ഏകദിന ക്രിക്കറ്റില്‍ ടീം ഇന്ത്യക്ക് പുതിയ റെക്കോഡ്; മറികടന്നത് ഓസീസിനെ

ബാര്‍ബഡോസ്: ഏകദിന ക്രിക്കറ്റില്‍ പുതിയ റെക്കോര്‍ഡിട്ട് ടീം ഇന്ത്യ. ഏറ്റവും കൂടുതല്‍ തവണ 300ന് മേല്‍ റണ്‍സ് സ്കോര്‍ ചെയ്യുന്ന ടീമെന്ന റെക്കോര്‍ഡാണ് ഇന്നലെ ഇന്ത്യ വെസ്റ്റ് ഇന്‍ഡീസിനെതിരെ കുറിച്ചത്. 43 ഓവറില്‍ 310 റണ്‍സാണ് ഇന്ത്യ ഇന്നലെ അടിച്ചുകൂട്ടിയത്. ഇത് 96-ാം തവണയാണ് ഏകദിന ക്രിക്കറ്റില്‍ ഇന്ത്യ 300 കടക്കുന്നത്. 95 തവണ ഈ നേട്ടം കൈവരിച്ചിട്ടുള്ള ഓസ്ട്രേലിയയെ ആണ് ഇന്ത്യ ഇന്നലെ പിന്നിലാക്കിയത്.

300ന് മുകളില്‍ സ്കോര്‍ ചെയ്യുന്ന കാര്യത്തില്‍ ഇന്ത്യയ്ക്കും ഓസ്ട്രേലിയക്കും സമീപത്തെങ്ങും ആരുമില്ല. 77 തവണ 300ന് മുകളില്‍ സ്കോര്‍ ചെയ്തിട്ടുള്ള ദക്ഷിണാഫ്രിക്കയാണ് മൂന്നാം സ്ഥാനത്ത്. പാക്കിസ്ഥാന്‍(69), ശ്രീലങ്ക(63) എന്നിവരാണ് തുടന്‍ന്നുള്ള സ്ഥാനങ്ങളില്‍.

300 കടന്ന 96 മത്സരങ്ങളില്‍ 75 എണ്ണത്തിലും ഇന്ത്യ ജയിച്ചു. 19 കളിയില്‍ തോറ്റപ്പോള്‍ രണ്ട് മത്സരങ്ങള്‍ സമനിലയായി. 300 കടന്നിട്ട് ഏറ്റവും കൂടുതല്‍ തവണ തോറ്റ ടീമെന്ന റെക്കോര്‍ഡും ഇന്ത്യയുടെ പേരില്‍ തന്നെയാണ്. എന്നാല്‍ 95 തവണ 300 കടന്നിട്ടുള്ള ഓസീസ് 84 എണ്ണത്തിലും ജയിച്ചു. തവണമാത്രമേ ദക്ഷിണാഫ്രിക്കയാകട്ടെ 300 കടന്നിട്ട് ഏഴ് തോറ്റിട്ടുള്ളൂ.