നീണ്ട കാത്തിരിപ്പിന് അവസാനം; ഇനി ഒരു ഐഫോണിൽ നിന്ന് രണ്ട് വാട്‌സ്ആപ്പ് അക്കൗണ്ടുകൾ അനായാസം ഉപയോഗിക്കാം

ഒരു ഐഫോണില്‍ രണ്ട് വാട്‌സ്ആപ്പ് അക്കൗണ്ടുകള്‍ ചേര്‍ക്കാന്‍ കഴിയുന്ന ഫീച്ചറിന്‍റെ ബീറ്റ ടെസ്റ്റിംഗ് തുടങ്ങി. ആന്‍ഡ്രോയ്‌ഡ് സ്‌മാര്‍ട്ട്‌ഫോണ്‍ ഉപയോക്താക്കള്‍ക്ക് ഏറെക്കാലം മുമ്പേ ലഭിച്ച സവിശേഷതയാണിത്. 

കാലിഫോര്‍ണിയ: ഐഫോൺ ഉപയോക്താക്കൾക്കായി വാട്‌സ്ആപ്പ് ഒരു പുതിയ സവിശേഷത അവതരിപ്പിക്കുന്നു. ഈ പുതിയ ഫീച്ചർ ഒരു ഐഫോണിൽ നിന്നും ഒന്നിലധികം വാട്‌സ്ആപ്പ് അക്കൗണ്ടുകൾ പ്രവർത്തിപ്പിക്കുന്നത് എളുപ്പമാക്കുന്നു. ഈ അപ്‌ഡേറ്റ് ഐഒഎസിന്‍റെ ഏറ്റവും പുതിയ ബീറ്റാ പതിപ്പിൽ ലഭ്യമാണ്. ഉടൻ തന്നെ എല്ലാ ഉപയോക്താക്കളിലേക്കും എത്തും. നിങ്ങൾക്ക് പ്രത്യേക വ്യക്തിഗത, പ്രൊഫഷണൽ വാട്‌സ്ആപ്പ് നമ്പറുകൾ ഉണ്ടെങ്കിൽ അവ രണ്ടും ഒരു ഐഫോണില്‍ ക്രമീകരിക്കാന്‍ നിങ്ങൾക്ക് മികച്ച ഓപ്ഷനാണ് ഇപ്പോള്‍ വന്നിരിക്കുന്ന ഫീച്ചര്‍. ആന്‍ഡ്രോയ്‌ഡ് ഫോണുകളില്‍ ഇരട്ട വാട്‌സ്ആപ്പ് അക്കൗണ്ട് ക്രമീകരിക്കാനുള്ള ഫീച്ചര്‍ ഏറെക്കാലം മുമ്പുതന്നെ പ്രത്യക്ഷപ്പെട്ടിരുന്നു.

ഒരു ഐഫോണില്‍ രണ്ട് വാട്‌സ്ആപ്പ് അക്കൗണ്ട് ചേര്‍ക്കാം

ഐഫോണുകളിലെ വാട്‌സ്ആപ്പ് സെറ്റിംഗ്‍സിൽ അക്കൗണ്ട് ലിസ്റ്റ് എന്നൊരു പുതിയ ഓപ്ഷന്‍ പ്രത്യക്ഷപ്പെടും. ഇത് കൂടാതെ ക്യുആർ കോഡ് ഐക്കണിന് അടുത്തായി ഒരു + ബട്ടണും പ്രത്യക്ഷപ്പെടും. ഇതുവഴി രണ്ടാമതൊരു വാട്‌സ്ആപ്പ് അക്കൗണ്ട് ക്രിയേറ്റ് ചെയ്യാം. ഇത് രണ്ട് ഫോണുകളില്ലാതെ തന്നെ ഒറ്റ ഐഫോണില്‍ രണ്ട് വാട്‌സ്ആപ്പ് നമ്പറുകള്‍ ഉപയോഗിക്കുന്നതും ഈ അക്കൗണ്ടുകള്‍ പരസ്‍പരം സ്വിച്ച് ചെയ്യുന്നതും എളുപ്പമാക്കുന്നു. വാട്‌സ്ആപ്പിലെ ഓരോ അക്കൗണ്ടിനും അതിന്‍റേതായ ചാറ്റ് ഹിസ്റ്ററി, ബാക്കപ്പുകൾ, പ്രൈവസി സെറ്റിംഗ്‍സുകൾ എന്നിവ ഉണ്ടായിരിക്കും. വാട്‌സ്ആപ്പിലേക്ക് ഒരു സന്ദേശം വരുമ്പോൾ, അത് ഏത് അക്കൗണ്ടിലേക്കാണെന്ന് നോട്ടിഫിക്കേഷനിൽ സൂചിപ്പിക്കും.

