ഹെൽത്ത് ബാർ ഇനി വീട്ടിൽ തന്നെ! ആരോഗ്യകരമായ ലഘുഭക്ഷണത്തിന് പുതിയ ട്രെൻഡുമായി നടി മീര കപൂർ, വീഡിയോ

ആരോഗ്യകരമായ ഭക്ഷണശീലങ്ങളുടെ ഭാഗമായി വീട്ടിൽ തയ്യാറാക്കുന്ന ഹെൽത്ത് ബാറുകൾക്ക് പ്രചാരമേറുകയാണ്. ഓട്സ്, നട്സ്, ഡ്രൈ ഫ്രൂട്ട്സ് തുടങ്ങിയവ ഉപയോഗിച്ച് തയ്യാറാക്കുന്ന ഇവ, ആവശ്യമായ പോഷകങ്ങൾ നൽകുമെങ്കിലും കലോറി അളവ് ശ്രദ്ധിക്കേണ്ടത് പ്രധാനമാണ്. സ്വന്തം ഇഷ്ടാനുസരണം ചേരുവകൾ തിരഞ്ഞെടുക്കാമെന്നതാണ് ഇതിന്റെ പ്രധാന ആകർഷണം.

ആരോഗ്യകരമായ ഭക്ഷണശീലങ്ങളിലേക്കുള്ള ആളുകളുടെ താൽപര്യം വർധിക്കുന്നതിനൊപ്പം വീട്ടിൽ തന്നെ തയ്യാറാക്കുന്ന ഹെൽത്ത് ബാറുകൾക്കും പ്രചാരമേറുകയാണ്. പഞ്ചസാരയും കൃത്രിമ ചേരുവകളും കൂടുതലുള്ള പാക്കറ്റ് സ്നാക്കുകൾക്ക് പകരമായി, പഴയ കാലത്തേത് പോലെ പോഷക സമൃദ്ധമായ ലഘുഭക്ഷണം സ്വന്തമായി ഒരുക്കാനാണ് പലരും ഇപ്പോൾ മുൻഗണന നൽകുന്നത്.

പ്രോട്ടീനും ഫൈബറും ആവശ്യത്തിന്

ആരോഗ്യകരമായ ലഘുഭക്ഷണങ്ങൾ, സപ്ലിമെന്‍റുകൾ, സൂപ്പർഫുഡുകൾ എന്നിവയ്‌ക്കായി ഒരു പ്രത്യേക സ്ഥലം വീട്ടിൽ ഉണ്ടായിരിക്കേണ്ട ഏറ്റവും പുതിയ വെൽനസ് സെന്‍റാറായി മാറുകയാണ്. വെൽനസ് സംരംഭകയും നടിയുമായ മീര കപൂർ തന്‍റെ വീട്ടിലെ ആരോഗ്യ സംരക്ഷണത്തെ കുറിച്ചുള്ള വീഡിയോ പങ്കുവച്ചതോടെ ഹോം ഹെൽത്ത് ബാർ ശ്രദ്ധാകേന്ദ്രമാകുന്നു. പ്രീമിയം നട്ട്‌സ്, ഫങ്ഷണൽ സ്‌നാക്‌സ്, ഊർജ്ജസ്വലമായ സൂപ്പർഫുഡ് പൊടികൾ എന്നിവയുടെ പേര് എഴുതിവച്ച പാത്രങ്ങൾ നിരത്തിയിരിക്കുന്നത് വീഡിയോയിൽ കാണാം. മീരയുടെ ഈ സജ്ജീകരണം കുടുംബത്തിനും അതിഥികൾക്കും വേണ്ടിയുള്ള ശുദ്ധവും പോഷകസമൃദ്ധവുമായ മുഴുവൻ ഭക്ഷണങ്ങളിൽ കർശനമായി ശ്രദ്ധ കേന്ദ്രീകരിക്കുന്നു.

