50 വർഷമായി ആശുപത്രിയിൽ പോയിട്ടില്ല! 102-ാം വയസ്സിലും ചുറുചുറുക്കോടെ 'ഓൾഡ് ബേബി', രഹസ്യം

ചൈനയിൽ നിന്നുള്ള 102 വയസ്സുകാരിയായ ജിൻ ബാവോലിംഗ്, കഴിഞ്ഞ 50 വർഷമായി ആശുപത്രിയിൽ പോകാതെ ആരോഗ്യത്തോടെ ജീവിക്കുകയാണത്രെ. 'ഓൾഡ് ബേബി' എന്നാണ് ഇവരെ വിളിക്കുന്നത്. ഈ ദീര്‍ഘായുസിന്‍റെ രഹസ്യം ഇതാണ്. 

കിഴക്കൻ ചൈനയിൽ നിന്നുള്ള 102 വയസ്സുകാരിയായ മുത്തശ്ശി തന്റെ പോസിറ്റീവ് മനോഭാവം കൊണ്ടും ലളിതമായ ജീവിതശൈലി കൊണ്ടും ആളുകളുടെ ശ്രദ്ധ പിടിച്ചുപറ്റിയിരിക്കുകയാണ്. നൂറ്റിരണ്ടാം വയസ്സിലും അവർ നയിക്കുന്ന ആരോഗ്യകരവും സന്തോഷകരവുമായ ജീവിതം പലരെയും അത്ഭുതപ്പെടുത്തുന്നു. ഷെജിയാങ് പ്രവിശ്യയിലെ തൈഷൗവിലുള്ള ഗ്രാമപ്രദേശത്ത് താമസിക്കുന്ന ജിൻ ബാവോലിംഗ് ആണ് വാർത്തകളിൽ ഇടം പിടിച്ച ഈ മുത്തശ്ശി.

ജിൻ ബാവോലിംഗിന്റെ ദീർഘായുസ്സും സന്തോഷകരമായ സ്വഭാവവും കാരണം ഗ്രാമവാസികൾ അവരെ സ്നേഹത്തോടെ "ഓൾഡ് ബേബി" എന്ന് വിളിക്കുന്നു. തൈഷൗ ഈവനിംഗ് ന്യൂസ് റിപ്പോർട്ട് പ്രകാരം, അവർ മാനസികമായും ശാരീരികമായും അതീവ ആരോഗ്യവതിയാണ്. കഴിഞ്ഞ 50 വർഷമായി അവർക്ക് ഒരു ആശുപത്രിയിൽ പോലും പോകേണ്ടി വന്നിട്ടില്ല എന്നത് ഏറെ ശ്രദ്ധേയമാണ്.

ജിന്നിന്റെ ദൈനംദിന ദിനചര്യ വളരെ ലളിതവും ശാന്തവുമാണ്. രാവിലെ 9 മണിയോടെ ഉണരുന്ന അവർ, മുഖവും കൈകളും കഴുകിയ ശേഷം തന്റെ തോട്ടത്തിലിരുന്ന് വെയിൽ ആസ്വദിക്കുന്നു.

പകൽ സമയത്ത് അവർ പലതവണ ചെറിയ ചെറിയ ഉറക്കം പാസാക്കും. സാധാരണയായി രാത്രി 7 മണിയോടെ ഉറങ്ങാൻ പോകും. മകൻ ഹു ഹുവാമേയ് പറയുന്നതനുസരിച്ച്, അവർക്ക് ഒരു ദിവസം 15 മണിക്കൂർ വരെ ഉറങ്ങാൻ സാധിക്കും. ജിൻ തന്റെ ഭക്ഷണക്രമത്തിൽ വളരെയധികം ശ്രദ്ധ പുലർത്തുന്നു. പ്രഭാതഭക്ഷണത്തിന് ഡംപ്ലിംഗ്‌സ്, ബൺസ്, അല്ലെങ്കിൽ വോൺടൺസ് എന്നിവയാണ് അവർക്ക് കൂടുതൽ ഇഷ്ടം. ഉച്ചഭക്ഷണത്തിനും അത്താഴത്തിനുമായി പ്രധാനമായും വലിയ പാത്രം നിറയെ നൂഡിൽസോ ചോറോ ആണ് അവർ കഴിക്കാറുള്ളത്.

അവരുടെ ഭക്ഷണത്തിൽ ഇറച്ചിക്ക് വലിയ പ്രാധാന്യമുണ്ട്. പന്നിയിറച്ചി അവർക്ക് ഏറെ പ്രിയപ്പെട്ടതാണ്, ഇത് അവർ ദിവസവും കഴിക്കാറുണ്ട്. ഓരോ നേരത്തെ ഭക്ഷണത്തിലും ഏകദേശം അര പൗണ്ട് (രണ്ടോ മൂന്നോ കഷണങ്ങൾ) പന്നിയിറച്ചി അവർ കഴിക്കുന്നു. പ്രധാന ഭക്ഷണങ്ങൾക്ക് പുറമെ കേക്ക്, ബ്രെഡ് തുടങ്ങിയ ലഘുഭക്ഷണങ്ങളും ജിൻ ആസ്വദിക്കാറുണ്ട്. ബ്രൗൺ ഷുഗറും ഈന്തപ്പഴവും ചേർത്ത ചായയാണ് അവർ കുടിക്കുന്നത്. കൂടാതെ ദിവസവും മൂന്ന് ഓറഞ്ചും രണ്ട് മുട്ടയും അവർ ഭക്ഷണത്തിൽ ഉൾപ്പെടുത്തുന്നു. ഓരോ നേരത്തെ ഭക്ഷണത്തോടൊപ്പവും ജിൻ അല്പം വൈൻ കുടിക്കാറുണ്ട്.

കാൽമുട്ടുകൾക്ക് വഴക്കം കുറവായതിനാൽ നടക്കാൻ സഹായം ആവശ്യമാണെങ്കിലും, ജിന്നിന്റെ കാഴ്ചശക്തിയും കൈകളുടെ കരുത്തും ഇപ്പോഴും മികച്ചതാണ്. അവർ ഇപ്പോഴും സ്വയം സോക്സുകൾ തുന്നുകയും ചെരിപ്പിന്റെ അടിവശം നന്നാക്കുകയും ചെയ്യാറുണ്ട്.

അമ്മയുടെ ആരോഗ്യത്തിന്റെ പ്രധാന രഹസ്യം അവരുടെ പോസിറ്റീവ് മനോഭാവമാണെന്ന് മകൻ പറയുന്നു. തന്റെ അമ്മ ആരോടും വഴക്കിടാറില്ലെന്നും ജീവിതത്തിലെ ഏത് പ്രശ്നങ്ങളെയും വളരെ വേഗത്തിൽ അതിജീവിക്കാറുണ്ടെന്നും അദ്ദേഹം കൂട്ടിച്ചേർത്തു.

ജീവിതകാലം മുഴുവൻ ഒരു സാധാരണ ഗ്രാമീണ വീട്ടമ്മയായി കഴിഞ്ഞ ജിൻ, കുടുംബത്തിലെ സ്നേഹത്തിനും ഐക്യത്തിനുമാണ് ഏറ്റവും കൂടുതൽ പ്രാധാന്യം നൽകുന്നത്. തന്റെ കുടുംബം എപ്പോഴും സമാധാനത്തിലും ഐശ്വര്യത്തിലും കഴിയണമെന്നതാണ് അവരുടെ ഏറ്റവും വലിയ ആഗ്രഹം.