'എനിക്ക് എല്ലാം തന്ന എന്റെ ഹീറോയ്ക്ക്...'; അച്ഛന്റെ 50 -ാം പിറന്നാളിന് മകളുടെ അപൂർവ സമ്മാനം; വികാരനിർഭരമായ വീഡിയോ വൈറൽ
Synopsis
വിദേശത്തുള്ള മകൾ തന്റെ അൻപതാം ജന്മദിനത്തിൽ അച്ഛന് സർപ്രൈസായി ഒരു പുത്തൻ ബൈക്ക് സമ്മാനിച്ചു. അപ്രതീക്ഷിത സമ്മാനം കണ്ട് സന്തോഷം കൊണ്ട് അച്ഛന്റെ കണ്ണുനിറയുന്നതിന്റെ വൈകാരികമായ വീഡിയോ സമൂഹ മാധ്യമങ്ങളിൽ വൈറലായി.
സ്വന്തം ആഗ്രഹങ്ങളെല്ലാം മാറ്റിവെച്ച് മക്കളുടെ ഭാവിക്ക് വേണ്ടി ജീവിതം സമർപ്പിക്കുന്നവരാണ് മാതാപിതാക്കൾ. അവർക്കായി തിരിച്ച് എന്തെങ്കിലും ചെയ്യാൻ സാധിക്കുന്നത് ഏതൊരു മക്കളുടെയും സ്വപ്നമാണ്. അത്തരത്തിൽ അൻപതാം ജന്മദിനത്തിൽ അച്ഛന് സർപ്രൈസായി ഒരു പുതിയ ബൈക്ക് സമ്മാനിച്ച മകളുടെ വീഡിയോയാണ് ഇപ്പോൾ സമൂഹ മാധ്യമങ്ങളിൽ ലക്ഷക്കണക്കിന് ആളുകളുടെ ഹൃദയം കവരുന്നത്. നന്ദിനി എന്ന യുവതിയാണ് തന്റെ ഇൻസ്റ്റാഗ്രാം പേജിലൂടെ അച്ഛന്റെ ജന്മദിനാഘോഷത്തിന്റെ വൈകാരിക നിമിഷങ്ങൾ പങ്കുവെച്ചത്.
അപ്രതീക്ഷിത സമ്മാനം, സന്തോഷക്കണ്ണീർ!
വീഡിയോയുടെ തുടക്കത്തിൽ നന്ദിനി വിദേശത്ത് നിന്നും തന്റെ കുടുംബത്തെ വീഡിയോ കോൾ ചെയ്യുന്നത് കാണാം. ഈ സമയം അച്ഛൻ മറ്റ് കുടുംബാംഗങ്ങളോടൊപ്പം വീടിന് പുറത്തേക്ക് വരുന്നു. മുറ്റത്ത് ചുവന്ന തുണികൊണ്ട് മൂടിയിട്ടിരിക്കുന്ന ഒരു വസ്തു അദ്ദേഹത്തിന്റെ ശ്രദ്ധയിൽപ്പെട്ടു. തൊട്ടുപിന്നാലെ പാർട്ടി പോപ്പറുകൾ പൊട്ടുകയും, അദ്ദേഹം ആ തുണി മാറ്റി നോക്കുകയും ചെയ്യുന്നു. അവിടെ നിർത്തിയിട്ടിരിക്കുന്ന ഒരു പുത്തൻ ബൈക്ക് കണ്ട് അദ്ദേഹം അത്ഭുതപ്പെട്ട് നിശബ്ദനായി നിന്നുപോയി. സന്തോഷം സഹിക്കാനാവാതെ അദ്ദേഹം ആദ്യം തന്നെ ഈ സർപ്രൈസിന് സഹായിച്ച മകനെ കെട്ടിപ്പിടിച്ചു. തുടർന്ന് ഫോണിൽ നോക്കി നിൽക്കുന്ന മകളെ വിളിച്ച് നിറകണ്ണുകളോടെ നന്ദി അറിയിക്കുകയായിരുന്നു.
"എനിക്ക് എല്ലാം തന്ന എന്റെ ഹീറോയ്ക്ക്..."
"എന്റെ അച്ഛൻ അൻപത് വർഷമായി ഞങ്ങൾക്ക് വേണ്ടിയാണ് ജീവിക്കുന്നത്. സ്വന്തം സന്തോഷങ്ങളേക്കാൾ അദ്ദേഹം എപ്പോഴും ഞങ്ങളുടെ ആവശ്യങ്ങൾക്കാണ് മുൻഗണന നൽകിയത്. എനിക്ക് നല്ലൊരു ജീവിതം തരാൻ അദ്ദേഹം ഒരുപാട് കഷ്ടപ്പെട്ടു. എനിക്ക് എന്നിൽത്തന്നെ വിശ്വാസമില്ലാതിരുന്ന കാലത്ത് അദ്ദേഹം എന്നെ വിശ്വസിച്ചു. ഇന്ന് ഞാൻ ഈ നിലയിൽ കഠിനാധ്വാനം ചെയ്യുന്നതിന് പിന്നിൽ എന്റെ അച്ഛനാണ്. ഇത് അദ്ദേഹത്തിന് നൽകാൻ കഴിയുന്ന ഒരു ചെറിയ സമ്മാനം മാത്രമാണ്," നന്ദിനി കുറിച്ചു.
കയ്യടിച്ച് സോഷ്യൽ മീഡിയ
ഈ യഥാർത്ഥ സ്നേഹ നിമിഷത്തിന് സമൂഹ മാധ്യമങ്ങളിൽ വലിയ പിന്തുണയാണ് ലഭിക്കുന്നത്. നിരവധി ആളുകളാണ് അച്ഛനും മകൾക്കും ആശംസകളുമായി രംഗത്തെത്തിയത്. "സ്വന്തം മാതാപിതാക്കൾക്ക് ഇതുപോലൊരു സന്തോഷം നൽകാൻ എനിക്കും സാധിക്കട്ടെ," എന്ന് ഒരു ഉപയോക്താവ് കുറിച്ചപ്പോൾ "ആ അച്ഛന്റെ കണ്ണിൽ നിറഞ്ഞ സന്തോഷക്കണ്ണീർ മാത്രം മതി ഈ സമ്മാനത്തിന്റെ മൂല്യം മനസ്സിലാക്കാൻ, മകളെ വളരെ നന്നായി വളർത്തിയ അച്ഛന് അഭിനന്ദനങ്ങൾ," എന്നായിരുന്നു മറ്റൊരു കുറിപ്പ്.