാ പ്രേക്ഷകരില് ഇപ്പോള് കാത്തിരിപ്പില് ഏറ്റവും മുന്നിലുള്ള ചിത്രം ലൂസിഫര് ആവും. പൃഥ്വിരാജ് കരിയറില് ആദ്യമായി സംവിധാനം ചെയ്യുന്ന ചിത്രത്തില് മോഹന്ലാല് നായകനാവുന്നു എന്നതുതന്നെ കാരണം. ഈ മാസം 28ന് തീയേറ്ററുകളിലെത്തുന്ന ചിത്രത്തില് സ്റ്റീഫന് നെടുമ്പള്ളി എന്ന രാഷ്ട്രീയ പ്രവര്ത്തകനായാണ് മോഹന്ലാല് എത്തുന്നത്. ഈ കഥാപാത്രത്തിന്റെ ഇന്ട്രൊഡക്ഷന് രംഗത്തെക്കുറിച്ചുള്ള ഒരു ഫേസ്ബുക്ക് പോസ്റ്റ് സിനിമാപ്രേമികള്ക്കിടയില് ചര്ച്ചയായിരുന്നു. പ്രചരണത്തില് എന്തെങ്കിലും വാസ്തവമുണ്ടോ?
ഫേസ്ബുക്ക് പോസ്റ്റ് ഇത്തരത്തിലായിരുന്നു. 'കോരിച്ചൊരിയുന്ന മഴയായിരുന്നു. ഇടത്തെ കൈയില് നിന്ന് രക്തം വാര്ന്നൊലിക്കുന്നു. സൈലന്റ് മോഡില് സ്റ്റീഫന്റെ കൈകളില് നിന്നും രക്തത്തുള്ളികള് ഇറ്റുവീഴുന്ന ശബ്ദം മാത്രം. (ബിജിഎം/ ബാക്ക്ഷോട്ട്). അതുകഴിഞ്ഞ് 666 അംബാസിഡറില് കയറി ദൈവത്തിനരികിലേക്കയച്ച ആ മനുഷ്യനെ സ്റ്റീഫന് ഒന്ന് തിരിഞ്ഞുനോക്കുന്നുണ്ട്. (ലോംഗ് ഷോട്ട്). എജ്ജാതി ഐറ്റം' ഈ പോസ്റ്റിന്റെ സ്ക്രീന് ഷോട്ട് എടുത്തുവച്ചോളൂ എന്ന് ആത്മവിശ്വാസം പ്രകടിപ്പിച്ച പോസ്റ്റില് പറയുന്നത് വ്യാജമാണെന്നാണ് തിരക്കഥാകൃത്ത് മുരളി ഗോപിയും നായകനെ അവതരിപ്പിക്കുന്ന മോഹന്ലാലും വ്യക്തമാക്കുന്നത്. ഒരിക്കലും ശമിക്കാത്ത കള്ള പ്രചാരണങ്ങളാണ് നടക്കുന്നതെന്ന് ഇരുവരും ഫേസ്ബുക്കില് കുറിച്ചു.
മുരളി ഗോപി തിരക്കഥയൊരുക്കുന്ന ചിത്രത്തില് പ്രതിനായകനാവുന്നത് വിവേക് ഒബ്റോയ് ആണ്. പൊളിറ്റിക്കല് ത്രില്ലര് ഗണത്തില് പെടുത്താവുന്ന ചിത്രത്തില് മോഹന്ലാല് കഥാപാത്രത്തിന്റെ സഹായിയായി കലാഭവന് ഷാജോണ് എത്തുന്നു. ഇന്ദ്രജിത്ത്, ടൊവീനോ തോമസ്, സംവിധായകന് ഫാസില്, മംമ്ത മോഹന്ദാസ്, ജോണ് വിജയ് എന്നിങ്ങനെ വലിയ താരനിരയുണ്ട് ചിത്രത്തില് സുജിത്ത് വാസുദേവ് ആണ് ഛായാഗ്രഹണം. സംഗീതം ദീപക് ദേവ്.