ഫ്ലാറ്റിനകത്ത് ഞെട്ടിക്കുന്ന കാഴ്ച, ഉപേക്ഷിച്ച നിലയിൽ 71 പൂച്ചകള്‍, 9 എണ്ണത്തിന് ജീവനില്ല, 33 -കാരിക്ക് 16 ആഴ്ചത്തെ തടവ്

2024 ഫെബ്രുവരി 20-ന് ഫ്ലാറ്റിന്റെ എയർകണ്ടീഷണർ ലെഡ്ജിൽ എല്ലും തോലുമായ ഒരു പൂച്ച കുടുങ്ങിക്കിടക്കുന്നത് അയൽവാസി കണ്ടതോടെയാണ് സംഭവം പുറത്തറിയുന്നത്. ഉടൻ തന്നെ ഇവർ അധികൃതരെ വിവരമറിയിച്ചു.

വൃത്തിഹീനമായ ഫ്ലാറ്റിൽ ഏകദേശം രണ്ട് വർഷത്തോളമായി തിരിഞ്ഞുനോക്കാതെ 71 പൂച്ചകൾ. സംഭവത്തിൽ സിംഗപ്പൂർ യുവതിക്ക് 16 ആഴ്ച തടവുശിക്ഷ. പൂച്ചകളിൽ ഒൻപതെണ്ണം ചാവുകയും, ബാക്കിയുള്ളവ നിർജ്ജലീകരണവും പോഷകാഹാരക്കുറവും മൂലം അവശനിലയിലാവുകയും ചെയ്തിരുന്നു. നൂറുൽ നാദിയ നൂർ മുഹമ്മദ് എന്ന യുവതിക്കാണ് നവംബർ 12-ന് കോടതി ശിക്ഷ വിധിച്ചതെന്ന് 'ദി സ്ട്രെയിറ്റ്സ് ടൈംസ്' റിപ്പോർട്ട് ചെയ്യുന്നു. മൃഗങ്ങളോട് ക്രൂരത കാണിച്ചതുമായി ബന്ധപ്പെട്ട 24 കുറ്റങ്ങൾ ഇവർ സമ്മതിച്ചിരുന്നു. തടവുശിക്ഷയ്ക്ക് പുറമെ, 12 മാസത്തേക്ക് വളർത്തുമൃഗങ്ങളെ വളർത്തുന്നതിൽ നിന്നും ഇവരെ വിലക്കിയിട്ടുണ്ട്.

പൂച്ചകളുടെ എണ്ണം കൂടിയതെങ്ങനെ?

2018-ലാണ് നൂറുലും മുൻ ഭർത്താവ് മുഹമ്മദ് ഖൈറുൾ നയിം സൈനോലും ബുക്കിറ്റ് പഞ്ചാങ്ങിൽ ഫ്ലാറ്റ് വാങ്ങിയത്. തൊട്ടടുത്ത വർഷം ഇവർ വന്ധ്യംകരണം നടത്താത്ത പൂച്ചകളെ വളർത്താൻ തുടങ്ങി. ഇവയെ മറ്റുള്ളവർക്ക് നൽകാൻ ശ്രമിച്ചെങ്കിലും പൂച്ചകൾ അതിവേഗം പെറ്റുപെരുകുകയായിരുന്നു. 2022 ഏപ്രിലിൽ ദമ്പതികൾ പൂച്ചകളെ ഫ്ലാറ്റിൽ ഉപേക്ഷിച്ച് ഖൈറുളിന്റെ മാതാപിതാക്കൾക്കൊപ്പം താമസിക്കാൻ പോയി. ബില്ലുകൾ അടയ്ക്കാത്തതിനെ തുടർന്ന് പിന്നീട് ഫ്ലാറ്റിലെ വൈദ്യുതിയും വെള്ളവും വിച്ഛേദിക്കപ്പെട്ടു.

ആദ്യമൊക്കെ ദിവസവും ഭക്ഷണവും വെള്ളവുമായി എത്താറുണ്ടായിരുന്നെങ്കിലും, ഫ്ലാറ്റിലെ സാഹചര്യം വഷളായതോടെ അകത്തേക്ക് കയറുന്നത് നിർത്തിയെന്ന് ഖൈറുൾ പറഞ്ഞു. പകരം വാതിലിന് പുറത്ത് ഭക്ഷണം വെച്ച് മടങ്ങുകയായിരുന്നു പതിവ്. മിക്ക ദിവസങ്ങളിലും നൂറുലും ഇയാൾക്കൊപ്പം ഉണ്ടായിരുന്നുവെന്ന് കോടതി രേഖകൾ വ്യക്തമാക്കുന്നു.

