അമ്പമ്പോ എത്ര മനോഹരമായ കാഴ്ച; അറ്റക്കാമ മരുഭൂമിയിൽ പൂക്കളുടെ വസന്തകാലം

കാലാവസ്ഥ വ്യതിയാനം മൂലം വരൾച്ച രൂക്ഷമായ ഈ പ്രദേശത്ത് കുഞ്ഞുകുഞ്ഞു പൂക്കളുടെ പൂക്കാലം എത്തിയതിനെ കൗതുകത്തോടെയാണ് ​ഗവേഷകർ കാണുന്നത്.

ലോകത്തിലെ ഏറ്റവും വരണ്ട മരുഭൂമിയായ ചിലിയിലെ അറ്റക്കാമയിൽ പൂക്കളുടെ വസന്തകാലം. അപൂർവമായിട്ടാണ് അറ്റക്കാമയിൽ പൂവുകൾ വിരുന്നെത്താറുള്ളത്. വിനോദ സഞ്ചാരികളെയും ​ഗവേഷകരെയും ഒരേപോലെ ആകർഷിച്ചിരിക്കുകയാണ് വിവിധ നിറങ്ങളാൽ മരുഭൂമിയെ മനോഹരമാക്കിയ ഈ പൂവുകൾ.

പ്രതിവർഷം 2 മില്ലീമീറ്റർ മാത്രം മഴയാണ് അറ്റക്കാമയിൽ പെയ്യാറുള്ളത്. അതുകൊണ്ടാണ് ലോകത്തിലെ ഏറ്റവും വരണ്ട സ്ഥലമായി ഇത് മാറിയതും. എന്നാൽ ഈ വർഷം അറ്റക്കാമയിൽ താരതമ്യേന കൂടുതൽ മഴ ലഭിച്ചിരുന്നു. ഇതാവാം മരുഭൂമിയിലെ ഈ പൂക്കാലത്തിന് പിന്നിലെന്നാണ് കരുതപ്പെടുന്നത്.

പ്രകൃതി ഒരുക്കിവെച്ചിരിക്കുന്ന ഈ 'നാച്ചുറൽ ഫ്ലവർ ഷോ' കാണാൻ നിരവധി സഞ്ചാരികളാണ് ഇവിടേക്ക് എത്തുന്നത്. ചിലർ ചിലിയുടെ തലസ്ഥാനമായ സാന്റിയാ​ഗോയിൽനിന്നും 800 കിലോമീറ്റർ ട്രക്ക് ചെയ്തും മരുഭൂമിയിലെ ഈ വസന്തം കാണാൻ വരുന്നുണ്ട്. പിങ്ക്, പർപ്പിൾ, വയലറ്റ്, വെള്ള, മഞ്ഞ, നീല, ചുവപ്പ് നിറങ്ങളിലുള്ള പൂക്കളാണ് വിരിഞ്ഞിരിക്കുന്നത്. വേനലിന്റെ വരവ് വരെയായിരിക്കും ഈ പൂക്കളുടെ ആയുസ്. നവംബറോടെ ഈ പൂക്കാലം അവസാനിക്കും. എന്നാൽപ്പോലും ഈ ചെടികളിൽ ചിലതിന് ഉയർന്ന താപനിലയെ അതിജീവിക്കാനായേക്കും.

'ഡെസൈർട്ടോ ഫ്ലോറിഡോ', 'ഡെസേർട്ട് ബ്ലൂം' എന്നൊക്കെയാണ് മരുഭൂമിയിലെ പൂക്കാല പ്രതിഭാസത്തെ വിശേഷിപ്പിക്കാറുള്ളത്. മരുഭൂമി മുഴുവൻ പൂക്കളുടെ പട്ടുമെത്ത വിരിഞ്ഞ പോലെ നിറങ്ങളാൽ സുന്ദരമാകുന്നതാണ് ഈ കാഴ്ച. 200 -ൽ അധികം സ്പീഷീസുകളിലുള്ള ചെടികളുടെ വിത്തുകൾ ഈ മരുഭൂമിയിൽ മഴകാത്ത് കിടക്കുന്നുണ്ടെന്നാണ് വിദ​ഗ്ധർ പറയുന്നത്. കുറഞ്ഞത് 15 മില്ലീ മീറ്റർ എങ്കിലും മഴ ലഭിച്ചാലേ ഇവയ്ക്ക് വളരാനാകൂ. ഇക്കൊല്ലം അസാധാരണമായി പെയ്ത മഴ മരുഭൂമിയുടെ താഴ്‍വരകളെയും ഉയർന്ന പ്രദേശങ്ങളെയും നനച്ചു. ഇതോടൊപ്പം തന്നെ അന്തരീക്ഷ താപനിലയിലുണ്ടായ മാറ്റങ്ങളും സൂര്യപ്രകാശവും ഈർപ്പവും എല്ലാം ചേർന്നാണ് ഈ പൂക്കാലത്തെ മരുഭൂമിയിൽ അനുഭവവേദ്യമാക്കിയത്. സമീപ വർഷങ്ങളിൽ അറ്റാക്കാമയിൽ ഏറ്റവുമധികം മഴ ലഭിച്ച വർഷമായിട്ടാണ് 2025 കണക്കാക്കപ്പെടുന്നത്.

കാലാവസ്ഥ വ്യതിയാനം മൂലം വരൾച്ച രൂക്ഷമായ ഈ പ്രദേശത്ത് കുഞ്ഞുകുഞ്ഞു പൂക്കളുടെ പൂക്കാലം എത്തിയതിനെ കൗതുകത്തോടെയാണ് ​ഗവേഷകർ കാണുന്നത്. ഈ പൂക്കളുടെ വരവ് വരൾച്ചയ്ക്ക് മറുമരുന്നാകുമോ എന്ന പഠനങ്ങളും നടക്കുന്നുണ്ട്. ഈ കുഞ്ഞൻ ചെടികൾക്ക് വരൾച്ചയെയും കഠിനമായ താപനിലയെയും അതിജീവിക്കാൻ കഴിയുമോ എന്ന പഠനങ്ങളും സജീവമാണ്.

ഒരു ലക്ഷത്തിലേറെ ചതുരശ്ര കിലോമീറ്ററാണ് അറ്റക്കാമയുടെ വിസ്തീർണം. ഈ അറ്റക്കാമയെ ചുറ്റിപ്പറ്റി പല അന്ധവിശ്വാസങ്ങളും കഥകളും പ്രചരിക്കാറുണ്ട്. അറ്റക്കാമ മരുഭൂമിയിൽ ഏലിയൻസിന്റെ സാന്നിധ്യമുണ്ട് എന്നതാണ് അതിൽ ഏറെ പ്രചാരമുള്ള ഒരു കഥ.