സൂക്ഷിച്ചാല് പണവും ജീവിതവും പോകില്ല; സൈബര് സുരക്ഷയ്ക്ക് ഇക്കാര്യങ്ങള് ശ്രദ്ധിക്കാം
Synopsis
സൈബര് തട്ടിപ്പ് സംഘങ്ങള് ഓരോ ദിവസവും പുത്തന് വഴികള് ആളുകളെ വീഴ്ത്താന് കണ്ടെത്തുന്നതാണ് ഇതിന് കാരണം. അതിനാല് 2026ലും സൈബര് സുരക്ഷയ്ക്ക് ഇക്കാര്യങ്ങള് ശ്രദ്ധിക്കുക.
ഓണ്ലൈന് തട്ടിപ്പുകളുടെ കാലമാണ്, അതിനാല് തന്നെ സൈബര് സുരക്ഷ എല്ലാ പൗരന്മാരെ സംബന്ധിച്ചും വളരെയധികം പ്രധാനപ്പെട്ട വിഷയമാണ്. 2026-ല് സൈബര് വെല്ലുവിളികള് കൂടുമെന്നല്ലാതെ കുറയാന് യാതൊരു സാധ്യതയുമില്ല. സൈബര് തട്ടിപ്പ് സംഘങ്ങള് ഓരോ ദിവസവും പുത്തന് വഴികള് ആളുകളെ വീഴ്ത്താന് കണ്ടെത്തുന്നതാണ് ഇതിന് കാരണം. അതിനാല് 2026-ലും സൈബര് സുരക്ഷയ്ക്ക് ഇക്കാര്യങ്ങള് മറക്കാരെ നിങ്ങള് ഓരോരുത്തരും ശ്രദ്ധിക്കുക.
1. നിങ്ങളുടെ സ്വകാര്യ വിവരങ്ങളും പണവും സംരക്ഷിക്കുക
ഡിജിറ്റല് ഇടത്തിലെ വ്യക്തിവിവരങ്ങളും പണവും സംരക്ഷിക്കുന്നതിനായി ഒടിപികള് ഷെയര് ചെയ്യുമ്പോഴും, യുപിഐ ആക്സസ് ചെയ്യുമ്പോഴും, ഡെബിറ്റ്, ക്രഡിറ്റ് കാര്ഡ് വിവരങ്ങള് സേവ് ചെയ്യുമ്പോഴും ശ്രദ്ധിക്കുക. പരിചയമില്ലാത്ത ആര്ക്കും ബാങ്ക് അക്കൗണ്ട് വിവരങ്ങളും യുപിഐ ഐഡികളും ഒടിപികളും കൈമാറരുത്. നിങ്ങളുടെ ഇമെയില്- ഫോണ് നമ്പര് എന്നിവയുടെ സുരക്ഷയും പ്രധാനമാണ്. അതിനാല് അവ രണ്ടും ഉപയോഗിക്കുമ്പോഴും ഇമെയില് വിലാസവും ഫോണ് നമ്പറും മറ്റുള്ളവര്ക്ക് നല്കുമ്പോഴും ജാഗ്രത പ്രധാനമാണ്.
2. ഓണ്ലൈന് സ്കാമുകളിലും തട്ടിപ്പുകളിലും നിന്ന് അകലം പാലിക്കുക
ഇക്കാലത്ത് ഏറ്റവും അധികം സൈബര് തട്ടിപ്പുകള് നടക്കുന്നൊരു രീതിയാണ് ഓണ്ലൈന് സ്കാമുകള് എന്നുള്ളത്. വാട്സ്ആപ്പും എസ്എംഎസുകളും കോളുകളും മെയിലുകളും ക്യുആര് കോഡുകളും വഴി വരുന്ന അനേകം സന്ദേശങ്ങളും ലിങ്കുകളും ചിലപ്പോള് നിങ്ങള്ക്കുള്ള സൈബര് തട്ടിപ്പ് സംഘങ്ങളുടെ കെണികളായിരിക്കും. ഓണ്ലൈനില് വരുന്ന ഓരോ മെസേജുകളോട് പ്രതികരിക്കുമ്പോഴും അതീവ ജാഗ്രത പാലിക്കുക. വിശ്വസനീയമല്ലാത്ത ലിങ്കുകളില് ഒരിക്കലും ക്ലിക്ക് ചെയ്യരുത്. സംശയാസ്പദമായ കോളുകള്, മെസേജുകള് എന്നിവയോട് ഒരിക്കലും പ്രതികരിക്കരുത്. എപ്പോഴും ഔദ്യോഗിക വെബ്സൈറ്റുകളില് മാത്രം ക്ലിക്ക് ചെയ്യുക.
