ഹോ, ഭാ​ഗ്യം വരുന്ന ഓരോ വഴി നോക്കണേ; 23,000 -ത്തിന് ​ഗെയിം കളിച്ചു, 1.95 കോടിയുടെ കാർ സമ്മാനം

ഏകദേശം മൂന്ന് മണിക്കൂറോളം അയാൾ ​ഗെയിം കളിച്ചു. 8,000 വളയങ്ങളാണ് വാങ് ​ഗെയിമിൽ എറിഞ്ഞത്. ഒടുവിൽ മസെരാറ്റി അയാൾക്ക് സ്വന്തമായി.

ചിലർക്ക് എപ്പോഴാണ്, എങ്ങനെയാണ് ഭാ​ഗ്യം തെളിയുക എന്ന് പറയാനാവില്ല. അതുപോലെ ഒരു കാര്യമാണ് ഈ ചൈനീസ് യുവാവിന്റെ കാര്യത്തിലും സംഭവിച്ചത്. 23,000 രൂപ മുടക്കി ​ഗെയിം കളിച്ച യുവാവിന് കിട്ടിയത് 1. 95 കോടിയുടെ ആഡംബര മസെരാറ്റി സ്പോർട്സ് കാറാണ്. 

ഹെനാൻ പ്രവിശ്യയിലെ ഷാങ്‌ക്യുവിലെ നൈറ്റ് മാർക്കറ്റിൽ വച്ച് റിം​ഗ് ടോസ് ​ഗെയിം കളിച്ച യുവാവിനാണ് 1.95 കോടിയുടെ കാർ ലഭിച്ചിരിക്കുന്നത് എന്നാണ് സൗത്ത് ചൈന മോർണിം​ഗ് പോസ്റ്റ് റിപ്പോർട്ട് ചെയ്യുന്നത്. ഗെയിം സ്റ്റാളിൽ പശുക്കൾ, ആടുകൾ, മറ്റ് മൃഗങ്ങൾ എന്നിവയുൾപ്പടെ വിവിധ സമ്മാനങ്ങളാണ് ഒരുക്കിയിരുന്നത്. എന്നാൽ, ഈ ആഡംബര കാറായിരുന്നു മത്സരത്തിലെ ​ഗ്രാൻഡ് പ്രൈസ്. 

സ്റ്റാൾ‌ ഉടമയാണെങ്കിൽ ​ഗെയിം കളിക്കാനെത്തിയവരെ നിരന്തരം പ്രോത്സാഹിപ്പിക്കുന്നുണ്ടായിരുന്നു. 'ഈ അവസരം ഉപയോ​ഗിക്കൂ, നിങ്ങളിലൊരു മികച്ച ​ഗെയിം കളിക്കാരൻ ഉണ്ടായിരിക്കാം' എന്നെല്ലാം ഇയാൾ പറയുന്നുണ്ടായിരുന്നത്രെ. 

അങ്ങനെ, ഫെബ്രുവരി 14 -നാണ് ഷാൻഡോംഗ് പ്രവിശ്യയിലെ ബിൻഷൗവിൽ നിന്നുള്ള വാങ് എന്ന യുവാവ് ഈ വെല്ലുവിളി ഏറ്റെടുത്തത്. ഏകദേശം മൂന്ന് മണിക്കൂറോളം അയാൾ ​ഗെയിം കളിച്ചു. 8,000 വളയങ്ങളാണ് വാങ് ​ഗെയിമിൽ എറിഞ്ഞത്. ഒടുവിൽ മസെരാറ്റി അയാൾക്ക് സ്വന്തമായി. 'ആയിരക്കണക്കിന് വളയങ്ങൾ ഞാൻ എറിഞ്ഞു. കൈകൾ വേദനിച്ചു. ഇപ്പോഴും ചെറിയ വേദനയുണ്ട്. ഒന്ന് പരീക്ഷിച്ച് നോക്കാം എന്ന് കരുതിയാണ് ​ഗെയിം കളിക്കാനിറങ്ങിയത്. ഭാ​ഗ്യം കൊണ്ടാണ് വിജയിച്ചത്' എന്നാണ് വാങ് പറയുന്നത്. 

ബാസ്കറ്റ് ബോളിൽ വലിയ താല്പര്യമുള്ള ആള് കൂടിയാണ് വാങ്. നൈറ്റ് മാർക്കറ്റുകളിൽ റിം​ഗ് ടോസ് ​ഗെയിം കളിക്കാൻ തനിക്ക് ഇഷ്ടമാണ് എന്നാണ് വാങ് പറയുന്നത്. എന്തായാലും മസെരാറ്റി കിട്ടിയത് നന്നായി ഇല്ലെങ്കിൽ 23000 രൂപയുടെ കാര്യത്തിൽ ഒരു തീരുമാനം ആയേനെ. എന്തായാലും, സമ്മാനം കിട്ടുമെന്ന് കരുതി വലിയ തുകയ്ക്ക് ​ഗെയിം കളിക്കുന്നതിനെ പ്രോത്സാഹിപ്പിക്കാനാവില്ല അല്ലേ?

(ചിത്രം പ്രതീകാത്മകം)

ഏഷ്യാനെറ്റ് ന്യൂസ് ലൈവ് കാണാം