അറുപതുകളില്‍ സാഹസിക യാത്രയ്ക്ക്, ആറ് വര്‍ഷമായി കടലില്‍ തനിച്ച് യാത്ര ചെയ്യുകയാണ് ക്രിസ്

സ്വന്തമായി ഒരു ബോട്ട് നേടിക്കഴിഞ്ഞാല്‍ കടലിലേക്ക് ചെല്ലാന്‍ വലിയ പ്രയാസം ഒന്നുമില്ലെന്നും ദിവസങ്ങളോളം കടലില്‍ യാത്ര ചെയ്യാമെന്നും അദ്ദേഹം പറയുന്നു. 

ക്രിസ് അയേഴ്സിന്(Chris Ayres) അന്ന് 66 വയസായിരുന്നു. നിരവധിയാളുകള്‍ സാഹസിക യാത്രകള്‍ക്ക് ഇറങ്ങിപ്പുറപ്പെടുന്നതിനെ കുറിച്ച് അദ്ദേഹം കേട്ടിട്ടുണ്ടായിരുന്നു. അങ്ങനെയാണ് ക്രിസും എന്നാല്‍ അതൊന്ന് നോക്കിയാലോ എന്ന് ചിന്തിക്കുന്നത്. അദ്ദേഹത്തോടൊപ്പം വരാമെന്നേറ്റ സുഹൃത്ത് പിന്നീട് പിൻവാങ്ങി. എന്നാല്‍, അദ്ദേഹം കപ്പൽയാത്രയ്ക്ക് തയ്യാറായി. "ഞാൻ മുമ്പ് ഒറ്റയ്ക്ക് യാത്ര ചെയ്തിരുന്നു, പക്ഷേ ഒരു ദിവസത്തേക്കോ മറ്റോ ആയിരുന്നു.” ഷെഫീൽഡിലെ(Sheffield) വീട്ടിൽ നിന്ന് അദ്ദേഹം പറയുന്നു. 

ആദ്യം അയേഴ്സിന് അസ്വസ്ഥതയും പരിഭ്രമവും തോന്നി. ഇടിമുഴക്കങ്ങളും മിന്നൽപ്പിണരുകളും ഉണ്ടായിരുന്നു. പക്ഷേ, എന്നിട്ടും യാത്രയെ കുറിച്ച് പറയുമ്പോള്‍ അദ്ദേഹം ആവേശഭരിതനാകുന്നു: “നിങ്ങൾ തീരത്ത് നിന്ന് അകന്നുപോയാൽ, വെള്ളത്തിന്റെ നീലനിറം നിങ്ങൾ മനസ്സിലാക്കും. അത് ശരിക്കും നീലയാണ്.” 

73 വയസ്സുള്ള അയേഴ്സ് വിവാഹമോചിതനാണ്. രണ്ട് മുതിർന്ന കുട്ടികളുണ്ട്. ഒരു കൗമാരക്കാരനായിരുന്നപ്പോൾ, ലേക്ക് ഡിസ്ട്രിക്റ്റിലേക്കുള്ള ഒരു യാത്രയിൽ, കടലിനെക്കാൾ പർവതങ്ങളെയാണ് അവൻ സ്നേഹിച്ചത്. പിന്നീട് അദ്ദേഹം ഒരു ക്ലൈംബിംഗ് ഇൻസ്ട്രക്ടറായും മൗണ്ടൻ ഗൈഡായും ജോലി ചെയ്തു. പര്‍വതങ്ങളില്‍ യാത്ര ചെയ്യുന്നതും കടലില്‍ യാത്ര ചെയ്യുന്നതും ഒരുപോലെയാണ് എന്നും അദ്ദേഹം പറയുന്നു. രണ്ടും നമുക്ക് സ്വാതന്ത്ര്യം തരുന്നു എന്നും. 

അയേഴ്സിന്റെ ആദ്യ കപ്പൽയാത്ര അനുഭവം, അദ്ദേഹത്തിന്റെ സുഹൃത്തായ ഡോൺ ബ്രൗണിനൊപ്പമാണ്. അത് 2001 -ൽ, അയേഴ്സിന് 53 വയസ്സുള്ളപ്പോൾ ആയിരുന്നു. അപ്പോഴാണ് തനിക്ക് സ്വന്തമായി ഒരു ബോട്ട് വേണമെന്നും യാത്ര ചെയ്യണമെന്നും അദ്ദേഹത്തിന് തോന്നുന്നത്. എപ്പോഴും അദ്ദേഹം കരുതിയിരുന്നത് കടലില്‍ യാത്ര ചെയ്യുക എന്നത് പണക്കാര്‍ക്ക് മാത്രം പറഞ്ഞിട്ടുള്ള കാര്യമാണ് എന്നായിരുന്നു. അങ്ങനെ അദ്ദേഹം ഒരു ചെറിയ ബോട്ട് വാങ്ങി. പിന്നീട് മാതാപിതാക്കള്‍ മരിച്ചപ്പോള്‍ വലിയ ഒന്ന് വാങ്ങി. സീബിയര്‍ എന്നായിരുന്നു അതിന്‍റെ പേര്. 

"അതോടെ എനിക്ക് മനസ്സിലായി. എനിക്ക് ഈ ബോട്ടിൽ യാത്ര ചെയ്യാം. എനിക്ക് ലോകം മുഴുവൻ സഞ്ചരിക്കാം. എന്നിലുണ്ടായിരുന്ന കടല്‍ യാത്ര എന്ന സ്വപ്നത്തെ അത് ഉണർത്തി." അദ്ദേഹം ദ ഗാര്‍ഡിയനോട് പറയുന്നു. 2014 -ൽ സീബിയറിൽ കയറിയതിനു ശേഷം അദ്ദേഹം സ്പെയിൻ, പോർച്ചുഗൽ, കേപ് വെർദെ, അറ്റ്ലാന്റിക് കടന്ന് മാർട്ടിനിക് വരെ സഞ്ചരിച്ചു. തുടർന്ന് കരീബിയൻ പര്യവേക്ഷണം ചെയ്തു. 

സ്വന്തമായി ഒരു ബോട്ട് നേടിക്കഴിഞ്ഞാല്‍ കടലിലേക്ക് ചെല്ലാന്‍ വലിയ പ്രയാസം ഒന്നുമില്ലെന്നും ദിവസങ്ങളോളം കടലില്‍ യാത്ര ചെയ്യാമെന്നും അദ്ദേഹം പറയുന്നു. കൊവിഡ് -19 വ്യാപകമായ സമയത്ത് അദ്ദേഹം പസഫിക് കടന്ന് ന്യൂസിലാൻഡിൽ എത്തി. അപ്പോഴേക്കും അയേഴ്സ് ആറ് വർഷമായി കടലില്‍ യാത്ര ചെയ്യുകയായിരുന്നു. അദ്ദേഹം സീബിയര്‍ ഒരു കപ്പലിൽ കയറ്റി നാട്ടിലേക്ക് അയച്ച ശേഷം വിമാനത്തിലാണ് തിരികെ എത്തിയത്. ഇപ്പോഴദ്ദേഹം പുതിയ യാത്രക്കായി കാത്തിരിക്കുന്നു.