3. ആപ്പുകള് ആപ്പാവരുത്
എപ്പോഴും ഔദ്യോഗിക ആപ്പുകള് മാത്രമേ ഏതൊരു സേവനങ്ങള്ക്കായും ഉപയോഗിക്കാന് പാടുള്ളൂ. വ്യാജവും ക്ലോണ് ചെയ്യപ്പെട്ടതുമായ ആപ്പുകള് ധാരാളം ഇന്റര്നെറ്റില് ലഭ്യമാണ്. അവ യാതൊരു കാരണവശാലും ഇന്സ്റ്റാള് ചെയ്യരുത്. ആപ്പുകള് ആപ്പ് സ്റ്റോറിലും പ്ലേ സ്റ്റോറിലും നിന്ന് മാത്രം ഡൗണ്ലോഡ് ചെയ്ത് ഇന്സ്റ്റാള് ചെയ്യുക. ആപ്പുകള് ഡൗണ്ലോഡ് ചെയ്യും മുമ്പ് അവ വെരിഫൈ ചെയ്യുകയും അവയുടെ റിവ്യൂ പരിശോധിച്ച് ഉറപ്പിക്കുകയും വേണം. ആപ്പുകള് ഇന്സ്റ്റാള് ചെയ്യുമ്പോള് ആവശ്യമായ പെര്മിഷനുകള് മാത്രം നല്കാനും ശ്രദ്ധിക്കുക. എപികെ ഫയലുകള് വഴി യാതൊരു കാരണവശാലും ആപ്പുകള് ഫോണില് ഇന്സ്റ്റാള് ചെയ്യാന് പാടില്ല.
4. ഫയല് ഷെയറിംഗിലും ശ്രദ്ധിക്കാനുണ്ട്
ഒന്നിലേറെ പേര് ജോലി ചെയ്യുന്ന സ്ഥാപനങ്ങളില് എപ്പോഴും ഷെയര് ചെയ്യപ്പെടുന്ന ഫയലുകള് പരിശോധിച്ച് അവയുടെ സുരക്ഷ ഉറപ്പുവരുത്തുക.
5. സിസിടിവി, വൈഫൈ സുരക്ഷ
ഇന്ന് വീടുകളിലും സ്ഥാപനങ്ങളിലും സിസിടിവികള് സ്ഥാപിക്കുന്നത് സര്വ്വസാധാരണമാണ്. അതിനാല്, സിസിടിവികള് സ്ഥാപിക്കുമ്പോഴും അനേകം കാര്യങ്ങള് ശ്രദ്ധിക്കേണ്ടതുണ്ട്. സിവിടിവികള്ക്ക് ശക്തമായ പാസ്വേഡുകള് നല്കുക, ഒരിക്കലും കമ്പനികള് പൊതുവായി തരുന്ന പാസ്വേഡുകള് ഉപയോഗിക്കരുത്. കുറഞ്ഞത് മാസത്തിലൊന്നെങ്കിലും പാസ്വേഡുകള് അപ്ഡേറ്റ് ചെയ്യുകയും വേണം. ഇതിന് സമാനമാണ് വൈഫൈയുടെ സുരക്ഷയും. വീടുകളിലും സ്ഥാപനങ്ങളിലും വൈഫൈയും ശക്തമായ പാസ്വേഡുകള് ഉപയോഗിച്ച് സംരക്ഷിക്കുകയും സിസിടിവിയിലേക്കും വൈഫൈയിലേക്കുമുള്ള ആക്സസ് പരിമിതമാക്കുകയും വേണം. പൊതുയിടങ്ങളിലെ വൈഫൈകള് ഉപയോഗിക്കാതിരിക്കുന്നതും സൈബര് സുരക്ഷയ്ക്ക് നല്ലതാണ്. ഇത്തരം പൊതു വൈഫൈകള് ഹാക്ക് ചെയ്യപ്പെടാന് എളുപ്പം കഴിയുന്നവയായിരിക്കാം എന്നതാണ് ഇതിന് കാരണം.
