ഇപ്പോള്‍ സുധയ്ക്ക് 70 വയസ്സായി. ആറ് വന്‍കരകളിലായി 66 രാജ്യങ്ങള്‍ അവര്‍ സന്ദര്‍ശിച്ചു കഴിഞ്ഞു. Footloose Indian എന്ന പേരില്‍ ഒരു ട്രാവല്‍ ബ്ലോഗുണ്ട് സുധയ്ക്ക്.
നമ്മില്‍ മിക്കവര്‍ക്കും കാണും ഒരു ബക്കറ്റ് ലിസ്റ്റ്. അതായത്, നമ്മുടെ പൂര്‍ത്തീകരിക്കാനുള്ള സ്വപ്നങ്ങളുടെ ഒരു ലിസ്റ്റ്. അതില്‍ തന്നെയും പോകാനുള്ള സ്ഥലങ്ങളുടെ പട്ടികയുണ്ടാകും. എന്നാല്‍, ചിലര്‍ക്കൊന്നും ആ സ്വപ്നങ്ങള്‍ യാഥാര്‍ത്ഥ്യമാക്കാന്‍ കഴിയാതെ പോകും. എന്നാല്‍, ചിലരാകട്ടെ എങ്ങനെയും ആ സ്വപ്നങ്ങള്‍ പൂര്‍ത്തീകരിക്കുക തന്നെ ചെയ്യും.
ലോകമെമ്പാടും സഞ്ചരിക്കുക മാത്രമല്ല, ഒരു അവധിക്കാലത്ത് നമ്മെ തളർത്തിയേക്കാവുന്ന എല്ലാ സാഹസികതകളും നടത്തുകയും ചെയ്യുന്ന ഈ 70 -കാരിയെപ്പോലെ. ചെന്നൈ സ്വദേശിയായ ഡോ. സുധ മഹാലിംഗം കഴിഞ്ഞ 25 വർഷമായി യാത്ര ചെയ്യുകയാണ്, അവര്‍ പോയിട്ടുള്ള രാജ്യങ്ങളുടെ എണ്ണം അറിഞ്ഞാൽ നിങ്ങൾ ഞെട്ടും. അവര്‍ ഇതുവരെ 66 രാജ്യങ്ങളിൽ പോയിട്ടുണ്ട്. മാത്രവുമല്ല, സുധയുടെ ഈ യാത്രകളെല്ലാം തനിച്ചുള്ളതാണ്.
സി‌എൻ‌എന്നുമായുള്ള ഒരു പ്രത്യേക അഭിമുഖത്തിൽ, സുധ യാത്രയ്ക്കുള്ള തന്റെ താൽപര്യം വിശദീകരിച്ചു. വർഷങ്ങൾക്ക് മുമ്പ് തന്റെ ഭർത്താവ് ജീവിച്ചിരുന്നപ്പോൾ, പല അവസരങ്ങളിലും അദ്ദേഹത്തോടൊപ്പം വിദേശത്തേക്ക് പോകാറുണ്ടായിരുന്നുവെന്ന് അവർ അവകാശപ്പെട്ടു. എന്നാല്‍, ഭര്‍ത്താവിന് സ്ഥലങ്ങള്‍ ചുറ്റിയടിച്ച് കാണുന്നതിനോട് വലിയ താല്‍പര്യം ഇല്ലായിരുന്നു. അങ്ങനെ മിക്ക സ്ഥലങ്ങളിലും ഗൈഡുകള്‍ക്കൊപ്പമാണ് അവര്‍ സഞ്ചരിച്ചിരുന്നത്.
എന്നാല്‍, ഗൈഡിനൊപ്പമുള്ള യാത്ര സുധ അത്രയൊന്നും പ്രോത്സാഹിപ്പിക്കുന്നില്ല. അത് നിങ്ങളുടെ ധാരണകളെ ചുരുക്കിക്കളയുകയും ഗൈഡ് പറയുന്നതില്‍ മാത്രം ഒതുങ്ങി നില്‍ക്കുകയും ചെയ്യുമെന്ന് അവര്‍ പറയുന്നു. പാക്കേജ്ഡ് ടൂറുകളും അതുപോലെയാണ്. അവര്‍ എന്താണോ നിങ്ങളെ കാണിക്കാനുദ്ദേശിക്കുന്നത് അത് മാത്രമേ നിങ്ങളെ കാണിക്കൂ. നാമെന്ത് കാണാനാഗ്രഹിക്കുന്നുവെന്നതില്‍ അവിടെ കാര്യമില്ല എന്നും സുധ പറയുന്നു. ഈ ഒറ്റയാത്രകള്‍ തുടങ്ങുന്നതിന് മുമ്പ് തന്നെ സുധ പല യാത്രകളും നടത്തിയിട്ടുണ്ട്. എന്നാല്‍, അപ്പോഴെല്ലാം തനിച്ച് യാത്ര ചെയ്ത് ഓരോ സ്ഥലവും എക്സ്പ്ലോര്‍ ചെയ്യണമെന്ന ആഗ്രഹം അവര്‍ക്കുണ്ടായിരുന്നു. ഇത് തനിക്ക് കൂടുതൽ കരുത്ത് തോന്നാൻ സഹായിച്ചുവെന്നും മറ്റ് സ്ത്രീകൾക്കും അങ്ങനെ തന്നെ തോന്നാൻ സഹായിക്കുമെന്നും അവർ വിശ്വസിക്കുന്നു.
അവരുടെ ആദ്യകാല അവധിദിനങ്ങൾ അല്ലെങ്കിൽ യാത്രകൾ അപ്രതീക്ഷിതവും ആസൂത്രിതമല്ലാത്തതുമായിരുന്നു. സാധുവായ വിസയില്ലാതെ ചെക്ക് റിപ്പബ്ലിക്കിൽ ഇറങ്ങിയത് മുതൽ, ഇറാനിലെ ഒരു സ്മാരകത്തിൽ അബദ്ധത്തിൽ പൂട്ടിയിടപ്പെട്ടത്, ചൈനയിൽ വെജിറ്റേറിയൻ ഭക്ഷണം കണ്ടെത്താനുള്ള വെല്ലുവിളി, കെനിയയിലെ നെയ്‌റോബിയിലെ വിമാനത്താവളത്തിൽ മഞ്ഞപ്പനി പ്രതിരോധ കുത്തിവയ്പ്പ് തെളിയിക്കപ്പെടാതെ പിടിക്കപ്പെടുന്നത് വരെ പലതരം വെല്ലുവിളികള്‍ ഉണ്ടായി. പക്ഷേ, അതൊന്നും തന്നെ അവരെ യാത്രകളില്‍ നിന്നും പിന്തിരിപ്പിച്ചതേയില്ല.
ഇപ്പോള്‍ സുധയ്ക്ക് 70 വയസ്സായി. ആറ് വന്‍കരകളിലായി 66 രാജ്യങ്ങള്‍ അവര്‍ സന്ദര്‍ശിച്ചു കഴിഞ്ഞു. Footloose Indian എന്ന പേരില്‍ ഒരു ട്രാവല്‍ ബ്ലോഗുണ്ട് സുധയ്ക്ക്. കൂടാതെ, 'ദ ട്രാവല്‍ ഗോഡ്സ് മസ്റ്റ് ബീ ക്രേസി, വാക്കി എന്‍കൗണ്ടേഴ്സ് ഇന്‍ എക്സോട്ടിക് ലാന്‍ഡ്സ്' എന്ന ഒരു പുസ്തകവും എഴുതിയിട്ടുണ്ട്.