മധ്യപ്രദേശിൽ 25,640 കോടി രൂപ നിക്ഷേപിക്കാന്‍ ടെക് കമ്പനികൾ; 183,000 തൊഴിലവസരങ്ങൾ സൃഷ്‍ടിക്കും

വിവിധ സാങ്കേതിക മേഖലകളിലായി സംസ്ഥാനം മൊത്തം 25,640 കോടി രൂപയുടെ നിക്ഷേപം നേടിയെന്ന് മധ്യപ്രദേശ് സര്‍ക്കാര്‍ 

ഭോപ്പാല്‍: മധ്യപ്രദേശിൽ 1.83 ലക്ഷത്തിലധികം തൊഴിലവസരങ്ങൾ സൃഷ്‍ടിക്കുന്നതിന് കാരണമാകുന്ന 25,640 കോടി രൂപയുടെ നിക്ഷേപിത്തിന് വിവിധ മേഖലകളിലെ ടെക് കമ്പനികൾ.  ജിഐഎസ് 2025ലെ ഐടി, ടെക്നോളജി ഉച്ചകോടിയിൽ 35 സ്ഥാപനങ്ങളിൽ നിന്ന് നിക്ഷേപം ലഭിച്ചെന്നും വിവിധ സാങ്കേതിക മേഖലകളിലായി സംസ്ഥാനം മൊത്തം 25,640 കോടി രൂപയുടെ നിക്ഷേപം നേടിയെന്നും ഇത് ഏകദേശം 1,83,400 തൊഴിലവസരങ്ങൾ സൃഷ്ടിക്കുന്നതായും മധ്യപ്രദേശ് സർക്കാർ കഴിഞ്ഞദിവസം പുറത്തിറക്കിയ പ്രസ്‍താവനയിൽ വ്യക്തമാക്കിയതായി പിടിഐ റിപ്പോര്‍ട്ട് ചെയ്തു.

ഇലക്ട്രോണിക്സ് നിർമ്മാണ മേഖലയിൽ എട്ട് സ്ഥാപനങ്ങൾ 12,350 കോടി രൂപയുടെ പ്രധാന നിക്ഷേപ വാഗ്‍ദാനങ്ങൾ നൽകിയിട്ടുണ്ട്, ഇവ 14,000 പേർക്ക് തൊഴിൽ നൽകുമെന്ന് വാഗ്ദാനം ചെയ്യുന്നു. 5,500 കോടി രൂപയുടെ നിക്ഷേപത്തോടെ, 93,000 തൊഴിലവസരങ്ങളിലൂടെ സംസ്ഥാനത്തെ ഏറ്റവും വലിയ തൊഴിലവസരങ്ങൾ സൃഷ്ടിക്കുന്ന സ്ഥാപനമായി ഐടി, ഐടിഇ സ്ഥാപനങ്ങൾ മാറുമെന്ന് വാഗ്ദാനം ചെയ്തിട്ടുണ്ട്, തുടർന്ന് ജിസിസി (ഗ്ലോബൽ കാപ്പിറ്റാലിറ്റി സെന്ററുകൾ) 700 കോടി രൂപയുടെ നിക്ഷേപത്തിലൂടെ സംസ്ഥാനത്ത് 40,500 തൊഴിലവസരങ്ങൾ സൃഷ്ടിക്കും.

ലോകോത്തര അടിസ്ഥാന സൗകര്യങ്ങളും വൈദഗ്ധ്യമുള്ള പ്രതിഭകളുടെ ഒരു സംഘവും കൊണ്ട് മധ്യപ്രദേശ് ആവേശകരമായ ഒരു ഘട്ടത്തിലാണെന്നും ആംബർ, എൽസിന, പ്രഖാർ, എസ്‍ടിഡിഎൽ, തോലോൺസ്, കെയ്‌ൻസ്, ബിയോണ്ട് സ്റ്റുഡിയോസ്, ഐഐടിഐ ദൃഷ്‍ടി തുടങ്ങിയ കമ്പനികളുടെ വലിയ പ്രഖ്യാപനങ്ങൾ സംസ്ഥാനത്തെ നിക്ഷേപകരുടെ വർധിച്ചുവരുന്ന ആത്മവിശ്വാസത്തെ പ്രതിഫലിപ്പിക്കുന്നുവെന്നും മധ്യപ്രദേശ് മുഖ്യമന്ത്രി മോഹൻ യാദവ് പ്രസ്‍താവനയിൽ പറഞ്ഞു.

