'അത്തരം സന്ദേശങ്ങളോട് പ്രതികരിക്കരുത്, സംഗതി തട്ടിപ്പാണ്'; മുന്നറിയിപ്പ്
Synopsis
ഇത്തരം മെസേജുകളോട് പ്രതികരിച്ചാല് സോഷ്യല്മീഡിയ പ്രൊഫൈല് ഹാക്ക് ചെയ്യപ്പെടാന് സാധ്യതയുണ്ടെന്ന് പൊലീസ്.
സോഷ്യല്മീഡിയ പ്രൊഫൈലുകള് വെരിഫൈ ചെയ്ത് ബ്ലൂ ടിക് വെരിഫിക്കേഷന് സൗജന്യമായി നല്കുമെന്ന പേരില് സന്ദേശങ്ങള് ലഭിച്ചാല് ശ്രദ്ധിക്കണമെന്ന് കേരളാ പൊലീസിന്റെ മുന്നറിയിപ്പ്. അത്തരം സന്ദേശം ലഭിച്ചാല് പ്രതികരിക്കരുതെന്നും പ്രതികരിച്ചാല് സോഷ്യല്മീഡിയ പ്രൊഫൈല് ഹാക്ക് ചെയ്യപ്പെടാന് സാധ്യതയുണ്ടെന്നും പൊലീസ് അറിയിച്ചു.
''ഫേസ്ബുക്, ഇന്സ്റ്റാഗ്രാം പ്രൊഫൈല് വെരിഫൈ ചെയ്ത് ബ്ലൂ ടിക് വെരിഫിക്കേഷന് സൗജന്യമായി ചെയ്തു നല്കുന്നു എന്ന രീതിയില്
നിങ്ങള്ക്ക് സന്ദേശം ലഭിച്ചിട്ടുണ്ടോ?. എങ്കില് പ്രതികരിക്കേണ്ട. സംഗതി തട്ടിപ്പാണ്. വ്യാജലിങ്കുകള് ഉള്പ്പെടുത്തിയ സന്ദേശം മെസ്സേജ് ആയോ നോട്ടിഫിക്കേഷന് ആയോ വരാം. ഇത്തരം വ്യാജ വെബ്സൈറ്റുകള് ഉപഭോക്താക്കളുടെ യൂസര് ഇന്ഫര്മേഷന്, ആക്റ്റീവ് സെഷന് എന്നിവ ഹാക്ക് ചെയ്യുന്ന രീതിയില് നിര്മിച്ചവ ആയിരിക്കും. ഇത്തരം മെസ്സേജുകളോട് പ്രതികരിച്ചാല് നിങ്ങളുടെ സോഷ്യല്മീഡിയ പ്രൊഫൈല് ഹാക്ക് ചെയ്യപ്പെടാന് സാധ്യതയുണ്ട്. സോഷ്യല് മീഡിയ ഉപഭോക്താക്കള് ഇത്തരം വ്യാജ മെസ്സേജുകളോട് പ്രതികരിക്കാതിരിക്കാന് പ്രത്യേകം ശ്രദ്ധിക്കേണ്ടതാണ്. ''പൊലീസ് പറഞ്ഞു.
സാമൂഹികമാധ്യമങ്ങളിലെ വ്യാജപ്രചാരണം: 54 കേസുകള് രജിസ്റ്റര് ചെയ്തു
കൊച്ചി: കളമേശരി ബോംബ് സ്ഫോടനത്തെ തുടര്ന്ന് മതവിദ്വേഷം വളര്ത്തുന്ന രീതിയിലും സമുദായിക സൗഹാര്ദ്ദം തകര്ക്കുന്ന തരത്തിലും സാമൂഹികമാധ്യമങ്ങളിലൂടെ സന്ദേശങ്ങളും വാര്ത്തകളും പ്രചരിപ്പിച്ചതിന് സംസ്ഥാനത്തൊട്ടാകെ 54 കേസുകള് രജിസ്റ്റര് ചെയ്തു. ഏറ്റവും കൂടുതല് കേസുകള് രജിസ്റ്റര് ചെയ്തത് മലപ്പുറം ജില്ലയിലാണ്, 26 എണ്ണം. എറണാകുളം സിറ്റിയില് 10, എറണാകുളം റൂറലിലും തിരുവനന്തപുരം സിറ്റിയിലും അഞ്ച് വീതം കേസുകളുമാണ് ഉള്ളത്. തൃശൂര് സിറ്റിയിലും കോട്ടയത്തും രണ്ടുവീതവും പത്തനംതിട്ട, ആലപ്പുഴ, പാലക്കാട്, കോഴിക്കോട് റൂറല് ജില്ലകളില് ഒന്നു വീതവും കേസുകള് രജിസ്റ്റര് ചെയ്തിട്ടുണ്ടെന്ന് പൊലീസ് അറിയിച്ചു.
