21 വർഷം കാത്തിരുന്ന ആ നിമിഷം! മാതാപിതാക്കൾക്കൊപ്പം ആദ്യ വിമാനയാത്ര നടത്തി യുവതി; ഹൃദയം തൊട്ട് വീഡിയോ

21 വർഷത്തെ കാത്തിരിപ്പിനൊടുവിൽ മാതാപിതാക്കൾക്കൊപ്പം ആദ്യമായി വിമാനയാത്ര നടത്തിയ നിധി സിങ് എന്ന യുവതിയുടെ വീഡിയോ സമൂഹ മാധ്യമങ്ങളിൽ ശ്രദ്ധനേടുന്നു. തന്നെ നടക്കാൻ പഠിപ്പിച്ച മാതാപിതാക്കൾക്ക് പുതിയൊരു അനുഭവം സമ്മാനിക്കാൻ കഴിഞ്ഞതിലെ സന്തോഷമാണ് നിധി പങ്കുവെക്കുന്നത്. ഈ വൈകാരിക നിമിഷം നിരവധി പേരുടെ ഹൃദയം കീഴടക്കി.

പലർക്കും വിമാനയാത്ര ജീവിതത്തിലെ സാധാരണ അനുഭവങ്ങളിലൊന്നായിരിക്കാം. എന്നാൽ, പ്രിയപ്പെട്ടവർക്കൊപ്പം ആദ്യമായി ആകാശയാത്ര നടത്തുകയെന്നത് ചിലർക്ക് വർഷങ്ങളായി മനസ്സിൽ കൊണ്ടുനടക്കുന്ന സ്വപ്നമാണ്. അത്തരമൊരു സ്വപ്നം യാഥാർഥ്യമാക്കിയിരിക്കുകയാണ് നിധി സിങ് എന്ന യുവതി. മാതാപിതാക്കൾക്കൊപ്പം ആദ്യമായി വിമാനത്തിൽ യാത്ര ചെയ്തതിന്‍റെ സന്തോഷം പങ്കുവെച്ച നിധിയുടെ വീഡിയോ സമൂഹ മാധ്യമങ്ങളിൽ വലിയ ശ്രദ്ധനേടി.

'ഈ ദിവസത്തിനായി 21 വർഷം കാത്തിരുന്നു'

ഇൻസ്റ്റഗ്രാമിൽ പങ്കുവെച്ച വീഡിയോയിലൂടെയാണ് നിധി തന്‍റെ ജീവിതത്തിലെ ഈ വിശേഷ നിമിഷം പങ്കിട്ടത്. 'ഈ ദിവസത്തിനായി 21 വർഷം കാത്തിരുന്നു' എന്ന കുറിപ്പാണ് വീഡിയോയിൽ അവ‍ർ കുറിച്ചത്. മാതാപിതാക്കൾക്കൊപ്പം ആദ്യമായി വിമാനയാത്ര നടത്തുക എന്നത് നിധിയെ സംബന്ധിച്ചിടത്തോളം വെറുമൊരു യാത്രയായിരുന്നില്ല. മറിച്ച് ഏറെ നാളായി മനസ്സിൽ സൂക്ഷിച്ചിരുന്ന ആഗ്രഹത്തിന്‍റെ പൂർത്തീകരണം കൂടിയായിരുന്നു. വീഡിയോയ്‌ക്കൊപ്പമുള്ള കുറിപ്പിൽ നിധി പങ്കുവെച്ച ആശയമാണ് ഏറെ ശ്രദ്ധേയം. മാതാപിതാക്കൾക്കൊപ്പം ആദ്യമായി വിമാനത്തിൽ കയറുന്നത് പലർക്കും സാധാരണമായൊരു അനുഭവമായി തോന്നിയേക്കാം. എന്നാൽ, തനിക്ക് അത് ഒരു സ്വപ്നം സാക്ഷാത്കരിക്കുന്നതിന് തുല്യമാണ് എന്നായിരുന്നു നിധി കുറിച്ചത്.

നടക്കാൻ പഠിപ്പിച്ചവരെ പറക്കാൻ പഠിപ്പിക്കുമ്പോൾ...

മാതാപിതാക്കൾ കുട്ടിക്കാലത്ത് കൈപിടിച്ച് നടക്കാൻ പഠിപ്പിച്ചു. ഇന്ന് അവർക്കൊപ്പം വിമാനത്തിൽ യാത്ര ചെയ്ത് പുതിയൊരു അനുഭവം സമ്മാനിക്കാൻ തനിക്ക് അവസരം ലഭിച്ചിരിക്കുന്നു എന്നതാണ് നിധിയുടെ കുറിപ്പിലെ ഹൃദയസ്പർശിയായ ആശയം. മാതാപിതാക്കൾ മക്കൾക്കായി ചെയ്യുന്ന ത്യാഗങ്ങൾക്കും കരുതലിനും പകരമായി ഒന്നും നൽകാനാകില്ലെങ്കിലും, അവർക്കായി സന്തോഷകരമായ ഓർമകൾ സമ്മാനിക്കാൻ കഴിയുമെന്ന സന്ദേശവും ഈ അനുഭവം പങ്കുവെക്കുന്നു.

ഹൃദയം തൊട്ട നിമിഷം

നിധിയുടെ പോസ്റ്റിന് താഴെ നിരവധി പേരാണ് പ്രതികരണങ്ങളുമായി എത്തിയത്. 'അഭിമാനിക്കാവുന്ന നിമിഷം' എന്നായിരുന്നു ഒരാളുടെ പ്രതികരണം. എല്ലാവർക്കും ജീവിതത്തിൽ ഇത്തരമൊരു അനുഭവം സ്വന്തമാക്കാൻ കഴിയട്ടെയെന്ന് മറ്റൊരാൾ ആശംസിച്ചു. ഈ നിമിഷം വൈകാരികമായി സ്പർശിച്ചുവെന്നും ചിലർ അഭിപ്രായപ്പെട്ടു. വലിയ സമ്മാനങ്ങളേക്കാൾ പ്രിയപ്പെട്ടവരോടൊപ്പം പങ്കിടുന്ന നിമിഷങ്ങൾക്കാണ് ജീവിതത്തിൽ കൂടുതൽ മൂല്യമെന്ന് ഓർമിപ്പിക്കുന്നതാണ് നിധിയുടെ ഈ യാത്രയെന്ന് മറ്റ് ചിലർ കുറിച്ചു.