മടുത്തു, എത്ര അലഞ്ഞിട്ടും ഒന്നും ശരിയാകുന്നില്ല, ഫ്രീയായി ജോലി ചെയ്യാൻ തയ്യാർ; സിവി പങ്കുവച്ച് യുവാവ്

തന്റെ കഴിവ് തെളിയിക്കാനും എക്സ്പീരിയൻസിനും വേണ്ടി വർക്ക് ഫ്രം ഹോം ആയി ഫ്രീയായി ജോലി ചെയ്യാൻ താൻ തയ്യാറാണ് എന്നാണ് യുവാവ് പറയുന്നത്.

പല യുവാക്കളും അനുഭവിക്കുന്ന ഒരു പ്രധാന പ്രശ്നമാണ് തൊഴിലില്ലായ്മ. അതുപോലെ, ബെം​ഗളൂരുവിൽ നിന്നുള്ള ഒരു ടെക്കിയുടെ പോസ്റ്റാണ് ഇപ്പോൾ റെഡ്ഡിറ്റിൽ വൈറലായി കൊണ്ടിരിക്കുന്നത്. സോഫ്റ്റ്‍വെയർ എഞ്ചിനീയറായ യുവാവ് പറയുന്നത്, 2023 -ലാണ് താൻ പഠനം കഴിഞ്ഞ് ഇറങ്ങിയത്. പക്ഷേ, തനിക്ക് ഒരു ഫുൾ ടൈം ജോലി കണ്ടെത്താൻ കഴിഞ്ഞില്ല എന്നാണ്. 

അതിനാൽ എക്സ്പീരിയൻസിന് വേണ്ടി ഫ്രീയായി ജോലി ചെയ്യാൻ പോലും താൻ തയ്യാറാണ് എന്നാണ് യുവാവ് പറയുന്നത്. ഒപ്പം തന്റെ പേര് പോലെയുള്ള അടിസ്ഥാന വിവരങ്ങൾ മറച്ചുവച്ചുകൊണ്ടുള്ള തന്റെ സിവിയും യുവാവ് പോസ്റ്റ് ചെയ്തിട്ടുണ്ട്. എത്രയും പെട്ടെന്ന് ഒരു ജോലി വേണമെന്നും ഫ്രീയായി ജോലി ചെയ്യാൻ തയ്യാറാണ് എന്നുമാണ് യുവാവ് തന്റെ പോസ്റ്റിൽ പറയുന്നത്. 

താൻ 2023 -ലാണ് ബി.ഇ. ഇൻഫർമേഷൻ സയൻസ് ആൻഡ് എഞ്ചിനീയറിംഗിൽ ബിരുദം നേടിയിറങ്ങിയത് എന്നും ജോലി കണ്ടെത്താൻ പാടുപെടുകയാണ് എന്നും യുവാവ് പറയുന്നു. ഒപ്പം, എന്തിലൊക്കെയാണ് താൻ സ്പെഷ്യലൈസ് ചെയ്തിരിക്കുന്നത് എന്നും യുവാവ് തന്റെ പോസ്റ്റിൽ വ്യക്തമാക്കുന്നുണ്ട്. രണ്ട് കമ്പനികളിൽ ഓരോ മാസം ഇന്റേൺഷിപ്പ് ചെയ്തിട്ടുണ്ട് എന്നും യുവാവിന്റെ പോസ്റ്റിൽ കാണാം. 

തന്റെ കഴിവ് തെളിയിക്കാനും എക്സ്പീരിയൻസിനും വേണ്ടി വർക്ക് ഫ്രം ഹോം ആയി ഫ്രീയായി ജോലി ചെയ്യാൻ താൻ തയ്യാറാണ് എന്നാണ് യുവാവ് പറയുന്നത്. എന്തായാലും ഒരുപാട് പേരാണ് യുവാവിന്റെ പോസ്റ്റിന് കമന്റുകൾ നൽകിയിരിക്കുന്നത്. ചിലരെല്ലാം യുവാവിനോട് മെസ്സേജ് അയക്കൂ പരി​ഗണിക്കാം എന്ന് പറഞ്ഞിട്ടുണ്ട്. മറ്റ് ചിലർ പറഞ്ഞത് മിക്ക കമ്പനികളും ഇപ്പോൾ വർക്ക് ഫ്രം ഹോം നിർത്തലാക്കുകയാണ് അതിനാൽ ഓഫീസിൽ പോയി ജോലി ചെയ്യാൻ കൂടി തയ്യാറാകൂ എന്നാണ്.