അക്കൗണ്ടുകൾ മാറുമ്പോൾ ലോക്കിംഗ് (ഫേസ് ഐഡി, പാസ്‌കോഡ്) ഓപ്ഷനുകള്‍ ആപ്പ് പിന്തുണയ്ക്കും. ഇത് സുരക്ഷ ഉറപ്പാക്കും. ഈ ഫീച്ചര്‍ നിലവിൽ ഐഫോണ്‍ ഉപയോക്താക്കളിൽ പരീക്ഷിച്ചുവരികയാണ്. കൂടുതൽ വിപുലമായ ലോഞ്ച് തീയതി ഇതുവരെ സ്ഥിരീകരിച്ചിട്ടില്ല. പല ഐഫോൺ ഉപയോക്താക്കളും രണ്ട് നമ്പറുകൾ, അതായത് വ്യക്തിപരവും ജോലിസംബന്ധവുമായവ ഉപയോഗിക്കുന്നുണ്ട്. അങ്ങനെയുള്ളവര്‍ക്ക് ഇനി വാട്‌സ്ആപ്പ് ബിസിനസ് പോലുള്ള പ്രത്യേക ആപ്പുകളുടെ ആവശ്യകതയില്ല. രണ്ട് വാട്‌സ്ആപ്പ് അക്കൗണ്ടുകള്‍ തമ്മില്‍ സ്വിച്ചിംഗ് സുഗമമായിരിക്കും. അക്കൗണ്ട് സെറ്റിംഗ്‍സുകൾ കൂടിക്കലരുകയുമില്ല. ഓരോ അക്കൗണ്ടും അതിന്‍റേതായ ഐഡന്‍റിറ്റി നിലനിർത്തും. ഈ ഫീച്ചര്‍ വാട്‌സ്ആപ്പ് ഉപയോക്താക്കൾക്ക് കൂടുതൽ നിയന്ത്രണവും ഉപയോഗിക്കാൻ അനായാസതയും ഉറപ്പാക്കും.

പുത്തന്‍ ഫീച്ചര്‍ എല്ലാ ഐഫോണ്‍ ഉപയോക്താക്കള്‍ക്കും ഉടന്‍

ഈ ഫീച്ചർ നിലവിൽ ബീറ്റ ടെസ്റ്റിംഗിലാണെന്ന് വാട്‌സ്ആപ്പ് ട്രാക്കറായ വാബീറ്റ ഇൻഫോ റിപ്പോർട്ട് ചെയ്യുന്നു. അതായത് എല്ലാ ഐഫോൺ ഉപയോക്താക്കൾക്കും ഇപ്പോൾ അവരുടെ ഫോണുകളിൽ ഈ ഫീച്ചർ ഉണ്ടായിരിക്കണമെന്നില്ല. വരും ആഴ്‌ചകളില്‍ തന്നെ, രണ്ട് വാട്‌സ്ആപ്പ് അക്കൗണ്ടുകള്‍ ഒരു ഐഫോണില്‍ ക്രമീകരിക്കാനാവുന്ന ഫീച്ചര്‍ എല്ലാ ഉപയോക്താക്കള്‍ക്കും ലഭ്യമാകും.