18 വർഷത്തിനുശേഷം തുടർച്ചയായ രണ്ടാം പാദത്തിലും ബി‌എസ്‌എൻ‌എല്ലിന് ലാഭം, കിട്ടിയത് 280 കോടി

വീണ്ടും ചരിത്രമെഴുതി ബിഎസ്എന്‍എല്‍, തുടര്‍ച്ചയായ രണ്ടാംപാദത്തിലും കമ്പനിക്ക് ലാഭം

ദില്ലി: സർക്കാർ ടെലികോം കമ്പനിയായ ഭാരത് സഞ്ചാർ നിഗം ലിമിറ്റഡ് (ബിഎസ്എൻഎൽ) കഴിഞ്ഞ സാമ്പത്തിക വർഷത്തിലെ നാലാം പാദത്തിൽ ഏകദേശം 280 കോടി രൂപയുടെ അറ്റാദായം രേഖപ്പെടുത്തി. ഏകദേശം 18 വർഷത്തിനിടെ ഇതാദ്യമായാണ് ബി‌എസ്‌എൻ‌എൽ തുടർച്ചയായി രണ്ട് പാദങ്ങളിൽ ലാഭം നേടുന്നത്. 4ജി സേവനം ആരംഭിക്കാനായത് മൊബൈൽ വിഭാഗത്തിൽ വരുമാനം വർധിപ്പിക്കുന്നതിന് ബിഎസ്എന്‍എല്ലിനെ സഹായിച്ചിട്ടുണ്ട്.

ഇതേ പാദത്തിൽ കമ്പനി 849 കോടി രൂപയുടെ നഷ്‍ടം രേഖപ്പെടുത്തിയതിന് ഒരു വർഷത്തിന് ശേഷമാണ് ഈ നേട്ടം. 18 വർഷത്തിനിടെ ഇതാദ്യമായാണ് തുടർച്ചയായി ത്രൈമാസ ലാഭം എന്ന് കേന്ദ്ര ടെലികോം മന്ത്രി ജ്യോതിരാദിത്യ സിന്ധ്യ മാധ്യമപ്രവർത്തകരെ അഭിസംബോധന ചെയ്തുകൊണ്ട് പറഞ്ഞു.

2025 സാമ്പത്തിക വർഷത്തിലെ ഒക്ടോബർ-ഡിസംബർ പാദത്തിൽ ബിഎസ്എൻഎൽ 262 കോടി രൂപയുടെ നികുതിക്ക് ശേഷമുള്ള ലാഭം നേടിയിരുന്നു. മുഴുവൻ സാമ്പത്തിക വർഷത്തിലെയും കമ്പനിയുടെ സഞ്ചിത നഷ്ടം ഇപ്പോൾ 2,247 കോടി രൂപയായി കുത്തനെ കുറഞ്ഞു. 2024 സാമ്പത്തിക വർഷത്തിൽ ഇത് 5,370 കോടി രൂപയായിരുന്നു. പ്രൊഫഷണൽ മാനേജ്‌മെന്‍റ്, സർക്കാർ പിന്തുണ, ഉന്നതരിലും താഴേത്തട്ടിലുമുള്ള നിരന്തരമായ ശ്രദ്ധ എന്നിവയാണ് ബിഎസ്‌എൻഎൽ പ്രകടനത്തിന് കാരണമെന്ന് ചെയർമാനും മാനേജിംഗ് ഡയറക്ടറുമായ എ റോബർട്ട് ജെ രവി പറഞ്ഞു. ബിഎസ്എൻഎൽ പുനരുജ്ജീവിപ്പിക്കുക മാത്രമല്ല, പുനർനിർവചിക്കപ്പെടുകയും ചെയ്യുന്നുവെന്നും രവി പറഞ്ഞു. കമ്പനി ചെലവ് അച്ചടക്കത്തിലും 4ജി, 5ജി വിന്യാസങ്ങൾ ത്വരിതപ്പെടുത്തുന്നതിലും ശ്രദ്ധ കേന്ദ്രീകരിക്കുന്നു.

