'ഇന്ത്യയിലേക്ക് വരരുതെന്ന് പലരും പപ്പോഴായി പറഞ്ഞതാണ്; പക്ഷെ ഞാൻ ഇവിടെ വിവാഹം കഴിച്ചു, ബിസിനസ്സ് തുടങ്ങി'; വൈറലായി യുക്രൈൻ യുവതിയുടെ കഥ

ഇന്ത്യൻ യുവാവിനെ വിവാഹം കഴിച്ച് ഇന്ത്യയിൽ താമസമാക്കിയ യുക്രൈൻ യുവതിയായ വിക്ടോറിയ ചക്രവർത്തിയുടെ കഥയാണിത്. സാരിയുടുക്കുന്നതും കൈകൊണ്ട് ഭക്ഷണം കഴിക്കുന്നതും ഉൾപ്പെടെയുള്ള ഇന്ത്യൻ ആചാരങ്ങൾ തൻ്റെ ജീവിതത്തിൻ്റെ ഭാഗമായതിനെക്കുറിച്ച് അവർ പറയുന്നു.

വ്യത്യസ്ത സംസ്കാരങ്ങൾ ഒരുമിക്കുന്ന കഥകൾക്ക് ഇന്റര്‍നെറ്റിൽ എന്നും വലിയ ശ്രദ്ധ ലഭിക്കാറുണ്ട്. അതിലൊന്നാണ് ഇന്ത്യൻ യുവാവിനെ വിവാഹം കഴിച്ച് എട്ട് വർഷത്തിലേറെയായി ഇന്ത്യയിൽ താമസിക്കുന്ന യുക്രൈൻ യുവതിയായ വിക്ടോറിയ ചക്രവർത്തിയുടെ കഥ. തന്റെ ദൈനംദിന ജീവിതത്തിൽ ഇന്ത്യൻ ആചാരങ്ങൾ എങ്ങനെ മാറ്റങ്ങൾ വരുത്തി, ഒരു പുതിയ 'വീടിൻ്റെ' അനുഭവം നൽകി എന്ന് ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെ വിക്ടോറിയ വിവരിക്കുന്നത് വൈറലാവുകയാണ്.

സാരി മുതൽ കൈകൊണ്ട് ഭക്ഷണം കഴിക്കുന്നത് വരെ

ഇന്ത്യൻ വസ്ത്രധാരണം തൻ്റെ ജീവിതത്തിൻ്റെ സ്വാഭാവിക ഭാഗമായി മാറിയെന്ന് വിക്ടോറിയ പറയുന്നു. "സാരി എൻ്റെ വാർഡ്രോബിൻ്റെ ഭാഗമായി മാറി. ഒരു കല്യാണത്തിനോ മറ്റ് ചടങ്ങുകൾക്കോ സാരിയില്ലാതെ പോകാൻ എനിക്കിപ്പോൾ കഴിയില്ല," വിക്ടോറിയ പറയുന്നു. പരമ്പരാഗത ഭക്ഷണം കൈകൊണ്ട് കഴിക്കുന്നത് ഇപ്പോൾ വളരെ സ്വാഭാവികമായി തോന്നുന്നുവെന്നും "അങ്ങനെ കഴിക്കുമ്പോൾ ഭക്ഷണത്തിന് ശരിക്കും രുചി കൂടും. ഇന്ത്യയിലെ ജീവിതത്തിൽ ഏറ്റവും പ്രിയപ്പെട്ട അനുഭവമാണ് ഉത്സവങ്ങൾ. "ആഘോഷങ്ങൾ എൻ്റെ പ്രിയപ്പെട്ട സമയമായി മാറി; നിറങ്ങളും വെളിച്ചവും ആഘോഷങ്ങളും എപ്പോഴും എനിക്ക് വീട്ടിലെത്തിയതുപോലെ തോന്നിക്കുന്നുവെന്നും വിക്ടോറിയ കൂട്ടിച്ചേർത്തു.

വിമർശനങ്ങളെ അതിജീവിച്ച യാത്ര

ഇന്ത്യയിലേക്ക് വരാതിരിക്കാൻ ആളുകൾ ഒരിക്കൽ തനിക്ക് ഉപദേശം നൽകിയിരുന്നതിനെക്കുറിച്ച് മറ്റൊരു വീഡിയോയിൽ വിക്ടോറിയ പ്രതിഫലിച്ചിരുന്നു. "ഞാൻ ഇവിടെ വരിക മാത്രമല്ല ചെയ്തത്, പ്രണയിച്ചു, വിവാഹം കഴിച്ചു, ഒരു ബിസിനസ്സ് തുടങ്ങി, ഈ അവിശ്വസനീയമായ യാത്രയെക്കുറിച്ച് ഒരു ബ്ലോഗ് പോലും ആരംഭിച്ചു," അവർ പറഞ്ഞു. തൻ്റെ ജീവിത യാത്രയെ കുറിച്ച് വിക്ടോറിയ ചുരുക്കി പറഞ്ഞത് ഇങ്ങനെയാണ്, "എല്ലാവരെയും തെറ്റാണെന്ന് തെളിയിക്കാൻ ജീവിതത്തിന് അതിൻ്റേതായ രസകരമായ വഴികളുണ്ട്. ചിലപ്പോൾ, ആളുകൾ പോകരുതെന്ന് മുന്നറിയിപ്പ് നൽകുന്ന സ്ഥലങ്ങളിൽ നിന്നായിരിക്കും മികച്ച അധ്യായങ്ങൾ ആരംഭിക്കുന്നത്."

നെറ്റിസൺസ് ഏറ്റെടുത്തു

വിക്ടോറിയ ഇന്ത്യൻ പാരമ്പര്യങ്ങളെ സ്വീകരിച്ച രീതിയെ സോഷ്യൽ മീഡിയ അഭിനന്ദിക്കുകയാണ്. വീഡിയോയ്ക്ക് ഇതിനോടകം ലക്ഷക്കണക്കിന് കാഴ്ചകൾ ലഭിച്ചു കഴിഞ്ഞു. "നിങ്ങളുടെ സമീപനം മനോഹരമായിരിക്കുന്നു, മിക്കവരെക്കാളും ഇന്ത്യൻ വസ്ത്രത്തിൽ നിങ്ങൾക്ക് കൂടുതൽ അഴകുണ്ട്, ഒരാൾ കമന്റ് ചെയ്തു. "നിങ്ങൾ സംസ്കാരം ഉൾക്കൊള്ളുകയും ആസ്വദിക്കുകയും ചെയ്യുന്നതിൽ സന്തോഷമുണ്ട്" എന്നും ചിലർ കുറിച്ചു. സ്നേഹവും തുറന്ന മനസ്സും എങ്ങനെ സംസ്കാരങ്ങൾ തമ്മിലുള്ള പാലമാകുമെന്നും, അപരിചിതമായ പാരമ്പര്യങ്ങളെ പ്രിയപ്പെട്ട ഭാഗങ്ങളാക്കി മാറ്റുമെന്നും വിക്ടോറിയയുടെ കഥ ഓർമ്മിപ്പിക്കുന്നു.