പ്രൊഫഷണലുകൾ ജോലി മാറ്റത്തിന് തയ്യാർ; പക്ഷേ ഭൂരിപക്ഷത്തിനും എഐയെ ഭയം!

എഐ നയിക്കുന്ന റിക്രൂട്ട്‌മെന്‍റ് പ്രക്രിയകളും അതിവേഗം മാറിക്കൊണ്ടിരിക്കുന്ന നൈപുണ്യ ആവശ്യകതകളും തൊഴിലന്വേഷകരിൽ അനിശ്ചിതത്വം വർധിപ്പിച്ചിട്ടുണ്ടെന്ന് റിപ്പോര്‍ട്ടില്‍ പരാമര്‍ശം

മുംബൈ: ഇന്ത്യയിലെ തൊഴിൽ രംഗത്ത് പുതുവർഷം ഒരു പ്രധാന വൈരുദ്ധ്യം സൃഷ്‍ടിക്കുന്നതായി റിപ്പോർട്ട്. ഇന്ത്യൻ പ്രൊഫഷണലുകളിൽ ഒരു പ്രധാന ഭാഗം ഈ വർഷം ജോലി മാറ്റത്തെക്കുറിച്ച് ആഗ്രഹിക്കുന്നുണ്ടെങ്കിലും മിക്കവരും അതിന് തയ്യാറെടുത്തിട്ടില്ലെന്നുള്ള വിചിത്രമായ കാര്യമാണ് ലിങ്ക്ഡ്ഇൻ പുറത്തുവിട്ട റിപ്പോർട്ടില്‍ പറയുന്നത്. ആർട്ടിഫിഷ്യൽ ഇന്‍റലിജൻസ് അഥവാ എഐ നയിക്കുന്ന റിക്രൂട്ട്‌മെന്‍റ് പ്രക്രിയകളും അതിവേഗം മാറിക്കൊണ്ടിരിക്കുന്ന നൈപുണ്യ ആവശ്യകതകളും തൊഴിലന്വേഷകരിൽ അനിശ്ചിതത്വം വർധിപ്പിച്ചിട്ടുണ്ടെന്ന് ഈ റിപ്പോർട്ട് വ്യക്തമാക്കുന്നു.

തൊഴില്‍ മാറാന്‍ സന്നദ്ധമല്ലാതെ ഇന്ത്യക്കാര്‍

പുതിയ ജോലി കണ്ടെത്തുന്ന കാര്യത്തിൽ 84 ശതമാനം ഇന്ത്യൻ പ്രൊഫഷണലുകളും മാനസികമായി തയ്യാറല്ലെന്ന് കരുതുന്നതായി ലിങ്ക്ഡ്ഇൻ നടത്തിയ പഠന റിപ്പോർട്ട് പറയുന്നു. എഐയുടെ വർധിച്ചുവരുന്ന കടന്നുകയറ്റം, ഇന്നത്തെ ജോലികൾക്കായുള്ള മാറിക്കൊണ്ടിരിക്കുന്ന നൈപുണ്യ ആവശ്യകതകൾ, വിപണിയിലെ വർധിച്ചുവരുന്ന മത്സരം എന്നിവയാണ് ഇതിന് പ്രധാന കാരണം.

2022-ന്‍റെ തുടക്കം മുതൽ ഇന്ത്യയിൽ തൊഴിൽ അപേക്ഷകരുടെ എണ്ണം ഇരട്ടിയിലധികമായി വർധിച്ചതായി സ്ഥിതിവിവരക്കണക്കുകൾ കാണിക്കുന്നു. ഇത് മത്സരം വർധിപ്പിക്കുക മാത്രമല്ല, ഉദ്യോഗാർഥികളുടെ ആത്മവിശ്വാസത്തെയും ബാധിച്ചു. അതേസമയം കമ്പനികളും വെല്ലുവിളികൾ നേരിടുന്നു. കഴിഞ്ഞ വർഷം യോഗ്യതയുള്ള പ്രതിഭകളെ കണ്ടെത്തുന്നത് കൂടുതൽ ബുദ്ധിമുട്ടായി മാറിയിട്ടുണ്ടെന്ന് ഏകദേശം 74 ശതമാനം ഇന്ത്യൻ റിക്രൂട്ടർമാരും പറയുന്നു.

എഐ എന്നത് ഇനി വെറുമൊരു സാങ്കേതിക പദമല്ലെന്നും ഇന്ത്യയിലെ തൊഴിൽ വിപണിയിലെ കരിയർ വികസനത്തിന്‍റെയും കഴിവ് വിലയിരുത്തലിന്‍റെയും അടിത്തറയായി മാറിയിരിക്കുന്നുവെന്നും റിപ്പോർട്ട് വ്യക്തമാക്കുന്നു. ഇന്ന് പ്രൊഫഷണലുകൾക്ക് ഏറ്റവും ആവശ്യമുള്ളത് അവരുടെ കഴിവുകൾ അവസരങ്ങളായി എങ്ങനെ മാറുന്നുവെന്നും നിയമന തീരുമാനങ്ങൾ യഥാർഥത്തിൽ എങ്ങനെ എടുക്കപ്പെടുന്നുവെന്നും വ്യക്തമായ ധാരണയാണ് എന്ന് ലിങ്ക്ഡ്ഇൻ ഇന്ത്യ ന്യൂസിലെ സീനിയർ മാനേജിംഗ് എഡിറ്ററും കരിയർ വിദഗ്ധയുമായ നീരജിത ബാനർജി പറഞ്ഞു. എഐ ടൂളുകൾ വിദഗ്ധമായി ഉപയോഗിച്ചാൽ അവർക്ക് ഈ വിടവ് നികത്താൻ കഴിയുമെന്നും അവർ കൂട്ടിച്ചേർത്തു. ആളുകൾക്ക് ഏറ്റവും അനുയോജ്യമായ റോളുകൾ തിരിച്ചറിയാനും ശരിയായ ദിശയിൽ അവരുടെ തയ്യാറെടുപ്പ് കേന്ദ്രീകരിക്കാനും ഈ ടൂളുകൾ സഹായിക്കും.

ലിങ്ക്ഡ്ഇന്നിന്‍റെ ഇന്ത്യയിലെ ജോലികൾ വർധിക്കുന്നത് സംബന്ധിച്ച റിപ്പോർട്ട് 2026-ൽ എഐ, സാങ്കേതിക പ്രതിഭകൾക്ക് തുടർച്ചയായ ആവശ്യം കാണുന്ന പ്രധാന റോളുകൾ എടുത്തുകാണിക്കുന്നു. ഈ പട്ടികയിലെ ആദ്യ മൂന്ന് സ്ഥാനങ്ങളിൽ പ്രോംപ്റ്റ് എഞ്ചിനീയർ, എഐ എഞ്ചിനീയർ, സോഫ്റ്റ്‌വെയർ എഞ്ചിനീയർ എന്നീ ജോലികൾ ഉൾപ്പെടുന്നു.