അച്ചടക്കമുള്ള ചെലവ് നിയന്ത്രണവും പ്രവർത്തന കാര്യക്ഷമതയുമാണ് തങ്ങളുടെ സാമ്പത്തിക സ്ഥിതി മെച്ചപ്പെടുത്തുന്നതിനുള്ള പ്രധാന കാരണമെന്ന് ബി.എസ്.എൻ.എൽ പ്രസ്താവിച്ചു. ഫൈബർ-ടു-ദി-ഹോം (FTTH) വിഭാഗത്തിൽ നിന്നുള്ള കമ്പനിയുടെ വരുമാനം ഏകദേശം 2,923 കോടി രൂപയായി. ഇത് ഏകദേശം 10 ശതമാനം വർധനവാണ്. ലീസ്‍ഡ് ലൈനുകളിൽ നിന്നും എന്റർപ്രൈസ് സേവനങ്ങളിൽ നിന്നുമുള്ള വരുമാനം ഏകദേശം 3.5 ശതമാനം വർധിച്ച് 4,096 കോടി രൂപയായി. ബി‌എസ്‌എൻ‌എല്ലിന്‍റെ 4 ജി നെറ്റ്‌വർക്കിന്‍റെ ലോഞ്ച് ഉടൻ പൂർത്തിയായേക്കാം. ഇതിനായി 93,450 ടവറുകൾ സ്ഥാപിച്ചു. ബിഎസ്എൻഎല്ലിന്‍റെ 4ജി നെറ്റ്‌വർക്കിനായി തദ്ദേശീയ സാങ്കേതികവിദ്യ ഉപയോഗിച്ചിട്ടുണ്ട്. ഈ നെറ്റ്‌വർക്ക് അപ്‌ഗ്രേഡ് ചെയ്ത് 5 ജി ആക്കി മാറ്റാനുള്ള പദ്ധതിയുണ്ട്.

കമ്പനി ഏകദേശം 93,450 ടവറുകൾ സ്ഥാപിച്ചതിൽ പൊതുമേഖലാ കമ്പനിയായ സി-ഡിഒടി, സർക്കാർ കമ്പനിയായ ബിഎസ്എൻഎൽ, സ്വകാര്യമേഖലാ കമ്പനിയായ തേജസ് നെറ്റ്‌വർക്ക്സ്, സിസ്റ്റം ഇന്റഗ്രേറ്ററായി ടാറ്റ കൺസൾട്ടൻസി സർവീസസ് (ടിസിഎസ്) എന്നിവ ഉൾപ്പെടുന്നു. ഈ നാലു കമ്പനികളും ചേർന്ന് 22 മാസത്തിനുള്ളിൽ രാജ്യത്തെ ആദ്യത്തെ സ്റ്റാക്ക് സൃഷ്ടിച്ചു എന്ന് ടെലികോം മന്ത്രി ജ്യോതിരാദിത്യ സിന്ധ്യ അടുത്തിടെ പറഞ്ഞിരുന്നു. 4ജി-യ്‌ക്കായി തദ്ദേശീയ ടെലികോം സ്റ്റാക്ക് ഉള്ള ലോകത്തിലെ അഞ്ചാമത്തെ രാജ്യമായി ഇന്ത്യ മാറിയെന്നും അദ്ദേഹം പറഞ്ഞു. ഈ പട്ടികയിൽ ചൈന, ഫിൻലാൻഡ്, ദക്ഷിണ കൊറിയ, സ്വീഡൻ എന്നിവ ഉൾപ്പെടുന്നു.

അച്ചടക്കമുള്ള ചെലവ് നിയന്ത്രണവും ത്വരിതപ്പെടുത്തിയ 4G/5G വിന്യാസവും വഴി, ഈ വളർച്ചാ പാത നിലനിർത്താനും എല്ലാ ഇന്ത്യക്കാർക്കും താങ്ങാനാവുന്നതും ഉയർന്ന നിലവാരമുള്ളതുമായ കണക്റ്റിവിറ്റി നൽകാനും ബിഎസ്എൻഎല്ലിന് ആത്മവിശ്വാസമുണ്ടെന്ന് എ റോബർട്ട് ജെ രവി പറഞ്ഞു. ലാഭം ലക്ഷ്യമാക്കി തങ്ങൾ മുന്നോട്ട് പോകില്ല എന്നും പൊതുസേവനത്തിലെ ടെലികോം മികവ് തങ്ങൾ പുനർനിർവചിക്കും എന്നും അദ്ദേഹം വ്യക്തമാക്കി.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം