Pink Floyd flamingo : 17 വർഷങ്ങൾക്ക് മുമ്പ് മൃ​ഗശാലയിൽ നിന്നും മുങ്ങി, ഫ്ലമിം​ഗോയെ ടെക്സാസിൽ കണ്ടെത്തി

2003 -ലാണ് മൂന്ന് വയസ്സ് പ്രായമുള്ളപ്പോൾ പിങ്ക് ഫ്ളോയിഡിനെ സെഡ്ഗ്വിക്ക് കൗണ്ടി മൃഗശാലയിലെത്തിക്കുന്നത്. ആഫ്രിക്കയിലെ ടാൻസാനിയയിൽ നിന്ന് കൊണ്ടുവന്ന 40 ഫ്ലമിം​ഗോകളിൽ ഒന്നായിരുന്നു അത്.

17 വർഷങ്ങൾക്ക് മുമ്പ് കാൻസാസിലെ മൃ​ഗശാലയിൽ നിന്നും ഒരു ഫ്ലമിം​ഗോ(flamingo) രക്ഷപ്പെടുകയുണ്ടായി. പേര് പിങ്ക് ഫ്ലോയ്‍ഡ്(Pink Floyd). അതിനെ ഇപ്പോൾ ഇത്രയും വർഷങ്ങൾക്ക് ശേഷം ടെക്സാസി(Texas)ൽ കണ്ടെത്തിയിരിക്കുകയാണ്. അതിന്റെ ചിറകിൽ ക്ലിപ്പ് വയ്ക്കുന്നതിന് തൊട്ടുമുമ്പാണ് സെഡ്ഗ്വിക്ക് കൗണ്ടി മൃഗശാലയില്‍ നിന്ന് അധികൃതരുടെ കണ്ണുവെട്ടിച്ച് ഈ ആഫ്രിക്കൻ ഫ്ലമിം​ഗോ കടന്നു കളഞ്ഞത്. അന്ന് ഒരുപാട് പക്ഷികൾ പറന്നു കളഞ്ഞുവെങ്കിലും പിങ്ക് ഫ്ലോയ്ഡും മറ്റൊന്നുമാണ് തിരികെ എത്താതിരുന്നത്. കുറച്ച് ദിവസങ്ങൾ അത് അധികം ദൂരെയല്ലാതെ ഉണ്ടായിരുന്നു. എന്നാൽ, തുടർന്ന് ജൂലൈ 4 -ന് വലിയ ഇടിമിന്നലുണ്ടായി ആ സമയത്താണ് അത് പറന്നുപോയത് എന്ന് കരുതുന്നു. -

അങ്ങനെ ആയിരത്തിലധികം കിലോമീറ്ററുകൾ യാത്ര ചെയ്‍ത് ഇത് നേരെ ചെന്നെത്തിയത് ടെക്സാസിൽ. ഈ മാസമാദ്യം മത്സ്യബന്ധനത്തിന് പോയ ഫിഷിം​ഗ് ​ഗൈഡായ ഡേവിഡ് ഫോർമാൻ എന്നയാളാണ് ഇതിനെ കാണുന്നതും ശ്രദ്ധിക്കുന്നതും. സാധാരണയായി തെക്കൻ ടെക്സാസിൽ ഇങ്ങനെ ഫ്ലമിം​ഗോയെ കാണാറേ ഇല്ല. അതിനാൽ തന്നെ കൗതുകം തോന്നിയ ഫോർമാൻ പക്ഷിയുടെ ചിത്രമെടുത്ത് സാമൂഹിക മാധ്യമങ്ങളിൽ പോസ്റ്റ് ചെയ്തു. പിന്നാലെയാണ് ഇത് കാൻസാസിൽ നിന്നും കടന്നു കളഞ്ഞ പിങ്ക് ഫ്ലോയ്‍ഡ് ആണോ എന്ന സംശയം ഉയർന്നത്. 

ഈ ഫ്ലമിം​ഗോ പ്രാദേശികമായി അറിയപ്പെട്ടിരുന്ന no492 എന്നെഴുതിയ ടാ​ഗ് അതിന്റെ കാലിലുണ്ടായിരുന്നു. കഴിഞ്ഞ വർഷവും ഇതേ പ്രദേശത്ത് ഇതേ ഫ്ലമിം​ഗോയെ കണ്ടതായി ടെക്സാസ് പാര്‍ക്ക്സ് ആന്‍ഡ് വൈല്‍ഡ്ലൈഫ് വകുപ്പിലെ ജൂലി ഹേഗനും പറയുകയുണ്ടായി. പിങ്ക് ഫ്ലോയ്ഡിനെ കൂടാതെ ഒരു കരീബിയൻ ഫ്ലമിം​ഗോയും പ്രദേശത്ത് ഉണ്ടായിരുന്നതായി പറയുന്നു. അത് ചുഴലിക്കാറ്റിൽ നിന്നും രക്ഷ തേ‌ടിയാവും അവിടെ എത്തിയത് എന്നാണ് കരുതുന്നത്. 

സാധാരണയായി ഭക്ഷണം കുറയുമ്പോഴും പ്രത്യുൽപാദനത്തിനോ വേണ്ടിയും മാത്രം യാത്ര ചെയ്‍തുപോകുന്ന പക്ഷികളാണ് ഫ്ലമിം​ഗോകൾ. 2003 -ലാണ് മൂന്ന് വയസ്സ് പ്രായമുള്ളപ്പോൾ പിങ്ക് ഫ്ളോയിഡിനെ സെഡ്ഗ്വിക്ക് കൗണ്ടി മൃഗശാലയിലെത്തിക്കുന്നത്. ആഫ്രിക്കയിലെ ടാൻസാനിയയിൽ നിന്ന് കൊണ്ടുവന്ന 40 ഫ്ലമിം​ഗോകളിൽ ഒന്നായിരുന്നു അത്. ഇപ്പോൾ 20 വയസാണ് പ്രായം. ഏതായാലും പുതിയ നാടും കൂടും തേടി പിങ്ക് ഫ്ലോയ്‍ഡ് ഇനിയും പറക്കുമെന്നാണ് കരുതുന്നത്.