പുതുമകളിലേക്ക്​ മിഴി തുറക്കാൻ ​ഐ ഫോൺ 8 സെപ്​റ്റംബർ പന്ത്രണ്ടിന് എത്തും

ഐ ഫോണ്‍ ആരാധകർ പ്രതീക്ഷയോടെ കാത്തിരിക്കുന്ന പുതിയ മോഡല്‍ ​ ​ഐ ഫോൺ 8 സെപ്​റ്റംബർ 12ന്​ വിപണിയിലെത്തു​മ്പോൾ അഞ്ച്​ ഉയർന്ന സവിശേഷതകൾ കാത്തിരിക്കുന്നു. അമേരിക്കയിലെ കൂപ്പർറ്റിനോയിലെ സ്​റ്റീവ്​ ജോബ്​സ്​ തിയറ്ററിൽ ആണ്​ ഫോണി​ൻ്റെ ലോഞ്ചിങ്​ ചടങ്ങ്​. വലിയ ബഹിരകാശപേടകത്തിൽ മാതൃകയിൽ കൂപ്പർറ്റിനോയിലെ ആപ്പിൾ പാർക്ക്​ കാമ്പസിലാണ്​ സ്​റ്റീവ്​ ജോബ്​സ്​ തിയറ്റർ. ആപ്പിൾ കമ്പനിയുടെ മികച്ച ഉൽപ്പന്നത്തിൻ്റെ പത്താം വാർഷികത്തെ കൂടി കുറിക്കുന്നതാണ്​ ​ഐ ഫോൺ 8. കാര്യമായ മാറ്റങ്ങളോടെയും ഒ​ട്ടേറെ സ​വി​ശേഷതകളോടും കൂടിയാണ്​ ഫോൺ എത്തുന്നതെന്നാണ്​ പ്രതീക്ഷ.

ദൃശ്യഭംഗി പൊലിപ്പിക്കുന്ന ഒഎൽഇഡി ബെസ്​ലെസ്​ ഡിസ്​​പ്ലേയാണ്​ പ്രധാന സവിശേഷത. ഫോണി​ൻ്റെ ഒരുഭാഗത്ത്​ മാത്രം ഡിസ്​പ്ലേ ഒതുങ്ങുന്ന എൽസിഡി രീതിയാണ്​ മാറാൻ പോകുന്നത്​. ചോർന്നുവന്ന ചിത്രങ്ങൾ പ്രകാരം ​ഐ ഫോൺ 8ന്​ 5.8 ഇഞ്ച്​ സ്​ക്രീൻ ആണ്​. ബ്ലൂംബെർഗിൽ നിന്നുള്ള പുതിയ റിപ്പോർട്ടുകൾ സൂചിപ്പിക്കുന്നത്​ ​ഐ ഫോൺ 8ന്​ ഇരുവശം വളഞ്ഞ വശങ്ങളോട്​ കൂടിയ  ഡിസ്​​പ്ലേ ആണ്​. നാല്​ മൂലകളും റൗണ്ട്​ ആകൃതിയിൽ ഉയർന്ന മുൻവശ ഡിസ്​​പ്ലേയാണ്​ ഫോണിന്. ഉപയോഗിക്കുന്നവരുടെ മുഖം തിരിച്ചറിയാൻ കഴിയുന്ന സെൻസർ, സെൽഫി ക്യാമറ എന്നിവ ഡിസ്​പ്ലേയുടെ മുകൾ ഭാഗത്തുണ്ട്​. അലൂമിനിയം ചേസിസും ഗ്ലാസ്​ ബോഡിയും ഫോണിൻ്റെ പ്രത്യേകതയാണ്​. 

ഫുൾ ​ഫ്രോണ്ടൽ ഡിസ്​പ്ലേ വരുന്നതോടെ ഹോം ബട്ടൺ ഒഴിവാക്കി. ​ഐ ഫോൺ 8 കൈയുടെ ചലനങ്ങൾക്കനുസൃതമായി പ്രവർത്തിപ്പിക്കാനും കഴിയുമെന്നാണ്​ പുതിയ വാർത്തകൾ. ഹോം ബട്ടൺ ഒഴിവാക്കിയത്​ വഴി ഉപയോക്​താവിന്​ ഉണ്ടാകുന്ന പ്രശ്​നങ്ങൾ ഒഴിവാക്കാൻ ഡിജിറ്റൽ ബട്ടൺ ഉൾപ്പെടെയുള്ള സൗകര്യങ്ങൾ ഒരുക്കിയതായാണ്​ സൂചനകൾ. ടച്ച്​ ​ഐഡിക്ക്​ പകരം മുഖം തിരിച്ചറിയുന്ന സ്​കാനർ വഴിയാണ്​ ഫോൺ ഉപയോഗിക്കാനാവുക. ഐ ഫോൺ 8ന്​ ഫിംഗർ പ്രിൻ്റ് ​ സ്​കാനർ ഉണ്ടായിരിക്കില്ലെന്ന്​ നേരത്തെ പ്രമുഖ ആപ്പിൾ വിശകലന വിദഗ്​ദൻ മിങ്​ ചികു സൂചിപ്പിച്ചിരുന്നു. ടച്ച്​ ​ഐഡിയുടെ സ്​ഥാനത്ത്​ മുഖം തിരിച്ചറിയാൻ കഴിയുന്ന സ്​കാനർ വരാതെ സാങ്കേതിക വിദ്യ വികസിച്ചു എന്നുപറയാൻ കഴിയില്ലെന്നും അദ്ദേഹം പറഞ്ഞു. 

വയർലെസ്​ ചാർജിങ്​ ആണ്​ ഫോൺ ഒളിപ്പിച്ചുവെച്ചിരിക്കുന്ന മറ്റൊരു പുതുമ. ടൈപ്പ്​ സി യു.എസ്​.ബിക്ക്​ വേണ്ടി ലൈറ്റനിങ്​ കേബിൾ ഉപയോഗിക്കുന്നുമുണ്ട്​ ഫോണിൽ. എന്നാൽ വയർലെസ്​ ചാർജിങിന്​ വേഗത കുറവായിരിക്കുമെന്ന വാർത്തകളും പുറത്തുവരുന്നുണ്ട്​. വേഗതയിൽ ചാർജിങ്​ നടത്താനുള്ള സൗകര്യവും ഫോണിന്​ ഉണ്ടാകും. ഗ്ലാസിലും സ്​റ്റീലിലുമുള്ള രൂപകൽപ്പന ആരാധകരുടെ മനംമയക്കുമെന്നാണ്​ പ്രതീക്ഷ.

മുൻ ​ഫോണുകളായ ​ഐ ഫോൺ7, ​ഐ ഫോൺ 6 സീരീസുകളിൽ  നിന്ന്​ കാര്യമായ മാറ്റം ​ഐ ഫോൺ 8​ൻ്റെ രൂപഭംഗിയിൽ ഉണ്ടെന്നാണ്​ പുറത്തുവരുന്ന വിവരങ്ങൾ. മുൻ ഫോണുകൾക്ക്​ അലുമിനിയം ചേസിസ്​ ആയിരുന്നെങ്കിൽ മെറ്റൽ ഗ്ലാസ്​ ഡിസൈൻ ആണ്​ ​ഐ ഫോൺ 8​ൻ്റെ ബലം.