ആരായാലും കയ്യടിച്ചുപോകും, 73 -ൽ പാരാ​ഗ്ലൈഡിങ്, ദാദി വേറെ ലെവലെന്ന് നെറ്റിസൺസ്

പാരാഗ്ലൈഡിംഗ് നടത്തുന്ന ഒരു 73 -കാരിയുടെ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലായി മാറുന്നത്. സ്പെഷ്യല്‍ എന്നാണ് ഈ അനുഭവത്തെ അവര്‍ വിശേഷിപ്പിക്കുന്നത്. 

പ്രായം വെറും നമ്പർ മാത്രമല്ലേ? ഇത് നമ്മൾ പറയാറും കേൾക്കാറുമുണ്ട്. എന്നാൽ, ജീവിതം കൊണ്ട് അത് തെളിയിക്കുന്നവരും ഈ ലോകത്ത് ഇഷ്ടം പോലെ ഉണ്ട്. അതിലൊരാളാണ് ഈ മുത്തശ്ശിയും. ഹിമാചൽ പ്രദേശിലെ പ്രശസ്തമായ സാഹസിക വിനോദ കേന്ദ്രമായ ബീർ ബില്ലിംഗിൽ നിന്നുള്ള ഈ 73 -കാരിയുടെ പാരഗ്ലൈഡിംഗ് വീഡിയോയാണ് ഇപ്പോൾ സോഷ്യൽ മീഡിയയിൽ ആളുകളുടെ കയ്യടി നേടുന്നത്. സാധാരണ ഗതിയിൽ പാരഗ്ലൈഡിംഗ് നടത്തുമ്പോൾ ചിലപ്പോൾ നമുക്ക് ഭയമൊക്കെ തോന്നിയേക്കാം. എന്നാൽ, ഈ മുത്തശ്ശിയുടെ മുഖത്ത് ആ ഭയമൊന്നും കാണാനില്ല. പകരം തികച്ചും ശാന്തമായിട്ടാണ് ഇവരുടെ ഈ ആകാശയാത്ര.

ഫ്ലൈറ്റിനിടെ ഇൻസ്ട്രക്ടറോട് തനിക്ക് 73 വയസ്സായെന്നും താൻ ഇത് വളരെയധികം ആസ്വദിക്കുന്നുണ്ടെന്നും അവർ പറയുന്നുമുണ്ട്. ഇൻസ്ട്രക്ടറായ അരുൺ സിംഗാണ് ഈ 73 -കാരിയുടെ വീഡിയോ ഇൻസ്റ്റഗ്രാമിലൂടെ പങ്കുവെച്ചത്. എന്നാൽ ഇത് ആദ്യമായിട്ടല്ല മുത്തശ്ശി ഇത്തരം സാഹസികതയ്ക്ക് മുതിരുന്നത്. മുൻപ് മസ്സൂറിയിലും സമാനമായ വിനോദങ്ങളിൽ ഏർപ്പെട്ടിട്ടുണ്ടെന്ന് അവർ വീഡിയോയിൽ പറയുന്നു. പാരാ​ഗ്ലൈഡിം​ഗിന്റെ അനുഭവത്തെ വളരെ സ്പെഷ്യൽ എന്നാണ് അവർ വിശേഷിപ്പിക്കുന്നത്.

അധികം വൈകാതെ തന്നെ ഈ വീഡിയോ സോഷ്യൽ മീഡിയയിൽ ശ്രദ്ധിക്കപ്പെട്ടു. വീഡിയോ വൈറലായി മാറിയതോടെ അനേകങ്ങളാണ് മുത്തശ്ശിയെ പുകഴ്ത്തിക്കൊണ്ട് കമന്റുകൾ പങ്കുവയ്ക്കുന്നത്. 'എനിക്കും ഈ ദാദിയെ പോലെ ആകണം' എന്നായിരുന്നു ഒരു കമന്റ്. മറ്റൊരാൾ പറഞ്ഞത്, 'നമ്മുടെ ജീവിതം നമ്മുടെ ഇഷ്ടത്തിന് ജീവിക്കണം, സ്വപ്നങ്ങൾ ഒരിക്കലും ഉപേക്ഷിക്കരുത്' എന്നാണ്. 'മുത്തശ്ശി എത്ര ആക്ടീവാണ്' എന്നാണ് മറ്റ് പലരും അഭിപ്രായപ്പെട്ടത്. എന്തായാലും, എല്ലാത്തിനും മടിച്ചിരിക്കുന്നവർക്ക് വലിയ പ്രചോദനമാണ് ഈ മുത്തശ്ശി എന്ന കാര്യത്തിൽ സംശയമില്ല.