6. എല്ലായിടത്തുനിന്നും ഫോണ് ചാര്ജ് ചെയ്യരുത്
റെയില്വേ സ്റ്റേഷനുകള്, ബസ് സ്റ്റാന്ഡുകള്, വിമാനത്താവളങ്ങള് തുടങ്ങിയ പൊതു ഇടങ്ങളില് നിന്ന് മൊബൈല് ഫോണുകളും ലാപ്ടോപ്പുകളും ചാര്ജ് ചെയ്യുന്ന ശീലം നമുക്ക് മിക്കവര്ക്കുമുണ്ട്. എന്നാല് ഇങ്ങനെ ചാര്ജ് ചെയ്യുന്നത്, യുഎസ്ബി പോര്ട്ട് വഴി ഡിവൈസിലേക്ക് ഹാക്കര്മാര്ക്ക് പ്രവേശിക്കാന് വഴിയൊരുക്കിയേക്കാം.
2026ലെ പ്രധാന സൈബര് വെല്ലുവിളികള്
- വ്യാജ ഇമെയിലുകളും ഫിഷിംഗ് സ്കാമുകളും
- ഡീപ്ഫേക്ക് തട്ടിപ്പുകളും സ്കാമുകളും
- കമ്പ്യൂട്ടറുകളിലും ക്ലൗഡുകളിലുമുള്ള റാന്സംവെയറുകള്
- പാസ്വേഡും ഐഡന്റിറ്റിയും തട്ടിയെടുക്കല്
- ഓണ്ലൈനായി പണം തട്ടിയെടുക്കല്
- സൈബര് അറസ്റ്റ്
- വ്യാജ നിക്ഷേപ തട്ടിപ്പുകള്
ഓണ്ലൈന് സുരക്ഷയ്ക്ക് ഇവ പ്രധാനം
1. ശക്തമായ പാസ്വേഡുകളും ടു-സ്റ്റെപ് വെരിഫിക്കേഷനും ഉറപ്പാക്കുക.
2. ക്ലിക്ക് ചെയ്യും മുമ്പ് ഇമെയിലുകളും ലിങ്കുകളും പരിശോധിച്ച് ആധികാരികത ഉറപ്പുവരുത്തുക
3. മൊബൈല് ഫോണുകള് പോലുള്ള ഡിവൈസുകള് എപ്പോഴും അപ്ഡേറ്റ് ചെയ്ത് ഉപയോഗിക്കുക.
4. സുരക്ഷിതമായ ക്ലൗഡ്, റിമോട്ട് ആക്സസുകള് മാത്രം ഉപയോഗിക്കുക.
5. വ്യക്തിവിവരങ്ങള് അനാവശ്യമായി ആരോടും പങ്കുവെക്കരുത്.
ഏറ്റവും പുതിയ Technology News മലയാളത്തിൽ അറിയാൻ ഏഷ്യാനെറ്റ് ന്യൂസ് മലയാളം ഒപ്പമിരിക്കുക. Mobile Reviews in Malayalam, AI പോലുള്ള പുതുപുത്തൻ സാങ്കേതിക നവീകരണങ്ങൾ തുടങ്ങി ടെക് ലോകത്തിലെ എല്ലാ പ്രധാന അപ്ഡേറ്റുകളും അറിയാൻ Asianet News Malayalam