ഇൻസ്റ്റഗ്രാം അക്കൗണ്ട് ഇനി കൂടുതൽ സുരക്ഷിതം; ടു-ഫാക്‌ടർ ഓതന്‍റിക്കേഷൻ എങ്ങനെ സജ്ജമാക്കാം?

ഇൻസ്റ്റഗ്രാം അക്കൗണ്ടുകളുടെ സുരക്ഷ വർധിപ്പിക്കാൻ ടു-ഫാക്‌ടർ ഓതന്‍റിക്കേഷൻ (2FA) സംവിധാനം ഉപയോഗിക്കാം. പാസ്‌വേഡിനൊപ്പം ഒരു സുരക്ഷാ കോഡ് കൂടി നൽകേണ്ട ഈ സംവിധാനം ഓതന്‍റിക്കേഷൻ ആപ്പുകൾ വഴിയോ എസ്എംഎസ്/വാട്സ്ആപ്പ് വഴിയോ സജ്ജീകരിക്കാം. ഇത് എങ്ങനെ പ്രവർത്തനക്ഷമമാക്കാം എന്ന് ലേഖനം വിശദീകരിക്കുന്നു.

തിരുവനന്തപുരം: സോഷ്യൽ മീഡിയ ഉപയോഗം ദിനംപ്രതി വർധിച്ചുവരുന്ന സാഹചര്യത്തിൽ അക്കൗണ്ട് സുരക്ഷയ്ക്ക് വലിയ പ്രാധാന്യമാണുള്ളത്. പലരും ശക്തമായ പാസ്‌വേഡും വ്യത്യസ്‌ത യൂസർനെയിമും ഉപയോഗിക്കുന്നത് മാത്രം ഹാക്കർമാരിൽ നിന്ന് രക്ഷപ്പെടാൻ മതിയെന്ന് കരുതുന്നു. എന്നാൽ സാങ്കേതികവിദ്യ വികസിച്ചതോടെ സൈബർ കുറ്റവാളികളും കൂടുതൽ പുതിയ മാർഗങ്ങൾ സ്വീകരിച്ച് ഉപയോക്താക്കളുടെ അക്കൗണ്ടുകൾ കൈവശപ്പെടുത്താൻ ശ്രമിക്കുന്ന സാഹചര്യമാണ് ഇപ്പോൾ കാണുന്നത്. ഈ സാഹചര്യത്തിലാണ് ജനപ്രിയ ഫോട്ടോ-വീഡിയോ ഷെയറിംഗ് പ്ലാറ്റ്‌ഫോമായ ഇൻസ്റ്റഗ്രാം ഉപയോക്താക്കൾക്ക് കൂടുതൽ സുരക്ഷ ഉറപ്പാക്കാൻ ടു-ഫാക്‌ടർ ഓതന്‍റിക്കേഷൻ (2FA) സംവിധാനം ഒരുക്കിയിരിക്കുന്നത്.

ഇന്‍സ്റ്റഗ്രാം ടു-ഫാക്‌ടർ ഓതന്‍റിക്കേഷൻ

ടു-ഫാക്‌ടർ ഓതന്‍റിക്കേഷൻ എന്നത് അക്കൗണ്ടിലേക്ക് ലോഗിൻ ചെയ്യുമ്പോൾ പാസ്‌വേഡിനൊപ്പം മറ്റൊരു സുരക്ഷാ ഘട്ടവും ആവശ്യപ്പെടുന്ന സംവിധാനമാണ്. സാധാരണയായി യൂസർനെയിം അല്ലെങ്കിൽ ഇമെയിൽ ഐഡിയും പാസ്‌വേഡും നൽകി അക്കൗണ്ടിൽ പ്രവേശിക്കാം. എന്നാൽ 2FA സജ്ജമാക്കിയാൽ പുതിയ ഡിവൈസുകളിൽ നിന്ന് ലോഗിൻ ചെയ്യുമ്പോൾ ഇൻസ്റ്റഗ്രാം പ്രത്യേക സുരക്ഷാ കോഡ് ആവശ്യപ്പെടും. ഇതിലൂടെ പാസ്‌വേഡ് മറ്റൊരാളുടെ കൈയിലെത്തിയാലും അക്കൗണ്ടിൽ പ്രവേശിക്കാൻ സാധിക്കില്ല.

ഇൻസ്റ്റഗ്രാം ഉപയോക്താക്കൾക്ക് രണ്ട് പ്രധാന രീതികളിലാണ് ഈ സുരക്ഷാ സംവിധാനം നൽകുന്നത്. ഒന്നാമത്തേത് തേർഡ് പാർട്ടി ഓതന്‍റിക്കേഷൻ ആപ്പുകൾ ഉപയോഗിക്കുന്ന രീതിയാണ്. രണ്ടാമത്തേത് എസ്‌എം‌എസ് അല്ലെങ്കിൽ വാട്‌സ്ആപ്പ് വഴി സുരക്ഷാ കോഡ് സ്വീകരിക്കുന്ന സംവിധാനമാണ്. കമ്പനി ഉപയോക്താക്കളോട് കൂടുതൽ സുരക്ഷയ്ക്കായി ഓതന്‍റിക്കേഷൻ ആപ്പുകൾ തിരഞ്ഞെടുക്കാനാണ് നിർദേശിക്കുന്നത്. കാരണം ഈ ആപ്പുകളിൽ ലഭിക്കുന്ന കോഡുകൾ ഏതാനും മിനിറ്റുകൾക്കൊരിക്കൽ അപ്‍ഡേറ്റ് ചെയ്യപ്പെടും എന്നതിനാൽ സുരക്ഷ കൂടുതൽ ഉറപ്പാക്കാനാകും.

