ഏറ്റവും കൂടുതൽ എച്ച്-1ബി വിസകൾ സ്പോൺസർ ചെയ്യുന്ന അഞ്ച് ടെക് ഭീമന്മാർ ഇവര്‍, പട്ടികയില്‍ ഒരു ഇന്ത്യന്‍ കമ്പനിയും

ഡോണള്‍ഡ് ട്രംപിന്‍റെ പുത്തന്‍ ഉത്തരവോടെ എച്ച്-1ബി വിസ അനുവദിക്കുന്നത് പ്രതിസന്ധിയില്‍. യുഎസില്‍ ഏറ്റവും കൂടുതൽ എച്ച്-1ബി വിസകൾ സ്പോൺസർ ചെയ്യുന്ന അഞ്ച് ടെക് ഭീമന്മാർ ഏതൊക്കെയാണ്? ഈ പട്ടികയില്‍ ഒരു ഇന്ത്യന്‍ കമ്പനിക്കും ഇടമുണ്ട്. 

വാഷിംഗ്‌ടണ്‍: ആമസോൺ, മൈക്രോസോഫ്റ്റ്, ആപ്പിൾ തുടങ്ങിയ അമേരിക്കൻ ടെക് ഭീമന്മാർ ഇന്ത്യയിൽ നിന്നുള്ള മികച്ച ടെക്കികളെ നിയമിക്കുന്നതിൽ പ്രശസ്‍തരാണ്. അമേരിക്കൻ ജീവനക്കാരേക്കാൾ കുറഞ്ഞ ചെലവിൽ കൂടുതൽ കഴിവുള്ള പ്രൊഫഷണലുകളെ നിയമിക്കുന്നതിനാണ് ഈ കമ്പനികൾ എച്ച്-1ബി വിസ പ്രോഗ്രാം ഉപയോഗിച്ചത്. എന്നാൽ പുതിയ എച്ച്-1ബി വിസകൾക്ക് പ്രതിവർഷം 100,000 ഡോളർ ഫീസ് ഈടാക്കാനുള്ള അമേരിക്കൻ പ്രസിഡന്‍റ് ഡോണള്‍ഡ് ട്രംപിന്‍റെ ഏറ്റവും പുതിയ തീരുമാനം ടെക് വ്യവസായത്തിൽ ഞെട്ടലുണ്ടാക്കി.

എച്ച്-1ബി വിസ പ്രതിസന്ധി

യുഎസ് തൊഴിൽ വകുപ്പ് വ്യക്തമാക്കിയതുപോലെ, പ്രത്യേക വൈദഗ്ധ്യവും കുറഞ്ഞത് ഒരു ബാച്ചിലേഴ്‌സ് ബിരുദവും ആവശ്യമുള്ള തസ്‍തികകളിലേക്ക് വിദേശ തൊഴിലാളികളെ നിയമിക്കാൻ എച്ച്-1ബി വിസ പ്രോഗ്രാം അമേരിക്കൻ തൊഴിലുടമകളെ അനുവദിക്കുന്നു. വിദേശ ജീവനക്കാർക്ക് എച്ച്1-ബി വിസ ഉറപ്പാക്കാൻ, യുഎസ് ടെക് കമ്പനികൾ ഇപ്പോൾ സർക്കാരിന് 100,000 ഡോളർ നൽകേണ്ടിവരും. എച്ച്-1ബി വിസ ഉടമകളിൽ ഏകദേശം 70% വരുന്ന യുഎസിലെ ഇന്ത്യൻ പ്രവാസികൾക്ക് ഈ നീക്കം പ്രത്യേകിച്ച് ദോഷകരമാണ്.

ഏറ്റവും കൂടുതൽ വിദേശ ജീവനക്കാരെ നിയമിക്കുന്ന ടെക് കമ്പനികൾ ഏതൊക്കെയാണ് എന്ന ചിലർക്കെങ്കിലും സംശയം ഉണ്ടാകും. മാത്രമല്ല, എച്ച്-1ബി വിസകൾ നേടുന്നതിന് ആരാണ് ഇനി വലിയ തുക നൽകേണ്ടിവരിക? യുഎസ് ഫെഡറൽ ഡാറ്റ പ്രകാരം, ഏറ്റവും കൂടുതൽ എച്ച്-1ബി വിസകൾ സ്പോൺസർ ചെയ്യുന്ന മികച്ച അഞ്ച് കമ്പനികളുടെ പട്ടിക ഇതാ:

1. ആമസോൺ ഡോട്ട് കോം സർവീസസ് എൽഎൽസി- 10,044 H1-B വിസ ഉടമകൾ

2. ടാറ്റ കൺസൾട്ടൻസി സർവീസസ് എൽഎൽസി- 5,505 വിസ ഉടമകൾ

3. മൈക്രോസോഫ്റ്റ് കോർപ്പറേഷൻ- 5,189 വിസ ഉടമകൾ

4. മെറ്റ പ്ലാറ്റ്‌ഫോമുകൾ- 5,123 വിസ ഉടമകൾ

5. ആപ്പിൾ ഇൻ‌കോർപ്പറേറ്റഡ്- 4,202 വിസ ഉടമകൾ

എച്ച്-1ബി വിസക്കാർക്ക് ഭാവിയിൽ കൂടുതൽ പ്രശ്‌നങ്ങൾ ഉണ്ടാകുമോ?

2026 സാമ്പത്തിക വർഷത്തേക്ക് നിർബന്ധമാക്കിയ 65,000 എച്ച്-1ബി വിസ റെഗുലർ ക്യാപ്പിലും മാസ്റ്റേഴ്‌സ് ക്യാപ്പ് എന്നറിയപ്പെടുന്ന 20,000 എച്ച്-1ബി വിസ യുഎസ് അഡ്വാൻസ്‍ഡ് ഡിഗ്രി ഇളവിലും എത്താൻ ആവശ്യമായ അപേക്ഷകൾ ലഭിച്ചതായി ജൂലൈയിൽ യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) പറഞ്ഞിരുന്നു. 'ചില കുടിയേറ്റക്കാരല്ലാത്ത തൊഴിലാളികളുടെ പ്രവേശന നിയന്ത്രണം' എന്ന പ്രഖ്യാപനത്തിൽ ഡോണള്‍ഡ് ട്രംപ് ഒപ്പുവെച്ചതോടെ, എച്ച്-1ബി അപേക്ഷകൾക്കൊപ്പം 100,000 യുഎസ് ഡോളർ പേയ്‌മെന്‍റോ അനുബന്ധമായോ നൽകിയില്ലെങ്കിൽ, കുടിയേറ്റക്കാരല്ലാത്ത വ്യക്തികൾക്ക് അമേരിക്കയിലേക്ക് പ്രവേശിക്കാൻ സാധിക്കില്ല.