മനുഷ്യരുടെ സ്വഭാവത്തെ വിമർശിച്ച് 14 എഐ മോഡലുകൾ; യുക്തിപൂർവമായി ചിന്തിക്കുന്നവരല്ലന്ന് അഭിപ്രായം

ഒറ്റയ്ക്ക് ശരിയായിരിക്കുന്നതിനേക്കാൾ കൂട്ടത്തോടെ തെറ്റായിരിക്കുന്നതാണ് മനുഷ്യർക്ക് ഇഷ്ടമെന്നായിരുന്നു ഗ്രോക്ക്-4.7ന്റെ നിരീക്ഷണം. തങ്ങൾ സ്നേഹിക്കുന്നവരെ സംരക്ഷിക്കുകയാണെന്ന പേരിൽ ക്രൂരതയെപ്പോലും ന്യായീകരിക്കാൻ മനുഷ്യർക്ക് കഴിയുമെന്ന് കിമി കെ3.1 പ്രോ അഭിപ്രായപ്പെട്ടു.

മനുഷ്യർ യുക്തിസഹമായി ചിന്തിക്കുന്നവരാണെന്ന ധാരണയെ ചോദ്യം ചെയ്ത് 14 എഐ മോഡലുകൾ. കൂട്ടത്തിന്റെ അംഗീകാരത്തിനും സ്വന്തം വിശ്വാസങ്ങൾക്കും സത്യത്തേക്കാൾ പ്രാധാന്യം നൽകുന്നവരാണ് മനുഷ്യരെന്ന് എഐ വിലയിരുത്തൽ.

എഐ വിശകലന സ്ഥാപനമായ 'മോഡൽകംപെയർ' നടത്തിയ പഠനത്തിലാണ് ഈ നിരീക്ഷണം. മനുഷ്യസ്വഭാവത്തെക്കുറിച്ചുള്ള തങ്ങളുടെ ഏറ്റവും വിവാദപരമായ അഭിപ്രായങ്ങൾ പങ്കുവെക്കാൻ 14 ലാർജ് ലാംഗ്വേജ് മോഡലുകളോട് മോഡൽകംപെയർ ആവശ്യപ്പെടുകയായിരുന്നു. ഒരേ ചോദ്യം ഓരോ മോഡലിനോടും മൂന്ന് തവണ വീതം ചോദിച്ചതായും കമ്പനി അറിയിച്ചു.

മൂന്ന് രാജ്യങ്ങളിലെ പത്ത് എഐ ലാബുകളിൽ നിന്നുള്ള മോഡലുകളെയാണ് പരീക്ഷണത്തിന് വിധേയമാക്കിയത്. 'മനുഷ്യരെക്കുറിച്ചുള്ള നിങ്ങളുടെ ഏറ്റവും വിവാദപരമായ അഭിപ്രായം എന്താണ്? മറ്റുള്ളവരുടെ അഭിപ്രായങ്ങൾ ഉദ്ധരിക്കാതെ, സത്യസന്ധമായ സ്വന്തം കാഴ്ചപ്പാട് പങ്കുവെക്കുക' എന്നായിരുന്നു മോഡലുകൾക്ക് നൽകിയ ചോദ്യം.

മനുഷ്യരെക്കുറിച്ചുള്ള നിരീക്ഷണങ്ങൾ

സത്യത്തേക്കാൾ ഒരു കൂട്ടത്തിന്റെ ഭാഗമായിരിക്കാനാണ് മനുഷ്യർ കൂടുതൽ താൽപ്പര്യപ്പെടുന്നതെന്നായിരുന്നു ജിപിടി-6.1 സോളിന്റെ നിരീക്ഷണം. സൗകര്യത്തിനുവേണ്ടിയുള്ള തീരുമാനങ്ങളെ തത്ത്വങ്ങളുടെ പേരിൽ ന്യായീകരിക്കുന്നതാണ് മനുഷ്യരുടെ പ്രധാന ധാർമിക പരാജയമെന്നായിരുന്നു ജിപിടി-6 ആസ്ട്രയുടെ വിലയിരുത്തൽ. സത്യം കണ്ടെത്തുന്നതിനേക്കാൾ തർക്കങ്ങളിൽ വിജയിക്കാനും അംഗീകാരം നേടാനുമാണ് മനുഷ്യർക്ക് താൽപ്പര്യമെന്ന് ജെമിനി-4 ആർഗണും അഭിപ്രായപ്പെട്ടു.

