പകൽ കത്തുന്ന സൂര്യൻ, രാത്രി അസ്ഥി മരവിക്കുന്ന തണുപ്പ്; ബോട്ട് തകർന്ന് 48 മണിക്കൂർ ഉൾക്കടലിൽ ഒറ്റയ്ക്ക് !

രാവിലെ 10.40 -നാണ് ​ഗ്രി​ഗറിയെ രക്ഷപ്പെടുത്തിയത്. കോസ്റ്റ് ​ഗാർഡ് സംഘം രക്ഷാപ്രവർത്തനങ്ങളുടെ വീഡിയോ പുറത്ത് വിട്ടു. കരയിലെത്തിയ ഉടനെ തന്നെ ​ഗ്രി​ഗറിയെ ആശുപത്രിയിൽ എത്തിച്ചു.

വെള്ളിയാഴ്ച പുലർച്ചെ ഫ്ലോറിഡയിലെ സെന്റ് അ​ഗസ്റ്റിൻ തീരത്ത് നിന്ന് മത്സ്യബന്ധനത്തിന് വേണ്ടി പോയതാണ് ചാൾസ് ​ഗ്രി​ഗറി എന്ന യുവാവ്. നേരത്തെ പലതവണ അദ്ദേഹം ചെയ്ത കാര്യം തന്നെയായിരുന്നു അത്. പക്ഷേ, ഇത്തവണ പഴയതുപോലെ ആയിരുന്നില്ല. പ്രതീക്ഷിച്ചതിലും അധികമായിരുന്നു വേലിയേറ്റം. ആ സമയത്ത് തിരമാല ​ഗ്രി​ഗറിയുടെ ബോട്ടിനെ അക്രമിച്ചു. ബോട്ട് തകർന്നു.

​ഗ്രി​ഗറി വെള്ളത്തിലേക്ക് വീണു. തിരികെ ബോട്ടിലേക്ക് കയറാൻ ശ്രമിച്ചു എങ്കിലും സാധിച്ചില്ല. രണ്ട് ദിവസം ജീവൻ നിലനിർത്താൻ വേണ്ടിയുള്ള പോരാട്ടത്തിലായിരുന്നു പിന്നീട് 25 -കാരനായ ​ഗ്രി​ഗറി. ഫ്ലോറിഡയിൽ മുകളിൽ സൂര്യൻ കത്തിയെരിയുകയായിരുന്നു. ഒപ്പം ഭാ​ഗി​കമായി വെള്ളത്തിൽ മുങ്ങിയ ബോട്ടിൽ അയാൾ‌ പറ്റിപ്പിടിച്ച് കയറി. ഇത് കൂടാതെയായിരുന്നു ജെല്ലിഫിഷിന്റെ ആക്രമണം. വെള്ളത്തിൽ ഭയപ്പെടുത്തി നീങ്ങുന്ന സ്രാവുകൾ.

​ഗ്രി​ഗറി ഭയന്നു വിറച്ചിരുന്നു. ഏത് നേരം വേണമെങ്കിലും മരണം തന്നെ കവർന്നെടുത്തേക്കാം എന്നായിരുന്നു അവന്റെ ഭയം. ആ മണിക്കൂറുകളിൽ താൻ ജീവിതത്തിൽ ഇതുവരെയും വിളിച്ചിട്ടില്ലാത്ത അത്രയും ദൈവത്തെ വിളിച്ചു എന്ന് അവൻ പറയുന്നു. രാവിലെ മുഴുവനും അവൻ സഹായം എന്തെങ്കിലും കിട്ടുമോ എന്ന് അന്വേഷിക്കും. തുണി ഉപയോ​ഗിച്ച് വീശും. എന്നാൽ, രാത്രിയായിരുന്നു ഏറെ കഷ്ടം. രാവിലെ വെയിലാണ് എങ്കിൽ രാത്രി തണുത്ത കാറ്റായിരുന്നു, ആകെ തണുത്തുറഞ്ഞ് പോകും. 

കോസ്റ്റ് ​ഗാർഡിനാണ് ​ഗ്രി​ഗറി അപകടത്തിൽ പെട്ട് കൊണ്ടുള്ള വിവരം കിട്ടിയത്. സാധാരണ എത്താറുള്ള നേരം ആയിട്ടും ​ഗ്രി​ഗറി എത്തിയിട്ടില്ല എന്നാണ് കോസ്റ്റ് ​ഗാർഡിനെ ​ഗ്രി​ഗറിയുടെ വീട്ടുകാർ അറിയിച്ചത്. രാത്രി മുഴുവനും അവർ ​ഗ്രി​ഗറിക്ക് വേണ്ടി തിരഞ്ഞു. എന്നാൽ, രാത്രിയിൽ അയാളെ കണ്ടെത്താൻ സാധിച്ചില്ല. ശനിയാഴ്ച രാവിലെയാണ് പാതിമുങ്ങിയ ബോട്ടിൽ സംഘം ​ഗ്രി​ഗറിയെ കണ്ടെത്തിയത്. 

രാവിലെ 10.40 -നാണ് ​ഗ്രി​ഗറിയെ രക്ഷപ്പെടുത്തിയത്. കോസ്റ്റ് ​ഗാർഡ് സംഘം രക്ഷാപ്രവർത്തനങ്ങളുടെ വീഡിയോ പുറത്ത് വിട്ടു. കരയിലെത്തിയ ഉടനെ തന്നെ ​ഗ്രി​ഗറിയെ ആശുപത്രിയിൽ എത്തിച്ചു. ഏതായാലും ചികിത്സ കഴിഞ്ഞ് ആശുപത്രിയിൽ എത്തിച്ച ​ഗ്രി​ഗറി ഇപ്പോൾ വീട്ടിൽ വിശ്രമിക്കുകയാണ്. അവന്റെ അച്ഛൻ പറയുന്നത് എന്തുവന്നാലും വിട്ടുകൊടുക്കരുത് അവസാനം വരെ പിടിച്ച് നിൽക്കണം എന്നാണ്.