മതവിദ്വേഷം വളര്ത്തുന്ന തരത്തിലും മറ്റും വിവിധ സാമൂഹികമാധ്യമങ്ങളിലൂടെ സന്ദേശങ്ങള് നല്കുകയും പങ്കുവയ്ക്കുകയും ചെയ്ത നിരവധി വ്യാജ പ്രൊഫൈലുകളും പൊലീസ് കണ്ടെത്തിയിട്ടുണ്ട്. വ്യാജ പ്രൊഫൈലുകള് നിര്മ്മിച്ചവര്ക്കെതിരെ നടപടി സ്വീകരിക്കുന്നതിന് അവര് ഉപയോഗിച്ച ഐ.പി വിലാസം കണ്ടെത്തി നല്കാന് ഫെയ്സ്ബുക്ക്, ഇന്സ്റ്റഗ്രാം, എക്സ്, വാട്സാപ്പ് തുടങ്ങിയ സാമൂഹികമാധ്യമ സ്ഥാപനങ്ങള്ക്ക് നിര്ദ്ദേശം നല്കി. ഇത്തരം സന്ദേശം പ്രചരിപ്പിക്കുന്നവരെ കണ്ടെത്തുന്നതിനും തുടര്നടപടി സ്വീകരിക്കുന്നതിനുമായി എല്ലാ ജില്ലകളിലെയും സൈബര് സെല് വിഭാഗത്തില് 24 മണിക്കൂറും പ്രവര്ത്തിക്കുന്ന പ്രത്യേക സംഘങ്ങളെ ചുമതലപ്പെടുത്തിയിട്ടുണ്ട്. സ്ഫോടനത്തെത്തുടര്ന്ന് വ്യാജസന്ദേശങ്ങള് നിര്മ്മിക്കുകയും സാമൂഹികമാധ്യമങ്ങള് വഴി പ്രചരിപ്പിക്കുകയും ചെയ്യുന്നവരെ കണ്ടെത്താന് മുഖ്യമന്ത്രിയും സംസ്ഥാന പൊലീസ് മേധാവിയും പ്രത്യേകനിര്ദ്ദേശം നല്കിയിരുന്നു. ഇതിന്റെ അടിസ്ഥാനത്തില് സമൂഹികമാധ്യമങ്ങളിലെ സൈബര് പട്രോളിങ്ങും മറ്റ് നിയമനടപടികളും തുടര്ന്നുവരികയാണെന്നും പൊലീസ് അറിയിച്ചു.
'ലീഗിന് പിന്നാലെ സിപിഎം നടക്കുന്നത് ആത്മവിശ്വാസം നഷ്ടമായതിനാല്': സിപിഎമ്മിനെതിരെ സതീശന്
ഏറ്റവും പുതിയ Technology News മലയാളത്തിൽ അറിയാൻ ഏഷ്യാനെറ്റ് ന്യൂസ് മലയാളം ഒപ്പമിരിക്കുക. Mobile Reviews in Malayalam ,New Gadgets, AI പോലുള്ള പുതുപുത്തൻ സാങ്കേതിക നവീകരണങ്ങൾ തുടങ്ങി ടെക് ലോകത്തിലെ എല്ലാ പ്രധാന അപ്ഡേറ്റുകളും ഇവിടെ അറിയാം