ഭോപ്പാലിലെ ഐടി പാർക്കിൽ 1,650 തൊഴിലവസരങ്ങൾ സൃഷ്ടിക്കുന്ന എസ്എംടി നിർമ്മാണത്തിനായി കെയ്‌ൻസ് ടെക്‌നോളജി 352 കോടി രൂപ വാഗ്ദാനം ചെയ്തു, അതേസമയം ബിയോണ്ട് സ്റ്റുഡിയോസ് 2,500 പേർക്ക് തൊഴിൽ നൽകുന്ന 100 കോടി രൂപയുടെ നിക്ഷേപത്തോടെ എവിജിസി മേഖലയെ ശക്തിപ്പെടുത്തി. സ്റ്റാർട്ടപ്പ് ആവാസവ്യവസ്ഥ മെച്ചപ്പെടുത്തുന്നതിനായി ഐഐടിഐ ദ്രിഷ്ടി സിപിഎസ് ഫൗണ്ടേഷൻ പുതിയ ഇൻകുബേഷൻ സെന്റർ പ്രഖ്യാപിച്ചു.

ജിസിസി നിക്ഷേപങ്ങൾക്കായി തോലോൺസ് ഇൻ‌കോർപ്പറേറ്റഡ് 500 കോടി രൂപയും എഫ്ഡിഐയിൽ 5,000 കോടി രൂപയും വാഗ്ദാനം ചെയ്തു, ഇത് 40,000 തൊഴിലവസരങ്ങൾ സൃഷ്ടിക്കുന്നതിലേക്ക് നയിക്കുന്നു.  ശ്രീ ടെക് ഡാറ്റ ലിമിറ്റഡ് ജിസിസി, ഡാറ്റാ സെന്ററുകൾ എന്നിവയ്ക്കായി 4,000 കോടി രൂപ വാഗ്ദാനം ചെയ്തു. അതുവഴി 2,000 തൊഴിലവസരങ്ങൾ സൃഷ്‍ടിക്കും.

ഡ്രോൺ കമ്പനിയായ പ്രഖാർ സോഫ്റ്റ്‌വെയർ സൊല്യൂഷൻ ലിമിറ്റഡ് 145 കോടി രൂപയുടെ നിക്ഷേപം പ്രഖ്യാപിച്ചു, ഇത് 10,000 തൊഴിലവസരങ്ങൾ സൃഷ്ടിക്കും. ഇലക്ട്രോണിക്സ് വ്യവസായ സംഘടനയായ എൽസിന, പ്രിന്റഡ് സർക്യൂട്ട് ബോർഡിലും ഇലക്ട്രോണിക്സ് നിർമ്മാണത്തിലും 1,000-1,200 കോടി രൂപയുടെ മുന്നേറ്റത്തിന് നേതൃത്വം നൽകി, ഇത് 5,000 തൊഴിലവസരങ്ങൾ സൃഷ്ടിക്കും. ഡിജിറ്റൽ കൺവെർജൻസ് ടെക്നോളജീസ് ജിസിസിയിൽ 200 കോടി രൂപ നിക്ഷേപിക്കുമെന്നും ഇത് 500 തൊഴിലവസരങ്ങൾ സൃഷ്‍ടിക്കുമെന്നും സംസ്ഥാന സർക്കാർ പ്രസ്‍താവനയിൽ പറയുന്നു.

കൂടാതെ സംസ്ഥാനത്തെ ഐടി, ഇലക്ട്രോണിക്സ് സിസ്റ്റം മെച്ചപ്പെടുത്തുന്നതിനായി ഐബിഎം, ബാർക്ലേസ്, മൈക്രോസോഫ്റ്റ്, വിഎൽഎസ്ഐ, എൽ ആൻഡ് ടി എഡ്യൂടെക് തുടങ്ങിയ ആഗോള സാങ്കേതിക പ്രമുഖരുമായി സംസ്ഥാനം പ്രധാന ധാരണാപത്രങ്ങളിൽ ഒപ്പുവച്ചു. ആറ് സ്ഥാപനങ്ങൾ ഡാറ്റാ സെന്‍റുകൾക്കായി 2,900 തൊഴിലവസരങ്ങൾ വാഗ്ദാനം ചെയ്ത് 6,800 കോടി വാഗ്ദാനം ചെയ്തിട്ടുണ്ടെന്ന് സംസ്ഥാന സർക്കാർ പറയുന്നു. അതേസമയം എവിജിസി മേഖലയിലെ ആറ് സ്ഥാപനങ്ങൾ 110 കോടി രൂപ വാഗ്ദാനം ചെയ്ത് 3,000 തൊഴിലവസരങ്ങൾ സൃഷ്‍ടിച്ചുവെന്നും സംസ്ഥാന സർക്കാർ പറയുന്നു. 

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം