ഈ മത്സ്യത്തൊഴിലാളിയുടെ വലയിൽ കുടുങ്ങിയത് ലോകത്തിലെ ഏറ്റവും വലിയ ശുദ്ധജലമത്സ്യം!

കംബോഡിയൻ ഫിഷറീസ് അഡ്മിനിസ്ട്രേഷനുമായി ചേർന്ന് രൂപീകരിച്ച ഒരു പദ്ധതി പ്രകാരം മത്സ്യത്തൊഴിലാളികൾ ഭീമൻ ഇനങ്ങളെ അല്ലെങ്കിൽ വംശനാശഭീഷണി നേരിടുന്ന മത്സ്യങ്ങളെ പിടികൂടിയാൽ ഗവേഷകരെ അറിയിക്കുന്നു. വണ്ടേഴ്‌സ് ഓഫ് മെകോംഗ് എന്നാണ് ഈ സംരക്ഷണ പദ്ധതിയുടെ പേര്.

കംബോഡിയയിൽ നിന്നുള്ള ഒരു മത്സ്യത്തൊഴിലാളിയുടെ വലയിൽ കുടുങ്ങിയത് ലോകത്തിലെ ഏറ്റവും വലിയ ശുദ്ധജലമത്സ്യം. കംബോഡിയയിലെ വടക്കൻ പ്രവിശ്യയായ സ്റ്റംഗ് ട്രെങ്ങിലെ മെകോംഗ് നദിയിൽ നിന്നാണ് ആകസ്മികമായി മത്സ്യത്തെ പിടികൂടിയത്. 300 കിലോഗ്രാം ഭാരമുള്ള ഒരു വലിയ അടവാലൻ തിരണ്ടി മത്സ്യമായിരുന്നു അത്. ഇതുവരെ പിടിക്കപ്പെട്ടതിൽ വച്ച് ഏറ്റവും വലിയ ശുദ്ധജല മത്സ്യമാണ് ഇതെന്ന് ശാസ്ത്രജ്ഞർ പറയുന്നു.  

ജൂൺ 13 -ന് രാത്രി, കോ പ്രീ ദ്വീപിലെ 42 -കാരനായ ഒരു മത്സ്യത്തൊഴിലാളിയാണ് തിരണ്ടിയെ വലയിലാക്കിയത്. അതിന് ഏകദേശം നാല് മീറ്റർ നീളവും, 2.2 മീറ്റർ വീതിയുമുണ്ടായിരുന്നു. പ്രാദേശിക ഖെമർ ഭാഷയിൽ, മത്സ്യത്തെ "ബോറമി" എന്നാണ് വിളിക്കുന്നത്, അതായത് പൂർണ്ണ ചന്ദ്രൻ. ഭീമാകാരമായ ശുദ്ധജല തിരണ്ടി വംശനാശഭീഷണി നേരിടുന്ന ഒരു ഇനമാണ്. റെനോയിലെ നെവാഡ സർവകലാശാലയിലെ മത്സ്യ ജീവശാസ്ത്രജ്ഞനായ സെബ് ഹോഗൻ മത്സ്യത്തെ കണ്ടെത്തിയ വിവരം ഫേസ്ബുക്കിൽ സ്ഥിരീകരിച്ചു. "ആറു ഭൂഖണ്ഡങ്ങളിലെ നദികളിലും തടാകങ്ങളിലും ഭീമാകാരമായ മത്സ്യങ്ങളെ കുറിച്ച് 20 വർഷമായി ഗവേഷണം ചെയ്തുകൊണ്ടിരിക്കുന്ന ഞങ്ങൾ കണ്ടിട്ടുള്ളതോ ലോകമെമ്പാടും രേഖപ്പെടുത്തിയിട്ടുള്ളതോ ആയ ഏറ്റവും വലിയ ശുദ്ധജല മത്സ്യമാണിത്" അദ്ദേഹം കുറിച്ചു.  മത്സ്യത്തെ കണ്ടെത്തിയത് പ്രതീക്ഷ നൽകുന്ന ഒരു കാര്യമാണ് എന്നും അദ്ദേഹം പറഞ്ഞു. മത്സ്യത്തിന്റെ നീക്കങ്ങൾ ട്രാക്ക് ചെയ്യുന്നതിനായി അതിന്റെ മേൽ ഒരു അക്കോസ്റ്റിക് ടാഗ് ഘടിപ്പിച്ച ശേഷം, അതിനെ നദിയിലേക്ക് ഗവേഷകർ തിരികെ വിട്ടയച്ചു.  

കംബോഡിയൻ ഫിഷറീസ് അഡ്മിനിസ്ട്രേഷനുമായി ചേർന്ന് രൂപീകരിച്ച ഒരു പദ്ധതി പ്രകാരം മത്സ്യത്തൊഴിലാളികൾ ഭീമൻ ഇനങ്ങളെ അല്ലെങ്കിൽ വംശനാശഭീഷണി നേരിടുന്ന മത്സ്യങ്ങളെ പിടികൂടിയാൽ ഗവേഷകരെ അറിയിക്കുന്നു. വണ്ടേഴ്‌സ് ഓഫ് മെകോംഗ് എന്നാണ് ഈ സംരക്ഷണ പദ്ധതിയുടെ പേര്. നദിയിൽ മത്സ്യത്തെ കണ്ടെത്തിയപ്പോൾ തന്നെ മത്സ്യത്തൊഴിലാളി ശാസ്ത്രജ്ഞരുടെ സംഘത്തെ വിവരം അറിയിച്ചു. മെയ് മാസത്തിന് ശേഷം ടീം പരിശോധിക്കുന്ന രണ്ടാമത്തെ ഭീമൻ തിരണ്ടിയാണിത്. മുൻപത്തേതിന് 181 കിലോ ഭാരമുണ്ടായിരുന്നു. അതിന് മുൻപ്, വടക്കൻ തായ്‌ലൻഡിൽ 2005-ൽ പിടികൂടിയ മെക്കോംഗ് ഭീമൻ ക്യാറ്റ്ഫിഷ് ആയിരുന്നു ലോകത്തെ ഏറ്റവും ഭാരമേറിയ ശുദ്ധജല മത്സ്യം. ഗിന്നസ് വേൾഡ് റെക്കോർഡ്സ് അനുസരിച്ച്, ക്യാറ്റ്ഫിഷിന്റെ ഭാരം 293 കിലോഗ്രാമും, നീളം 9 അടിയുമായിരുന്നു.

ടിബറ്റൻ പീഠഭൂമിയിൽ നിന്ന് ഉത്ഭവിക്കുന്ന മെകോംഗ് നദി ചൈന, മ്യാൻമർ, തായ്‌ലൻഡ്, ലാവോസ്, കംബോഡിയ, വിയറ്റ്നാം എന്നിവിടങ്ങളിലൂടെ ഒഴുകുന്നു. മെകോംഗിന്റെ നിർണായക ആവാസവ്യവസ്ഥയിൽ മുട്ടയിട്ട് വിരിയുന്നത് ഓരോ വർഷവും കോടിക്കണക്കിന് മത്സ്യങ്ങളാണ്. ഇത് കംബോഡിയയിലെയും വിയറ്റ്നാമിലെയും ദശലക്ഷക്കണക്കിന് ആളുകൾക്ക് ഭക്ഷ്യസുരക്ഷയും ഉപജീവനവും ഉറപ്പാക്കുന്നു. ഈ നദി ജൈവവൈവിധ്യത്താൽ സമ്പന്നമാണ്. എന്നാൽ ഇന്ന് അമിത മത്സ്യബന്ധനവും അണക്കെട്ടുകളും മലിനീകരണവും അതിന്റെ ആവാസവ്യവസ്ഥയ്ക്ക് ഭീഷണിയായി മാറിക്കൊണ്ടിരിക്കയാണ്.