20 വർഷങ്ങളുടെ ദുരിതജീവിതം, ചങ്ങലയിൽ നിന്നും മുഫാസ മോചിപ്പിക്കപ്പെട്ടതിങ്ങനെ

മൃഗാവകാശ സംഘടനയായ ആനിമൽ ഡിഫൻഡേഴ്‌സ് ഇന്റർനാഷണൽ, 2015 -ൽ അവന്റെ സ്വാതന്ത്ര്യത്തിന് വേണ്ടി പോരാടുന്നതിന് വേണ്ടി മുന്നിട്ടിറങ്ങി. കിഡ്‍നി തകരാറും പ്രായമായതിന്റെ മറ്റ് പ്രശ്നങ്ങളും അലട്ടുന്ന നിലയിലായിരുന്നു അവർ അവനെ കണ്ടുമുട്ടിയത്.

നമ്മിൽ പലർക്കും മൃ​ഗങ്ങളെ ഇഷ്ടമാണ്. അതേ സമയം തന്നെ അവയെ കഠിനമായി ചൂഷണം ചെയ്യുന്നവരും ഉണ്ട്. അങ്ങനെ ചൂഷണം ചെയ്യപ്പെട്ട ഒരു ജീവിയാണ് ഈ പ്യൂമയും. മുഫാസ എന്നാണ് അവന്റെ പേര്. 20 വർഷത്തെ ദുരിത ജീവിതത്തിനൊടുവിലാണ് മുഫാസ മോചിപ്പിക്കപ്പെട്ടത്. 

പെറുവിലെ ഒരു സർക്കസ് കമ്പനിയിലായിരുന്നു മുഫാസയുടെ ജീവിതം. ആളുകൾക്ക് ആസ്വദിക്കാനും മുതലാളിക്ക് പണമുണ്ടാക്കാനും വേണ്ടി മാത്രം അവനെ ഉപയോ​ഗപ്പെടുത്തി. അവന്റെ ആരോ​ഗ്യത്തെ കുറിച്ച് ആരും ചിന്തിച്ചില്ല, കണക്കിലെടുത്തുമില്ല. എന്നാൽ, മൃ​ഗസംരക്ഷണത്തിന് വേണ്ടി പ്രവർത്തിക്കുന്ന ഒരുകൂട്ടം ആളുകൾ അവന്റെ മോചനത്തിന് വേണ്ടി പ്രവർത്തിച്ചു കൊണ്ടിരുന്നു. 

നിരവധിക്കണക്കിന് മൃ​ഗങ്ങൾ സമാനമായ തരത്തിൽ അവ​ഗണനയും ചൂഷണവും നേരിട്ടുകൊണ്ട് ലോകത്തിന്റെ വിവിധയിടങ്ങളിൽ കഴിയുന്നുണ്ട്. സഞ്ചരിച്ചു കൊണ്ട് സർക്കസ് അവതരിപ്പിക്കുന്ന ഒരു സർക്കസ് സംഘത്തിലെ അം​ഗമെന്ന നിലയിൽ ഒരു പിക്കപ്പ് വാനിന്റെ പിൻഭാ​ഗമായിരുന്നു 20 വർഷമായി അവന്റെ വാസസ്ഥലം. 

എന്നാൽ, മൃഗാവകാശ സംഘടനയായ ആനിമൽ ഡിഫൻഡേഴ്‌സ് ഇന്റർനാഷണൽ, 2015 -ൽ അവന്റെ സ്വാതന്ത്ര്യത്തിന് വേണ്ടി പോരാടുന്നതിന് വേണ്ടി മുന്നിട്ടിറങ്ങി. കിഡ്‍നി തകരാറും പ്രായമായതിന്റെ മറ്റ് പ്രശ്നങ്ങളും അലട്ടുന്ന നിലയിലായിരുന്നു അവർ അവനെ കണ്ടുമുട്ടിയത്. ഒടുവിൽ സംഘടനയുടെ പരിശ്രമം വിജയം കണ്ടു. ജീവിതത്തിന്റെ അവസാന വർഷങ്ങൾ അവന് പ്രകൃതിയിൽ കഴിയാനുള്ള ഭാ​ഗ്യം ലഭിച്ചു എന്ന് അർത്ഥം. 

എന്നാൽ, ഒരുപാട് കാലമൊന്നും ആ ജീവിതം ആസ്വദിക്കാൻ അവന് സാധിച്ചില്ല. വർഷങ്ങൾ നീണ്ടുനിന്ന ചൂഷണം അവനെ തളർത്തിയിരുന്നു. മോചിപ്പിക്കപ്പെട്ട് അധികം വർഷങ്ങൾ വൈകാതെ തന്നെ നേരത്തെ അവനെ അലട്ടിയിരുന്ന അസുഖങ്ങളാൽ അവൻ മരണപ്പെട്ടു.