കോണ്ടം, നോ നെയിം, വൈ, വൈ നോട്ട്; വിചിത്രമായ പേരുകളുള്ള സ്ഥലങ്ങൾ

നോ നെയിം എന്നാൽ പേരില്ല എന്നാണ് അല്ലേ? എന്നാൽ നോ നെയിം കൊളറാഡോയിലെ ഒരു സ്ഥലത്തിന്റെ പേരാണ്. 2010 -ലെ യുണൈറ്റഡ് സ്റ്റേറ്റ്സ് സെൻസസ് അനുസരിച്ച് ഇവിടുത്തെ ജനസംഖ്യ 123 ആണ്.

വിചിത്രമായ ചില പേരുകളുള്ള പല സ്ഥലങ്ങളും നമ്മുടെ നാട്ടിലുണ്ട്. അതുപോലെ ലോകത്തിന്റെ പല ഭാ​ഗങ്ങളിലും അത്തരത്തിലുള്ള വിചിത്രമായ പേരുകളുള്ള സ്ഥലങ്ങളുണ്ട്. അതിൽ കോണ്ടം, നോ നെയിം, പീ പീ ടൗൺഷിപ്പ് അങ്ങനെ പല പേരുകളും വരുന്നു. അത്തരത്തിലുള്ള ചില സ്ഥലങ്ങളെ പരിചയപ്പെടാം. 

കോണ്ടം, ഫ്രാൻസ് (Condom, France)  : തെക്ക് പടിഞ്ഞാറൻ ഫ്രാൻസിലെ ഒരു സ്ഥലമാണ് കോണ്ടം. എന്നാൽ, ഇം​ഗ്ലീഷ് വാക്ക് കോണ്ടവുമായി ഇതിന് പ്രത്യേകിച്ച് ബന്ധമൊന്നും ഇല്ല. ​ഗൗളിഷ് വാക്കുകളായ condate, magos എന്നീ വാക്കുകൾ ചേർന്നാണ് ഈ പേര് ഉണ്ടായത്. അതിന്റെ അർത്ഥം മാർക്കറ്റുകളോ പാടങ്ങളോ കൂടിച്ചേരുന്ന സ്ഥലം എന്നാണ്. 

പീ പീ ടൗൺഷിപ്പ്, ഓഹിയോ (Pee Pee Township, USA) : ഓഹിയോയിലെ പൈക് കൺട്രിയിലെ ഒരു ടൗൺഷിപ്പാണ് പീ പീ ടൗൺഷിപ്പ്. ആ പേര് വന്നിരിക്കുന്നത് പീ പീ ക്രീക്ക് ജലാശയത്തിൽ നിന്നുമാണ്. പൈക് കൺട്രിയിലെ 14 ടൗൺഷിപ്പുകളിൽ ഒന്നാണ് പീ പീ ടൗൺഷിപ്പ്. രണ്ടായിരത്തിലെ സെൻസസ് പ്രകാരം ഇവിടെ ഏഴായിരത്തിലധികം ആളുകൾ താമസിക്കുന്നുണ്ട്. ‌‌‌

നോ നെയിം, കൊളറാഡോ (No Name, USA) : നോ നെയിം എന്നാൽ പേരില്ല എന്നാണ് അല്ലേ? എന്നാൽ നോ നെയിം കൊളറാഡോയിലെ ഒരു സ്ഥലത്തിന്റെ പേരാണ്. 2010 -ലെ യുണൈറ്റഡ് സ്റ്റേറ്റ്സ് സെൻസസ് അനുസരിച്ച് ഇവിടുത്തെ ജനസംഖ്യ 123 ആണ്. നോ നെയിം ക്രീക്ക്, നോ നെയിം കാന്യോൺ എന്നിവയിൽ നിന്നുമാണ് പ്രദേശത്തിന് ഈ പേര് കിട്ടിയിരിക്കുന്നത്. സ്ഥിരമായി വിചിത്രമായ പേരുകളുള്ള സ്ഥലത്തിന്റെ പട്ടികയിൽ ഇ‌ടം പിടിക്കുന്ന സ്ഥലങ്ങളിൽ ഒന്നാണിത്. 

ഡിൽഡോ, കാനഡ (Dildo, Canada​​​​​​​) : കാനഡയിലെ ന്യൂഫൗണ്ട്‍ലാൻഡ് ആൻഡ് ലാബ്രഡോറിലുള്ള സ്ഥലമാണ് ഡിൽഡോ. ഇവിടെ 200 താമസക്കാരാണുള്ളത്. വിചിത്രമായ പേര് കാരണം പലപ്പോഴും ചർച്ച ചെയ്യപ്പെട്ടിട്ടുള്ള സ്ഥലമാണ് ഡിൽഡോ. എങ്ങനെയാണ് ഈ സ്ഥലത്തിന് ഇങ്ങനെ ഒരു പേര് വന്നത് എന്ന കാര്യം ഇപ്പോഴും അജ്ഞാതമാണ്. 

വൈ, അരിസോണ (Why, Arizona​​​​​​​) : അരിസോണയിലെ പൈമ കൺട്രിയിലെ ഒരു സ്ഥലമാണ് വൈ. 2010 -ലെ സെൻസസ് പ്രകാരം 167 പേരാണ് ഇവിടെ താമസിക്കുന്നത്. രണ്ട് പ്രധാന ഹൈവേകളുമായി ബന്ധപ്പെടുത്തിയാണ് ഇതിന് ഈ പേര് വന്നിരിക്കുന്നത്. 

വൈനോ‌ട്ട്, മിസ്സിസ്സിപ്പി (Whynot, Mississippi​​​​​​​) : മിസ്സിസ്സിപ്പിയിലെ ഒരു സ്ഥലമാണ് വൈനോട്ട്. ആദ്യമായി ഇവിടെ തുടങ്ങിയത് ഒരു പോസ്റ്റ് ഓഫീസ് ആണ്. അത് 1852 ജൂൺ 23 -നാണ്. 1852 ഡിസംബർ 30 -നാണ് ഈ സ്ഥലത്തിന് വൈ നോട്ട് എന്ന പേര് വരുന്നത്. 

തീർന്നില്ല, ഇനിയുമുണ്ട് ഇന്റർകോഴ്സ്, ഡിസപോയിൻമെന്റ്, സാന്താ ക്ലോസ് തുടങ്ങി അനേകം വിചിത്രമായ പേരുകളുള്ള സ്ഥലങ്ങൾ.