'ഒരു മലയാളിയെ വിവാഹം കഴിച്ചാൽ...'; വിവാഹ സമ്മാനമായ 57 വയസുള്ള ലാന്‍റ് റോവറുമായി യുകെയിൽ നിന്ന് ഇറ്റലിയിലേക്ക് 3,000 കിലോമീറ്റർ സാഹസിക യാത്ര! വീഡിയോ

വിവാഹ സമ്മാനമായി ലഭിച്ച 57 വർഷം പഴക്കമുള്ള ലാൻഡ് റോവർ കാറിൽ യുകെയിൽ നിന്ന് ഇറ്റലിയിലേക്ക് ജോണും ഭാര്യ ഏൽസയും നടത്തിയ 3000 കിലോമീറ്റർ യാത്രയുടെ വിശേഷങ്ങളാണിത്. വഴിയിലുടനീളം വാഹനം പണിമുടക്കിയെങ്കിലും തകരാറുകൾ സ്വയം പരിഹരിച്ചായിരുന്നു ജോണിന്റെ ഈ സാഹസിക യാത്ര.

കേരളത്തിലെ വാഹന പ്രേമികളുടെ ആവേശവും വാഹനങ്ങളോടുള്ള അടങ്ങാത്ത പ്രണയവും പലപ്പോഴും വേറിട്ട അനുഭവങ്ങൾക്ക് വഴിയൊരുക്കാറുണ്ട്. അത്തരത്തിലൊരു സാഹസിക യാത്രയുടെ കഥയാണ് ഇപ്പോൾ സമൂഹ മാധ്യമങ്ങളിൽ ശ്രദ്ധ നേടുന്നത്. വിവാഹ സമ്മാനമായി ലഭിച്ച 57 വർഷം പഴക്കമുള്ള ലാൻഡ് റോവർ സീരീസ് IIA പുതുക്കിപ്പണിത്, ആ വാഹനത്തിൽ യുകെയിൽ നിന്ന് ഇറ്റലിയിലേക്ക് ഏകദേശം 3,000 കിലോമീറ്റർ തന്‍റെ ഭാര്യയുമായി യാത്ര നടത്തിയിരിക്കുകയാണ് ജോൺ എന്ന കാർ പ്രേമി.

ആദ്യ ഹണിമൂൺ ട്രിപ്പ് അതോ മെക്കാനിക്കൽ പരീക്ഷണമോ?

പലരും യൂറോപ്പിലൂടെയുള്ള റോഡ് യാത്രയെക്കുറിച്ച് സ്വപ്നം കാണുമ്പോൾ ജോണിന്‍റെ പദ്ധതി അൽപ്പം വ്യത്യസ്തമായിരുന്നുവെന്ന് ഭാര്യ ഏൽസാ ആരിഗോണി പറയുന്നു. അഞ്ച് പതിറ്റാണ്ടിലേറെ പഴക്കമുള്ള ലാൻഡ് റോവർ അഴിച്ചുപണിത്, സഹോദരനൊപ്പം അതിന്‍റെ ഓരോ ഭാഗവും ജോൺ പുനർനിർമിച്ചു. പണിയെല്ലാം കഴിഞ്ഞപ്പോൾ ഇളയ സഹോദരൻ വാഹനം ഇരുവർക്കുമുള്ള വിവാഹ സമ്മാനമായി നൽകി. അങ്ങനെ പ്രണയവും വാഹനപ്രേമവും ഒത്തുചേർന്നൊരു യാത്രയ്ക്ക് തുടക്കമായി.

യുകെയിൽ നിന്ന് ഇറ്റലിയിലേക്കുള്ള ഏകദേശം 3,000 കിലോമീറ്റർ ദൂരം പിന്നിടുകയായിരുന്നു ലക്ഷ്യം. എന്നാൽ, 57 വർഷം പഴക്കമുള്ള വാഹനം യാത്രയിലുടനീളം കാര്യമായ വെല്ലുവിളികൾ ഉയർത്തി. പലതവണ കാർ വഴിയിൽ തകരാറിലായി. ഓരോ തവണയും യാത്ര അവസാനിപ്പിക്കുന്നതിന് പകരം കൈയിൽ കരുതിയിരുന്ന ഉപകരണങ്ങളെടുത്ത് വാഹനത്തിന്‍റെ തകരാർ കണ്ടെത്തി പരിഹരിച്ച് ജോൺ മുന്നോട്ട് നീങ്ങിക്കൊണ്ടേയിരുന്നു.

വഴിയിൽ പണിമുടക്കിയാലും യാത്ര നിർത്തില്ല!

പുതിയ സ്ഥലങ്ങൾ സന്ദർശിച്ചും അപരിചിതരായ ആളുകളെ പരിചയപ്പെട്ടും വഴിയരികിൽ വാഹനം നന്നാക്കിയും മുന്നോട്ടുപോയ ആ യാത്ര പ്രതീക്ഷിച്ചതിലും സാഹസികമായെന്ന് ഏൽസ എഴുതുന്നു. ഏതാനും നൂറ് കിലോമീറ്റർ പിന്നിടുമ്പോഴേക്കും അടുത്ത പ്രശ്നം എന്തായിരിക്കുമെന്ന ആശങ്കയിലായിരുന്നു താനെന്നും അവ‍ർ വീഡിയോയ്ക്ക് നൽകിയ അടിക്കുറിപ്പിൽ എഴുതി. വാഹനം വഴിയിൽ നിന്നുപോയാൽ അതിനെ വഴിയിൽ ഉപേക്ഷിച്ച് യാത്ര അവസാനിച്ചെന്നല്ല, മറിച്ച് പ്രശ്നം പരിഹരിച്ച് വീണ്ടും മുന്നോട്ടുപോകുകയാണ് ജോണിന്‍റെ അല്ല കേരളത്തിലെ വാഹന പ്രേമികൾ ചെയ്യുന്നതെന്നും അവർ എഴുതി. ഇനി ഇതുപോലൊരു യാത്രയ്ക്ക് തയ്യാറാകുമോ എന്ന ചോദ്യത്തിന് അടുത്ത തവണ കാർ എവിടെയാണ് പണിമുടക്കുന്നതെന്ന് അറിഞ്ഞശേഷം ചോദിക്കണമെന്നായിരുന്നു ഏൽസയുടെ തമാശ കലർന്ന കുറിപ്പ്. 57 വർഷം പഴക്കമുള്ള ലാൻഡ് റോവറിൽ 3,000 കിലോമീറ്റർ യാത്ര ചെയ്യാൻ നിങ്ങൾ തയ്യാറാകുമോ എന്ന ചോദ്യം അവശേഷിപ്പിച്ച് കൊണ്ട് ഏൽസ തന്‍റെ കുറിപ്പ് അവസാനിപ്പിക്കുന്നു.