മീനിന് എന്താ സങ്കടം വന്നൂടെ? ആളുകളെ കാണാതെ മത്സ്യം 'ദുഃഖത്തിൽ', വേറെ ലെവൽ പരിഹാരവുമായി അക്വേറിയം

ആളുകളെ കാണാതെ അസ്വസ്ഥത പ്രകടിപ്പിക്കുക മാത്രമല്ല ഈ മത്സ്യം ചെയ്തത്. അത് പിന്നീട് ഭക്ഷണം കഴിക്കാനും വിമുഖത കാണിച്ചു തുടങ്ങി. മാത്രമല്ല, തന്റെ ദേഹം അക്വേറിയത്തിലുരുമ്മാനും മറ്റും തുടങ്ങി.

എന്നും കാണുന്നപോലെ മനുഷ്യരെ കാണാതിരുന്നാൽ ചിലപ്പോൾ നമുക്ക് അസ്വസ്ഥത തോന്നും ചിലപ്പോൾ വിഷാദം വരും. എന്നാൽ, മീനുകൾക്ക് അങ്ങനെ അസ്വസ്ഥതയും വിഷാദവും ഒക്കെ വരുമോ? വരുമെന്നാണ് ഈ സംഭവം തെളിയിക്കുന്നത്. ആളുകളെ കാണാതെ വിഷാദിയായിത്തീരുകയായിരുന്നത്രെ ഈ അക്വേറിയത്തിലെ മത്സ്യം.

ജപ്പാനിലെ ഷിമോനോസെക്കിയിലെ കൈക്യോകൻ അക്വേറിയം 2024 ഡിസംബർ മുതൽ നവീകരണപ്രക്രിയകളുടെ ഭാ​ഗമായി അടച്ചിട്ടിരിക്കുകയാണ്. അതോടെ അക്വേറിയത്തിലുള്ള സൺഫിഷിന്റെ പെരുമാറ്റത്തിൽ മാറ്റം വന്നുതുടങ്ങി എന്നാണ് റിപ്പോർട്ടുകൾ പറയുന്നത്. 

ആളുകളെ കാണാതെ അസ്വസ്ഥത പ്രകടിപ്പിക്കുക മാത്രമല്ല ഈ മത്സ്യം ചെയ്തത്. അത് പിന്നീട് ഭക്ഷണം കഴിക്കാനും വിമുഖത കാണിച്ചു തുടങ്ങി. മാത്രമല്ല, തന്റെ ദേഹം അക്വേറിയത്തിലുരുമ്മാനും മറ്റും തുടങ്ങി. ആദ്യമൊക്കെ അധികൃതർ കരുതിയിരുന്നത് സൺ ഫിഷിന് എന്തോ വയ്യായ്കയാണ് എന്നായിരുന്നു. 

എന്നാൽ, പിന്നീട് അധികൃതർ തന്നെ ഇതിന്റെ യഥാർത്ഥ കാരണം കണ്ടെത്തുകയായിരുന്നു. അക്വേറിയം അടച്ചിട്ടിരിക്കുന്നതിനാൽ തന്നെ സന്ദർശകരൊന്നും ഇവിടെ എത്തുന്നില്ല. മാത്രമല്ല, നവീകരണ പ്രവൃത്തികളുടെ ഭാ​ഗമായി ഉണ്ടാവുന്ന ശബ്ദങ്ങളും മീനിനെ അസ്വസ്ഥമാക്കിയിട്ടുണ്ടാവാം എന്നും അധികൃതർ കണ്ടെത്തി. അതോടെയാണ് ഈ പ്രശ്നം പരിഹരിക്കാൻ ഒരു വേറിട്ട വഴി അധികൃതർ കണ്ടെത്തുന്നത്. 

അങ്ങനെ മനുഷ്യരുടെ കട്ടൗട്ടുകൾ ഇവിടെ സ്ഥാപിച്ചു. അതോടെ മീനിന്റെ അസ്വസ്ഥത മാറി എന്നും അത് ഭക്ഷണം കഴിക്കാൻ തുടങ്ങി എന്നുമാണ് പറയുന്നത്. മാത്രമല്ല, അത് കൂടുതൽ പ്രസരിപ്പ് കാണിക്കാനും തുടങ്ങിയത്രെ. ഈ അക്വേറിയത്തിൽ സന്ദർശകർക്ക് ഏറെ പ്രിയപ്പെട്ടതാണ് ഈ സൺ ഫിഷ്. മാത്രമല്ല, ഇതിന് സന്ദർശകരെയും വലിയ ഇഷ്ടമാണ്. എപ്പോഴും സന്ദർശകരുടെ അടുത്തായിരിക്കാനാണത്രെ ഇത് ഇഷ്ടപ്പെടുന്നത്. 

ഏഷ്യാനെറ്റ് ന്യൂസ് ലൈവ് കാണാം