കൂടുന്ന ജനപ്രീതി

ഓട്സ്, വിവിധതരം നട്സ്, വിത്തുകൾ, ഈന്തപ്പഴം, ഉണക്കപ്പഴങ്ങൾ, നിലക്കടല, വെണ്ണ, തേൻ തുടങ്ങിയ സ്വാഭാവിക ചേരുവകൾ ഉപയോഗിച്ചാണ് ഭൂരിഭാഗം ഹെൽത്ത് ബാറുകളും തയ്യാറാക്കുന്നത്. വ്യക്തിഗത ആരോഗ്യലക്ഷ്യങ്ങൾക്കനുസരിച്ച് പ്രോട്ടീൻ, ഫൈബർ, നല്ല കൊഴുപ്പ് എന്നിവയുടെ അളവ് ക്രമീകരിക്കാനാകുമെന്നതാണ് വീട്ടിൽ തയ്യാറാക്കുന്ന ഇത്തരം ഹെൽത്ത് ബാറുകളുടെ പ്രധാന പ്രത്യേകത. ജോലി തിരക്കുകൾക്കിടയിലും യാത്രകളിലും എളുപ്പത്തിൽ കഴിക്കാനാകുന്ന ആരോഗ്യകരമായ ലഘുഭക്ഷണമെന്ന നിലയിലാണ് ഇവ കൂടുതൽ ജനപ്രീതി നേടുന്നത്. കുട്ടികളുടെ ടിഫിൻ ബോക്സുകളിലും വ്യായാമം ചെയ്യുന്നവരുടെ ഭക്ഷണക്രമത്തിലും ഹെൽത്ത് ബാറുകൾ ഇടംപിടിക്കുന്നതായി പോഷകാഹാര വിദഗ്ധരും ചൂണ്ടിക്കാട്ടുന്നു. ആവശ്യമായ പോഷകങ്ങൾ ലഭിക്കുന്നതിനൊപ്പം വിശപ്പിനെ കൂടുതൽ സമയം നിയന്ത്രിക്കാനും ഇവ സഹായിക്കുമെന്നാണ് വിലയിരുത്തൽ.

ശ്രദ്ധിക്കുക, അമിതമാകരുത്!

എന്നാൽ 'ആരോഗ്യകരം' എന്ന പേരിൽ ഉപയോഗിക്കുന്ന എല്ലാ ചേരുവകളും നിയന്ത്രണമില്ലാതെ ചേർക്കുന്നത് ഗുണകരമാകണമെന്നില്ല. തേൻ, ഡ്രൈ ഫ്രൂട്ട്സ്, നട്ട് ബട്ടർ തുടങ്ങിയവ അമിതമായി ഉപയോഗിച്ചാൽ കലോറി അളവ് വർധിക്കാൻ സാധ്യതയുണ്ട്. അതിനാൽ പോഷകസമതുലിതത്വവും അളവിലെ നിയന്ത്രണവും ഒരുപോലെ പ്രധാനമാണെന്നും വിദഗ്ധർ ഓർമ്മിപ്പിക്കുന്നു. അതേസമയം ഭക്ഷണത്തിലെ ചേരുവകൾ എന്തൊക്കെയാണെന്ന് വ്യക്തമായി അറിയാനും സ്വന്തം രുചിക്കനുസരിച്ച് വിഭവങ്ങൾ തയ്യാറാക്കാനുമുള്ള അവസരമാണ് വീട്ടിൽ തയ്യാറാക്കുന്ന ഹെൽത്ത് ബാറുകൾ നൽകുന്നത്. ആരോഗ്യബോധം വർധിക്കുന്ന സാഹചര്യത്തിൽ ലഘുഭക്ഷണ ശീലങ്ങളിലും ഇത്തരത്തിലുള്ള മാറ്റങ്ങൾ കൂടുതൽ വ്യാപകമാകുമെന്നാണ് ഭക്ഷ്യരംഗത്തെ വിദഗ്ധരുടെ വിലയിരുത്തൽ.