ലോകത്തിലെ ഏറ്റവും പഴക്കം ചെന്ന മൃശാലകളിലൊന്ന് അടച്ചു പൂട്ടുന്നു, കാരണം ഇത്...

വളരെ പ്രശസ്തമായ പല മൃ​ഗങ്ങളുടേയും വാസ സ്ഥലമായിരുന്നു ബ്രിസ്റ്റോൾ മൃ​ഗശാല. ഒരുപാട് ഓർമ്മകളും ചരിത്രവും ഒക്കെയുള്ള മൃ​ഗശാലയാണ് അടച്ചു പൂട്ടലിന് ഒരുങ്ങുന്നത്. സപ്തംബറിൽ പൂട്ടുന്നതിന് മുമ്പായി ചില പരിപാടികളൊക്കെ ഉണ്ടാവും എന്ന് പറയുന്നു

ലോകത്തിലെ ഏറ്റവും പഴക്കം ചെന്ന മൃ​ഗശാലകളിൽ ഒന്നാണ് ബ്രിസ്റ്റോൾ സുവോളജിക്കൽ ​ഗാർഡൻസ്. 186 വർഷങ്ങൾക്ക് മുമ്പ് പ്രവർത്തനം ആരംഭിച്ച ഈ മൃ​ഗശാല ഇപ്പോൾ അടച്ചു പൂട്ടുകയാണ്. 1836 -ലാണ് ബ്രിസ്റ്റോൾ മൃഗശാല പൊതുജനങ്ങൾക്കായി അതിന്റെ കവാടങ്ങൾ ആദ്യമായി തുറന്നത്. 12 ഏക്കറിലധികം വിസ്തൃതിയുള്ള ഇത് ഒരുകാലത്ത് 7,000 -ത്തിലധികം മൃഗങ്ങളുടെയും 420 ഇനം ജീവികളുടേയും ആവാസ കേന്ദ്രമായിരുന്നു.

തുറന്ന നാൾ മുതൽ ഇങ്ങോട്ട്, ഏകദേശം 90 ദശലക്ഷം സന്ദർശകർ ഇവിടം സന്ദർശിച്ച് കഴിഞ്ഞു. അതുപോലെ തന്നെ അതിന്റെ സംരക്ഷണ പ്രവർത്തനങ്ങളുടെ ഭാ​ഗമായി 175 ജീവി വർ​ഗങ്ങളെ വംശനാശത്തിൽ നിന്നും സംരക്ഷിക്കുകയും ചെയ്തു. 

എന്നാൽ, ലോകത്തെയാകെ കൊവിഡ് മഹാമാരി പിടിച്ച് കുലുക്കിയതോടെ മൃ​ഗശാലയുടെ കാര്യത്തിലും വളരെ പെട്ടെന്ന് മാറ്റങ്ങളുണ്ടായി. ലോക്ക് ഡൗണും സാമൂഹിക അകലവും പാലിക്കേണ്ടി വന്നതോടെ ആളുകൾ മൃ​ഗശാല സന്ദർശിക്കുന്നത് കുറഞ്ഞു. അതോടെ സാമ്പത്തികമായി അത് മൃ​ഗശാലയെ ബാധിച്ചു. 

മൃഗശാലയുടെ ഉടമസ്ഥതയിലുള്ളതും മൃ​ഗശാല പ്രവർത്തിപ്പിക്കുന്നതുമായ ചാരിറ്റിയായ ബ്രിസ്റ്റോൾ സുവോളജിക്കൽ സൊസൈറ്റിയുടെ അഭിപ്രായത്തിൽ, കഴിഞ്ഞ ആറ് വർഷങ്ങളിൽ നാല് വർഷങ്ങളിലും മൃഗശാല കനത്ത സാമ്പത്തിക നഷ്ടം നേരിട്ടു. യുകെ -യിൽ രണ്ടാമത്തെ നാഷണൽ ലോക്ക് ഡൗൺ വന്നതാണ് ഏറ്റവുമധികം മൃ​ഗശാലയെ ബാധിച്ചത്. മൃ​ഗശാലയുടെ വരുമാനം നന്നേ താഴ്ന്നു. അതോടെയാണ് അടച്ചു പൂട്ടലിനെ കുറിച്ച് അതിന്റെ അധികൃതർ ആലോചിച്ച് തുടങ്ങുന്നത്. 

വളരെ പ്രശസ്തമായ പല മൃ​ഗങ്ങളുടേയും വാസ സ്ഥലമായിരുന്നു ബ്രിസ്റ്റോൾ മൃ​ഗശാല. ഒരുപാട് ഓർമ്മകളും ചരിത്രവും ഒക്കെയുള്ള മൃ​ഗശാലയാണ് അടച്ചു പൂട്ടലിന് ഒരുങ്ങുന്നത്. സപ്തംബറിൽ പൂട്ടുന്നതിന് മുമ്പായി ചില പരിപാടികളൊക്കെ ഉണ്ടാവും എന്ന് പറയുന്നു. 

മൃ​ഗശാലയിലെ സ്ഥിരം സന്ദർശകരുടെ ഒരു കൂടിച്ചേരലും ഇതിന്റെ ഭാ​ഗമായി പദ്ധതിയിടുന്നുണ്ട്. ബ്രിസ്റ്റോൾ സുവോളജിക്കൽ സൊസൈറ്റി വിൽപ്പനയിൽ നിന്നുള്ള പണം സൗത്ത് ഗ്ലൗസെസ്റ്റർഷെയറിൽ സ്ഥിതി ചെയ്യുന്ന വൈൽഡ് പ്ലേസ് പ്രൊജക്റ്റ് സൈറ്റിൽ ഒരു പുതിയ സ്ഥലം ഒരുക്കാൻ ഉപയോഗിക്കും. 2024 -ഓടെ പുതിയ സ്ഥലം തുറക്കുമെന്നാണ് പ്രതീക്ഷിക്കുന്നത്. പുതിയ വാസസ്ഥലം ഒരുങ്ങുന്നത് വരെ ​ഗൊറില്ല അടക്കമുള്ള മൃ​ഗങ്ങൾ പഴയ സ്ഥലത്ത് തന്നെ തുടരും.