കണ്‍കുളിര്‍ക്കെ കണ്ട് മലയാളികള്‍; അന്താരാഷ്‌ട്ര ബഹിരാകാശ നിലയം കേരളത്തിന് മുകളിലൂടെ കടന്നുപോയി- വീഡിയോ

കേരളത്തിന് മുകളില്‍ അത്യാകര്‍ഷകമായ വാന വിസ്‌മയം തീര്‍ത്ത് ഇന്നലെ വൈകിട്ട് അന്താരാഷ്‌ട്ര ബഹിരാകാശ നിലയം (ഐഎസ്എസ്) കടന്നുപോയി. ഏഴ് സ‌ഞ്ചാരികളുള്ള ബഹിരാകാശ നിലയം കോവളത്തുനിന്ന് പകര്‍ത്തിയപ്പോള്‍…

തിരുവനന്തപുരം: കേരളത്തിന് മുകളില്‍ ദൃശ്യവിസ്‌മയമൊരുക്കി അന്താരാഷ്‌ട്ര ബഹിരാകാശ നിലയം (ഐഎസ്എസ്) കടന്നുപോയി. ഇന്നലെ വൈകിട്ട് 6.25-ഓടെയാണ് ബഹിരാകാശ നിലയം കേരളത്തിന് മുകളിലൂടെ കടന്നുപോയത്. അന്താരാഷ്‌ട്ര ബഹിരാകാശ നിലയത്തിന്‍റെ നിരവധി ദൃശ്യങ്ങള്‍ മൊബൈല്‍ ക്യാമറകളില്‍ ആളുകള്‍ പകര്‍ത്തി. കോവളത്തുനിന്ന് മനൂപ് വെളുത്തപറമ്പത്ത് പകര്‍ത്തിയ ദൃശ്യങ്ങള്‍ കാണാം.

വീഡിയോ കടപ്പാട്: മനൂപ് വെളുത്തപറമ്പത്ത്

ഡിസംബർ ഏഴിന് വൈകിട്ടും ഡിസംബർ ഒമ്പതിന് രാവിലെയും അന്താരാഷ്‌ട്ര ബഹിരാകാശ നിലയം കേരളത്തിന് മുകളിലൂടെ കടന്നുപോകും. ഡിസംബർ 11-ന് രാവിലെ 5.19ന് 58 ഡിഗ്രിവരെ ഉയരത്തിലെത്തുന്നതിനാൽ ഐഎസ്എസിന്‍റെ നല്ല കാഴ്ച കേരളത്തില്‍ നിന്ന് പ്രതീക്ഷിക്കാം. നിലവില്‍ ഏഴ് സ‌‌ഞ്ചാരികളാണ് അന്താരാഷ്ട്ര ബഹിരാകാശ നിലയത്തിലുള്ളത്.

ബഹിരാകാശ നിലയം എന്ന മനുഷ്യാത്ഭുതം

താഴ്ന്ന ഭൂ-ഭ്രമണപഥത്തിൽ സഞ്ചരിച്ചുകൊണ്ടിരിക്കുന്ന ബഹിരാകാശ ഗവേഷണശാലയാണ് അന്താരാഷ്ട്ര ബഹിരാകാശ നിലയം അഥവാ ഐഎസ്എസ്. ഭൗമോപരിതലത്തിൽ നിന്ന് ഏകദേശം 400 കിലോമീറ്റർ ഉയരത്തിൽ ഭൂമിയെ ചുറ്റിക്കൊണ്ടിരിക്കുന്ന ഐഎസ്എസ് മണിക്കൂറിൽ 27000 കിലോമീറ്റർ വേഗത്തില്‍ സഞ്ചരിക്കുന്നു. നിലയം ഒരു ദിവസം 15.54 തവണ ഭൂമിയെ വലംവെക്കുന്നു. ഒരു ഫുട്ബോൾ സ്റ്റേഡിയത്തിന്‍റെ വലിപ്പമുള്ള അന്താരാഷ്ട്ര ബഹിരാകാശ നിലയത്തിന് 109 മീറ്റർ നീളവും 73 മീറ്റർ വീതിയുമുണ്ട്. 4.5 ലക്ഷം കിലോഗ്രാമാണ് ഐഎസ്എസിന്‍റെ ഭാരം.