രാവിലെ ജഡ്ജി, രാത്രി 'ഒൺലി ഫാൻസി'ൽ, യുഎസ്സിൽ ജഡ്ജിയെ പുറത്താക്കി

ഒട്ടും പ്രൊഫഷണലല്ലാത്ത പെരുമാറ്റം കാഴ്ച വച്ചു എന്ന് ആരോപിച്ചാണ് ഇപ്പോൾ ​ഗ്രി​ഗറിയെ അധികാരികൾ പുറത്താക്കിയിരിക്കുന്നത്.

ഒൺലി ഫാൻസിൽ അക്കൗണ്ട് ഉണ്ട് എന്ന് കണ്ടെത്തിയതിനെ തുടർന്ന് യുഎസ്സിലെ ഒരു ജഡ്ജിക്ക് തന്റെ ജോലി നഷ്ടപ്പെട്ടു. 2020 -ലാണ് 33 വയസുള്ള ജഡ്ജി കൂടിയായ ​ഗ്രി​ഗറി ലോക്ക്, ഒൺലി ഫാൻസിൽ ഒരു അക്കൗണ്ട് തുടങ്ങുന്നത്. മാസത്തിൽ ഏകദേശം ആയിരം രൂപ ഈടാക്കുന്ന ഈ അക്കൗണ്ടിൽ തന്റെ നൂറ് ചിത്രങ്ങളും വീഡിയോകളും ​ഗ്രി​ഗറി പോസ്റ്റ് ചെയ്തിട്ടുണ്ട്.

അതുപോലെ JustFor.Fans -ന് വേണ്ടി മറ്റൊരു അക്കൗണ്ട് കൂടി ​ഗ്രി​ഗറിക്കുണ്ട്. ഇതിന് 800 രൂപയ്‍ക്ക് മുകളിലാണ് നിരക്ക് ഈടാക്കുന്നത്. റിപ്പോർട്ടുകൾ പ്രകാരം ഏറെക്കുറെ ന​ഗ്നമായ അനേകം ചിത്രങ്ങളും അശ്ലീലം കലർന്ന ഉള്ളടക്കങ്ങളും ജഡ്ജിയുടെ ഈ അക്കൗണ്ടുകളിലുണ്ട് എന്ന് പറയുന്നു. അതുപോലെ ട്വിറ്റർ, ഇൻസ്റ്റ​ഗ്രാം അക്കൗണ്ടിലും ​ഗ്രി​ഗറി തന്റെ അർദ്ധന​ഗ്നചിത്രങ്ങൾ പോസ്റ്റ് ചെയ്യാറുണ്ട്. അതിൽ താൻ ഒരു ജഡ്ജി ആണ് എന്നും ​ഗ്രി​ഗറി വ്യക്തമാക്കുന്നുണ്ട്. 

അതുപോലെ ജഡ്ജിയായുള്ള തന്റെ ജോലിക്കിടയിൽ പ്രൊഫഷണലായിട്ടല്ല മോശമായിട്ടാണ് ഇയാൾ പെരുമാറിയിരുന്നത് എന്നുള്ള പരാതികളും നിലനിൽക്കുന്നുണ്ട്. ഒട്ടും പ്രൊഫഷണലല്ലാത്ത പെരുമാറ്റം കാഴ്ച വച്ചു എന്ന് ആരോപിച്ചാണ് ഇപ്പോൾ ​ഗ്രി​ഗറിയെ അധികാരികൾ പുറത്താക്കിയിരിക്കുന്നത്. 'രാവിലെ വൈറ്റ് കോളർ പ്രൊഫഷണൽ. രാത്രി അൺപ്രൊഫഷണൽ. പക്വതയില്ലാത്ത, ബുദ്ധിയില്ലാത്ത, പരുക്കനായ' എന്നാണ് ​ഗ്രി​ഗറിയുടെ ഒൺലി ഫാൻസ് ഡിസ്ക്രിപ്ഷനിൽ നൽകിയിരിക്കുന്നത്. 

ന്യൂയോർക്ക് സിറ്റിയിലെ അധികാരികൾ പലപ്പോഴും ​ഗ്രി​ഗറിയുടെ പെരുമാറ്റത്തെ കുറിച്ച് ആകുലപ്പെട്ടിരുന്നു. വിക്കി പലാഡിനോ എന്ന സിറ്റി കൗൺസിലർ ദ പോസ്റ്റിനോട് പറഞ്ഞത് ഇങ്ങനെ, "ഈ നഗരത്തിലെ ജനങ്ങൾക്ക് എല്ലാ തലത്തിലും അതിന്റെ കോടതികളിൽ തികഞ്ഞ വിശ്വാസമുണ്ടായിരിക്കണം. ലോക്കിനെ പോലുള്ളവരെ നിയമപരമായ അധികാര സ്ഥാനങ്ങളിൽ നിയമിക്കുന്നത് ഞങ്ങളുടെ സ്ഥാപനങ്ങളുടെ പ്രൊഫഷണലിസത്തിലും നിഷ്പക്ഷതയിലും ഉള്ള ജനങ്ങളുടെ വിശ്വാസത്തെ നശിപ്പിക്കാൻ കാരണമായിത്തീരുകയേ ഉള്ളൂ."