നീല ടിക്കിന് പണം; എക്സിന് 120 ദശലക്ഷം യൂറോ പിഴ ചുമത്തി യൂറോപ്യൻ യൂണിയൻ
Synopsis
ശതകോടീശ്വരന് ഇലോണ് മസ്കിന്റെ ഉടമസ്ഥതയിലുള്ള മൈക്രോ ബ്ലോഗിംഗ് പ്ലാറ്റ്ഫോമായ എക്സിന് 120 മില്യൺ യൂറോ (12,57 കോടി രൂപ) പിഴ ചുമത്തി യൂറോപ്യന് യൂണിയന്
ബ്രസൽസ്: യൂറോപ്യൻ യൂണിയൻ സോഷ്യൽ മീഡിയ പ്ലാറ്റ്ഫോമായ എക്സിന് 120 മില്യൺ യൂറോ (12,57 കോടി രൂപ) പിഴ ചുമത്തി. നിയമവിരുദ്ധവും ഹാനികരവുമായ ഉള്ളടക്കം കൈകാര്യം ചെയ്യുന്നതിന് ഓൺലൈൻ പ്ലാറ്റ്ഫോമുകൾ കൂടുതൽ കാര്യങ്ങൾ ചെയ്യണമെന്ന് ആവശ്യപ്പെടുന്ന ഡിജിറ്റൽ സർവീസസ് ആക്ട് (DSA) പ്രകാരം രണ്ട് വർഷം നീണ്ട അന്വേഷണത്തിന് ശേഷമാണ് എക്സിനെതിരെയുള്ള നടപടി. ഡിജിറ്റൽ സർവീസസ് ആക്ടിന്റെ (ഡിഎസ്എ) നിരവധി നിയമങ്ങൾ എക്സ് ലംഘിച്ചതായി രണ്ട് വർഷത്തെ അന്വേഷണത്തിൽ കണ്ടെത്തി.
എക്സിന് യൂറോപ്പില് കനത്ത പിഴ
27 രാജ്യങ്ങളുള്ള യൂറോപ്യൻ യൂണിയനിൽ ഡിജിറ്റൽ സേവന നിയമപ്രകാരം ഒരു പ്ലാറ്റ്ഫോമിനെതിരെ നിയമലംഘന വിധി പുറപ്പെടുവിക്കുന്നത് ഇതാദ്യമാണ്. സോഷ്യൽ മീഡിയ കമ്പനികൾ ഉപയോക്തൃ സുരക്ഷ ഉറപ്പാക്കുകയും തെറ്റായ വിവരങ്ങളും നിയമവിരുദ്ധ ഉള്ളടക്കവും നീക്കം ചെയ്യുകയും ചെയ്യണമെന്ന് ഡിഎസ്എ ആവശ്യപ്പെടുന്നു. ലംഘനങ്ങൾക്ക് കനത്ത പിഴ ഈടാക്കാം.
എക്സിന്റെ നീല ടിക്ക് സംവിധാനം വഞ്ചനാപരമായ ഒരു രൂപകൽപ്പനയാണ് ഉപയോഗിക്കുന്നതെന്ന് യൂറോപ്യൻ യൂണിയൻ കമ്മീഷൻ പറയുന്നു. ഇത് വഞ്ചനയ്ക്കും തെറ്റായ വിവരത്തിനും സാധ്യത വർധിപ്പിക്കുന്നു. മുമ്പ് രാഷ്ട്രീയക്കാർക്കും സെലിബ്രിറ്റികൾക്കും വെരിഫൈഡ് അക്കൗണ്ടുകൾക്കും മാത്രമേ നീല ടിക്ക് നൽകിയിരുന്നുള്ളൂവെങ്കിലും ഇപ്പോൾ പണം നൽകുന്ന ആർക്കും ഈ ബാഡ്ജ് ലഭിക്കുമെന്ന് യൂണിയൻ പറയുന്നു. ഈ സംവിധാനം യഥാർഥ ഉപയോക്താവിനെ വെരിഫൈ ചെയ്യുന്നില്ലെന്നും വ്യാജ അക്കൗണ്ടുകൾ തിരിച്ചറിയുന്നത് ബുദ്ധിമുട്ടാക്കുന്നുവെന്നും കമ്മീഷൻ പറഞ്ഞു.
ഡിഎസ്എ പ്രകാരം, ഓരോ പരസ്യത്തെയും കുറിച്ചുള്ള വിവരങ്ങൾ, അതായത് അതിന് ആരാണ് പണം നൽകിയത്, ലക്ഷ്യ പ്രേക്ഷകർ തുടങ്ങിയ പൊതു ഡാറ്റാബേസുകൾ പ്ലാറ്റ്ഫോമുകൾ പരിപാലിക്കേണ്ടതുണ്ട്. എന്നാൽ എക്സിന്റെ പരസ്യ ഡാറ്റാബേസ് മതിയായ വിവരങ്ങൾ നൽകുന്നില്ലെന്നും നിരവധി സാങ്കേതിക തടസ്സങ്ങൾ ഗവേഷകരെ ഡാറ്റ ആക്സസ് ചെയ്യുന്നതിൽ നിന്ന് തടയുന്നുവെന്നും ഇത് വ്യാജ പരസ്യങ്ങളും തെറ്റായ വിവര പ്രചാരണങ്ങളും തിരിച്ചറിയുന്നത് ബുദ്ധിമുട്ടാക്കുന്നുവെന്നും യൂറോപ്യൻ യൂണിയൻ പറയുന്നു.
യൂറോപ്യന് യൂണിയന്റെ കൂടുതല് കണ്ടെത്തലുകള്
ഗവേഷകർക്ക് പൊതു ഡാറ്റയിലേക്കുള്ള ആക്സസ്സിന് എക്സ് അനാവശ്യമായ തടസങ്ങൾ സൃഷ്ടിക്കുന്നുണ്ടെന്നും ഇത് യൂറോപ്യൻ ഉപയോക്താക്കൾക്ക് ഭീഷണികളും വ്യവസ്ഥാപരമായ അപകടസാധ്യതകളും അന്വേഷിക്കുന്നത് ബുദ്ധിമുട്ടാക്കുന്നുവെന്നും കമ്മീഷൻ പ്രസ്താവിച്ചു. ഉപയോക്താക്കളെ തെറ്റിദ്ധരിപ്പിക്കാനും പരസ്യ വിവരങ്ങൾ മറച്ചുവെക്കാനും ഗവേഷകരെ തടസപ്പെടുത്താനും നീല ടിക്കുകൾ ഉപയോഗിക്കുന്നത് യൂണിയന് അസ്വീകാര്യമാണെന്നും ആളുകളെ സംരക്ഷിക്കുന്നതിനാണ് ഡിഎസ്എ എന്നും യൂറോപ്യൻ യൂണിയൻ വൈസ് പ്രസിഡന്റ് ഹെന്ന വിർക്കുനെൻ പറഞ്ഞു.
ഏറ്റവും പുതിയ Technology News മലയാളത്തിൽ അറിയാൻ ഏഷ്യാനെറ്റ് ന്യൂസ് മലയാളം ഒപ്പമിരിക്കുക. Mobile Reviews in Malayalam ,New Gadgets, AI പോലുള്ള പുതുപുത്തൻ സാങ്കേതിക നവീകരണങ്ങൾ തുടങ്ങി ടെക് ലോകത്തിലെ എല്ലാ പ്രധാന അപ്ഡേറ്റുകളും ഇവിടെ അറിയാം