ഗ്ലാസിലൊട്ടിച്ച ഫോൺ, ഓടുന്ന മെട്രോ, പുറത്ത് നിന്ന് യുവാവിന്റെ ഡാൻസ്, 135 മില്ല്യണ്‍ വ്യൂസ് നേടി വീഡിയോ

ഡെൽഹി മെട്രോയുടെ ചില്ലിൽ ഫോൺ ഒട്ടിച്ചുവെച്ച് പ്ലാറ്റ്‌ഫോമിൽ ഡാൻസ് ചെയ്യുന്ന ഇൻഫ്ലുവൻസറുടെ വീഡിയോ വൈറലാകുന്നു. ട്രെയിൻ നീങ്ങുമ്പോൾ ഓടുന്ന ദൃശ്യങ്ങൾ ആളുകളിൽ ആകാംഷയുണർത്തുകയും ചെയ്തിട്ടുണ്ട്.

ഡെൽഹി മെട്രോയുടെ ചില്ലിൽ ഫോൺ ഒട്ടിച്ച് ട്രെയിനിന് പുറത്തുനിന്ന് ഡാൻസ് കളിക്കുന്ന ഒരു ഇൻഫ്ലുവൻസറുടെ വീഡിയോയാണ് ഇപ്പോൾ സാമൂഹിക മാധ്യമങ്ങളിൽ വൈറലായിരിക്കുന്നത്. നിഖിൽ കൊച്ചാർ എന്ന ഡെൽഹി സ്വദേശിയാണ് ഈ വ്യത്യസ്തമായ ട്രെൻഡിന്റെ ഭാഗമായി വീഡിയോ ചിത്രീകരിച്ച് ഷെയർ ചെയ്തിരിക്കുന്നത്. 'ദിൽവാലെ' എന്ന ചിത്രത്തിലെ പാട്ടിനൊപ്പമാണ് നിഖിൽ പ്ലാറ്റ്‌ഫോമിൽ വെച്ച് നൃത്തം ചെയ്തത്.

ട്രെയിൻ നീങ്ങിത്തുടങ്ങുമ്പോൾ ഫോൺ എടുക്കാനായി പ്ലാറ്റ്‌ഫോമിലൂടെ ഓടുന്ന രീതിയിലാണ് ഈ വീഡിയോ ചിത്രീകരിച്ചിരിക്കുന്നത്. ഷെയർ ചെയ്ത് വെറും രണ്ട് ദിവസത്തിനുള്ളിൽ 135 മില്ല്യണിലധികം ആളുകളാണ് ഈ വീഡിയോ കണ്ടത്. 4.5 മില്ല്യണിലധികം ലൈക്കുകളും ഈ വീഡിയോയ്ക്ക് ലഭിച്ചു. 'ഫോൺ പിന്നീട് എങ്ങനെ തിരിച്ചു കിട്ടി?', 'ഫോൺ എവിടേക്ക് പോയി?' എന്നിങ്ങനെ നിരവധി സംശയങ്ങളാണ് ആളുകൾ വീഡിയോയുടെ കമന്റ് ബോക്സിൽ ചോദിച്ചത്.

എന്നാൽ, ട്രെയിനിനുള്ളിലിരുന്ന സുഹൃത്തിന്റെ ഫോണിലാണ് ഈ ദൃശ്യങ്ങൾ പകർത്തിയതെന്നും, മെട്രോ ഗ്ലാസിലെ റിഫ്ലക്ഷനിലൂടെയും വീഡിയോയുടെ ക്വാളിറ്റിയിലൂടെയും ഇത് വ്യക്തമാണെന്നും നെറ്റിസണ്‍സ് കണ്ടെത്തി. രണ്ട് വ്യത്യസ്ത ക്ലിപ്പുകൾ എഡിറ്റ് ചെയ്ത് ചേർത്താണ് ഈ വീഡിയോ തയ്യാറാക്കിയിരിക്കുന്നത്. യഥാർത്ഥത്തിൽ ട്രെയിൻ പുറപ്പെടുന്നതിന് മുൻപ് തന്നെ ഫോൺ സുരക്ഷിതമായി തിരിച്ചെടുത്തിരുന്നു എന്നും പലരും വീഡിയോയുടെ കമന്‍റില്‍ കുറിച്ചിട്ടുണ്ട്. എന്തായാലും, ആളുകളില്‍ ഈ വീഡിയോ കൗതുകം നിറച്ചിട്ടുണ്ട് എന്ന കാര്യത്തില്‍ സംശയമില്ല.