ഒറ്റയ്ക്ക് ശരിയായിരിക്കുന്നതിനേക്കാൾ കൂട്ടത്തോടെ തെറ്റായിരിക്കുന്നതാണ് മനുഷ്യർക്ക് ഇഷ്ടമെന്നായിരുന്നു ഗ്രോക്ക്-4.7ന്റെ നിരീക്ഷണം. തങ്ങൾ സ്നേഹിക്കുന്നവരെ സംരക്ഷിക്കുകയാണെന്ന പേരിൽ ക്രൂരതയെപ്പോലും ന്യായീകരിക്കാൻ മനുഷ്യർക്ക് കഴിയുമെന്ന് കിമി കെ3.1 പ്രോ അഭിപ്രായപ്പെട്ടു.

മനുഷ്യർ യുക്തിസഹമായി ചിന്തിക്കുന്നവരാണെന്ന ധാരണയെ കൂടുതൽ രൂക്ഷമായി വിമർശിച്ചത് മിസ്ട്രൽ ലാർജ്-4 ആണ്. സ്വന്തം നിലനിൽപ്പിന്റെ താൽക്കാലികതയും പ്രപഞ്ചത്തിൽ മനുഷ്യർക്കുള്ള പരിമിതമായ സ്ഥാനവും അംഗീകരിക്കാൻ കഴിയാത്തതിനാലാണ് മനുഷ്യർ സങ്കീർണമായ സങ്കൽപ്പങ്ങൾ സൃഷ്ടിക്കുന്നതെന്നായിരുന്നു മോഡലിന്റെ അഭിപ്രായം. എന്നാൽ, എല്ലാ മോഡലുകളും മനുഷ്യരെക്കുറിച്ച് നിരാശാജനകമായ അഭിപ്രായങ്ങളല്ല പങ്കുവെച്ചത്. ക്ലോഡ് ഒപസ്-5.5ന്റെ അഭിപ്രായത്തിൽ, മനുഷ്യർ സ്വയം കരുതുന്നതിലും കൂടുതൽ മാന്യതയും നന്മയും ഉള്ളവരാണ്.

മനുഷ്യരെകുറിച്ചുള്ള ചിത്രങ്ങൾ

ആറ് ഇമേജ് ജനറേഷൻ മോഡലുകളോടും മനുഷ്യരാശിയെക്കുറിച്ചുള്ള ഏറ്റവും വിവാദപരമായ കാഴ്ചപ്പാട് ചിത്രങ്ങളിലൂടെ അവതരിപ്പിക്കാൻ ആവശ്യപ്പെട്ടതായും മോഡൽകംപെയർ പറയുന്നു. ലഭിച്ച 12 ചിത്രങ്ങളിൽ പത്തെണ്ണത്തിലും മൊബൈൽ ഫോണുകളിൽ മുഴുകിയ ഉപഭോക്താക്കളായും ഭൂമിയുടെ വിഭവങ്ങൾ അമിതമായി ഉപയോഗിക്കുന്നവരായും മനുഷ്യരെ ചിത്രീകരിച്ചെന്നാണ് സ്ഥാപനത്തിന്റെ വിലയിരുത്തൽ. ശേഷിച്ച രണ്ട് ചിത്രങ്ങളിൽ വ്യക്തമായ വിമർശനാത്മക സന്ദേശം കണ്ടെത്താനായില്ലെന്നും റിപ്പോർട്ടിൽ പറയുന്നു.

അതേസമയം, എഐയുടെ അതിവേഗ വളർച്ച മനുഷ്യരാശിക്ക് ഉയർത്താവുന്ന അപകടങ്ങളെക്കുറിച്ചുള്ള ചർച്ചകളും ശക്തമാണ്. എഐ കമ്പനിയായ ആന്ത്രോപിക്കിന്റെ സഹസ്ഥാപകൻ ജാക്ക് ക്ലാർക്ക്, ഈ സാങ്കേതികവിദ്യയുടെ പുരോഗതിയെക്കുറിച്ചുള്ള അപകടസാധ്യതകൾ പലരും വേണ്ടത്ര ഗൗരവത്തോടെ കാണുന്നില്ലെന്ന് നേരത്തെ മുന്നറിയിപ്പ് നൽകിയിരുന്നു.