ഗൂഗിൾ ഓതന്‍റിക്കേറ്റർ, ഡ്യുവോ മൊബൈൽ പോലുള്ള ആപ്പുകൾ ഇതിനായി ഉപയോഗിക്കാം. ഉപയോക്താവിന്‍റെ ഫോൺ ഹാക്കർമാർക്ക് വിദൂരത്തിൽ ഇരുന്ന് നിയന്ത്രിക്കാൻ കഴിഞ്ഞാൽ എസ്‌എം‌എസ് അല്ലെങ്കിൽ വാട്‌സ്ആപ്പ് വഴി ലഭിക്കുന്ന കോഡുകൾ ദുരുപയോഗം ചെയ്യാനുള്ള സാധ്യത ഉണ്ടാകാം. എങ്കിലും ഓരോ ലോഗിൻ ശ്രമത്തിനും ഇൻസ്റ്റഗ്രാം പുതിയ കോഡുകളാണ് നൽകുന്നത്. അതിനാൽ പഴയ കോഡ് ഉപയോഗിച്ച് അക്കൗണ്ടിൽ പ്രവേശിക്കാൻ കഴിയില്ല.

ഇന്‍സ്റ്റയില്‍ ടു-ഫാക്‌ടർ ഓതന്‍റിക്കേഷൻ എങ്ങനെ സെറ്റ് ചെയ്യാം

ടു-ഫാക്‌ടർ ഓതന്‍റിക്കേഷൻ പ്രവർത്തനക്ഷമമാക്കാൻ ആദ്യം ഇൻസ്റ്റഗ്രാം ആപ്പ് തുറന്ന് അക്കൗണ്ടിൽ ലോഗിൻ ചെയ്യണം. തുടർന്ന് പ്രൊഫൈൽ ചിത്രത്തിൽ ക്ലിക്ക് ചെയ്‌ത് പ്രൊഫൈൽ പേജിലേക്ക് പോകണം. സ്ക്രീനിന്‍റെ മുകളില്‍ മൂന്ന് വരകളുള്ള മെനു തുറന്ന് സെറ്റിംഗ്‍സ് ആൻഡ് ആക്റ്റിവിറ്റി വിഭാഗത്തിലേക്ക് പ്രവേശിക്കാം. അവിടെ അക്കൗണ്ട്സ് സെന്‍റർ തിരഞ്ഞെടുക്കണം. ശേഷം പാസ്‍വേർഡ് സെക്യൂരിറ്റി ഓപ്ഷനിൽ പ്രവേശിച്ച് ടു-ഫാക്‌ടർ ഓതന്‍റിക്കേഷൻ തിരഞ്ഞെടുക്കണം.

തുടർന്ന് സുരക്ഷ സജ്ജമാക്കേണ്ട അക്കൗണ്ട് തിരഞ്ഞെടുക്കാം. അവിടെ ഓതന്‍റിക്കേഷൻ ആപ്പ് അല്ലെങ്കിൽ എസ്എംഎസ്/വാട്‍സ്ആപ്പ് എന്നീ ഓപ്ഷനുകളിൽ ഏതെങ്കിലും തിരഞ്ഞെടുക്കാൻ സാധിക്കും. ഓതന്‍റിക്കേഷൻ ആപ്പ് തിരഞ്ഞെടുക്കുമ്പോൾ ഇൻസ്റ്റഗ്രാം പ്രത്യേക സുരക്ഷാ കീ അല്ലെങ്കിൽ ക്യുആർ കോഡ് നൽകും. അത് ബന്ധപ്പെട്ട ആപ്പിൽ ചേർത്താൽ ആപ്പ് ആറ് അക്ക കോഡ് സൃഷ്‍ടിക്കും. ഈ കോഡ് ഉപയോഗിച്ചാണ് ഭാവിയിൽ ലോഗിൻ സാധ്യമാകുക.

എസ്‌എം‌എസ് അല്ലെങ്കിൽ വാട്‌സ്ആപ്പ് മാർഗം തിരഞ്ഞെടുക്കുന്നവർ മൊബൈൽ നമ്പർ നൽകണം. തുടർന്ന് ലഭിക്കുന്ന ആറക്ക കോഡ് ഇൻസ്റ്റഗ്രാമിൽ നൽകുന്നതോടെ ടു-ഫാക്‌ടർ ഓതന്‍റിക്കേഷൻ സജ്ജമാകും. ഇനി മുതൽ പുതിയ ഡിവൈസുകളിൽ നിന്ന് അക്കൗണ്ടിൽ പ്രവേശിക്കാൻ ശ്രമിക്കുമ്പോഴെല്ലാം ഇൻസ്റ്റഗ്രാം സുരക്ഷാ കോഡ് ആവശ്യപ്പെടും.

സൈബർ ആക്രമണങ്ങളും ഓൺലൈൻ തട്ടിപ്പുകളും വർധിക്കുന്ന സാഹചര്യത്തിൽ സോഷ്യൽ മീഡിയ അക്കൗണ്ടുകൾക്ക് അധിക സുരക്ഷ ഉറപ്പാക്കുന്നത് അത്യാവശ്യമായി മാറിയിരിക്കുകയാണ്. അതിനാൽ ഇൻസ്റ്റഗ്രാം ഉൾപ്പെടെയുള്ള എല്ലാ പ്രധാന പ്ലാറ്റ്‌ഫോമുകളിലും ടു-ഫാക്‌ടർ ഓതന്‍റിക്കേഷൻ പ്രവർത്തനക്ഷമമാക്കണമെന്ന് സൈബർ സുരക്ഷാ വിദഗ്‌ധർ നിർദേശിക്കുന്നു.