വിവരം പുറത്തറിഞ്ഞത് ഇങ്ങനെ

2024 ഫെബ്രുവരി 20-ന് ഫ്ലാറ്റിന്റെ എയർകണ്ടീഷണർ ലെഡ്ജിൽ എല്ലും തോലുമായ ഒരു പൂച്ച കുടുങ്ങിക്കിടക്കുന്നത് അയൽവാസി കണ്ടതോടെയാണ് സംഭവം പുറത്തറിയുന്നത്. ഉടൻ തന്നെ ഇവർ അധികൃതരെ വിവരമറിയിച്ചു. ഉദ്യോഗസ്ഥർ ഫ്ലാറ്റിൽ നടത്തിയ പരിശോധനയിൽ ജീവനുള്ള 61 പൂച്ചകളെയും, മൂന്ന് പൂച്ചകളുടെ ജഡങ്ങളും, ആറ് തലയോട്ടികളും, അസ്ഥികൂടങ്ങൾ നിറച്ച ഒരു ബാഗും കണ്ടെത്തി. വിസർജ്യവും അഴുക്കും നിറഞ്ഞ് അമോണിയയുടെ രൂക്ഷഗന്ധം വമിക്കുന്ന നിലയിലായിരുന്നു ഫ്ലാറ്റ്.

രക്ഷപ്പെടുത്തിയ 61 പൂച്ചകൾക്കും കടുത്ത നിർജ്ജലീകരണം സംഭവിച്ചിരുന്നതായി മൃഗഡോക്ടർമാരുടെ പരിശോധനയിൽ വ്യക്തമായി. ഇതിൽ 44 എണ്ണം തീരെ മെലിഞ്ഞ അവസ്ഥയിലും, ഒൻപതെണ്ണം അതീവ ഗുരുതരമായ പോഷകാഹാരക്കുറവ് നേരിടുന്ന നിലയിലുമായിരുന്നുവെന്ന് 'മദർഷിപ്പ്' റിപ്പോർട്ട് ചെയ്യുന്നു.

കോടതിയുടെ വിമർശനം

ഇത്രയധികം മൃഗങ്ങൾക്ക് വാതിൽപ്പടിയിൽ വെക്കുന്ന ഭക്ഷണം തീർത്തും അപര്യാപ്തമായിരുന്നുവെന്ന് നാഷണൽ പാർക്ക്സ് ബോർഡ് വെറ്ററിനറി ഡോക്ടർ വ്യക്തമാക്കി. 16 മുതൽ 24 ആഴ്ച വരെ തടവുശിക്ഷ നൽകണമെന്നാണ് പ്രോസിക്യൂഷൻ ആവശ്യപ്പെട്ടത്. സാമ്പത്തിക ബുദ്ധിമുട്ടുകളും, അസുഖബാധിതനായ പിതാവിനെ പരിചരിക്കേണ്ട ഉത്തരവാദിത്തവും, പൂച്ചകളെ മറ്റുള്ളവർക്ക് നൽകാൻ നേരത്തെ നടത്തിയ ശ്രമങ്ങളും പരിഗണിക്കണമെന്ന് നൂറുലിന്റെ അഭിഭാഷകൻ വാദിച്ചു.

എന്നാൽ, മൃഗങ്ങളെ ഇത്തരത്തിൽ കൂട്ടത്തോടെ ഉപേക്ഷിച്ച ഏറ്റവും ഗൗരവമേറിയ കേസുകളിൽ ഒന്നാണിതെന്ന് ജില്ലാ ജഡ്ജി കെന്നത്ത് ചിൻ നിരീക്ഷിച്ചു. പൂച്ചകൾ പൂർണ്ണമായും ഉടമകളെ ആശ്രയിച്ചാണ് ജീവിച്ചിരുന്നതെന്നും അദ്ദേഹം ചൂണ്ടിക്കാട്ടി. സമാനമായ 24 കുറ്റങ്ങൾ സമ്മതിച്ച നൂറുലിന്റെ മുൻ ഭർത്താവ് ഖൈറുളിനെ (37) സെപ്റ്റംബർ 23-ന് കോടതി 16 ആഴ്ച തടവിന് ശിക്ഷിച്ചിരുന്നു.