മാലിന്യത്തിൽ നിന്ന് ഇന്ധനം: ഏഴ് വർഷമായി സിലിണ്ടറുകളോട് 'ബൈ ബൈ' പറഞ്ഞ് ഒരു ഐഐടിക്കാരൻ

ഐഐടി പൂർവ്വ വിദ്യാർത്ഥിയായ പ്രിയദർശൻ സഹസ്രബുദ്ധെ വികസിപ്പിച്ച 'വായു' ബയോഡൈജസ്റ്റർ അടുക്കള മാലിന്യങ്ങളെ പാചകവാതകമാക്കി മാറ്റുന്നു. ഈ സാങ്കേതികവിദ്യ ഉപയോഗിച്ച് കഴിഞ്ഞ ഏഴ് വർഷമായി അദ്ദേഹം എൽപിജി സിലിണ്ടർ വാങ്ങിയിട്ടില്ല. നിലവിൽ 350-ൽ അധികം വീടുകളിലും സ്ഥാപനങ്ങളിലും ഈ സംവിധാനം ഉപയോഗിച്ച് മാലിന്യസംസ്കരണവും ഊർജ്ജോത്പാദനവും സാധ്യമാക്കുന്നു.

പശ്ചിമേഷ്യൻ പ്രതിസന്ധിയെത്തുടർന്ന് പാചകവാതക വിലക്കയറ്റവും സിലിണ്ടറുകൾക്കായുള്ള നീണ്ട ക്യൂവും ജനങ്ങളെ വലയ്ക്കുമ്പോൾ, കഴിഞ്ഞ ഏഴ് വർഷമായി ഒരു എൽ.പി.ജി (LPG) സിലിണ്ടർ പോലും വാങ്ങിയിട്ടില്ല ഐഐടി പൂർവ്വ വിദ്യാർത്ഥിയായ പ്രിയദർശൻ സഹസ്രബുദ്ധെ. പൂനെ സ്വദേശിയായ ഇദ്ദേഹം തന്‍റെ അടുക്കള പ്രവർത്തിപ്പിക്കുന്നത് വീട്ടിലെയും അയൽപക്കത്തെയും 'മാലിന്യങ്ങൾ' ഉപയോഗിച്ചാണ്.

എന്താണ് 'വായു' ബയോഡൈജസ്റ്റർ?

പ്രിയദർശൻ വികസിപ്പിച്ചെടുത്ത 'വായു' (Vaayu) എന്ന ബയോഡൈജസ്റ്ററാണ് ഈ മാറ്റത്തിന് പിന്നിൽ. അടുക്കളയിൽ നിന്നുള്ള പച്ചക്കറി അവശിഷ്ടങ്ങൾ, ബാക്കി വരുന്ന ഭക്ഷണം തുടങ്ങിയ ജൈവമാലിന്യങ്ങൾ ഒരു ടാങ്കിലേക്ക് നിക്ഷേപിക്കുന്നു. ടാങ്കിലെ പ്രകൃതിദത്ത ബാക്ടീരിയകൾ ഇവയെ വിഘടിപ്പിച്ച് മീഥെയ്ൻ വാതകം പുറപ്പെടുവിക്കുന്നു. ഏകദേശം 11 കിലോ മാലിന്യത്തിൽ നിന്ന് 800 ലിറ്റർ പാചകവാതകം ഇതിലൂടെ ഉത്പാദിപ്പിക്കാമെന്ന് പ്രിയദർശൻ പറയുന്നു. ഇങ്ങനെ ലഭിക്കുന്ന ഗ്യാസ് ഒരു ബലൂണിൽ ശേഖരിച്ച് നേരിട്ട് അടുപ്പിലേക്ക് (Stove) എത്തിക്കുകയാണ് ചെയ്യുന്നത്.

വിപുലമായ മാറ്റങ്ങൾ

കഴിഞ്ഞ ഏഴ് വർഷത്തിനിടെ 1,000 ടണ്ണിലധികം ജൈവമാലിന്യമാണ് പ്രിയദർശൻ ഈ രീതിയിൽ ഇന്ധനമാക്കി മാറ്റിയത്. നിലവിൽ 350 -ലധികം വീടുകളിലും വിവിധ ഹോട്ടലുകളിലും കാന്‍റീനുകളിലും ഈ സംവിധാനം പ്രവർത്തിക്കുന്നുണ്ട്. ഇതുവഴി പ്രതിവർഷം ഏകദേശം 2,500 എൽപിജി സിലിണ്ടറുകൾ ലാഭിക്കാൻ സാധിക്കുന്നു. പൂനെയിലെ ഒരു റെസ്റ്റോറന്‍റ് ദിവസേന 60 മുതൽ 100 കിലോ വരെ ഭക്ഷണാവശിഷ്ടങ്ങൾ ഇതിലൂടെ ഇന്ധനമാക്കുന്നു. 2022 മാർച്ച് മുതൽ എൽപിജി സിലിണ്ടറുകളുടെ ഉപയോഗം പൂർണ്ണമായും നിർത്തിയ അംഗദ് പട്‌വർധന്‍റെ കഥയും പ്രിയദർശൻ പങ്കുവെക്കുന്നു. പച്ചക്കറി അവശിഷ്ടങ്ങളും ഭക്ഷണാവശിഷ്ടങ്ങളും ചപ്പുചവറുകളായി കളയുന്നതിന് പകരം അദ്ദേഹം അവ 'വായു' ബയോഗ്യാസ് ഡൈജസ്റ്ററിലേക്ക് ഇടുന്നു. ഇത് പിന്നീട് പാചകവാതകമായി മാറുന്നു.

ഓരോ ഇന്ത്യക്കാരനും പ്രതിവർഷം ശരാശരി 55 കിലോ ഭക്ഷ്യമാലിന്യം ഉത്പാദിപ്പിക്കുന്നുണ്ട്. നമ്മൾ ഓരോരുത്തരും അവരവരുടെ വീടുകളിൽ തന്നെ മാലിന്യസംസ്‌കരണം നടത്തുകയാണെങ്കിൽ, പരിസ്ഥിതിയിൽ വലിയൊരു മാറ്റം കൊണ്ടുവരാൻ നമുക്ക് സാധിക്കുമെന്നാണ് പ്രിയദർശൻ പറയുന്നത്. ഉപയോഗിക്കാൻ എളുപ്പമുള്ളതും പൂർണ്ണമായും പരിസ്ഥിതി സൗഹൃദവുമായ ഈ സാങ്കേതികവിദ്യ, ഭാവിയുടെ ഇന്ധനമായി മാറുമെന്ന പ്രതീക്ഷയിലാണ് പ്രിയദർശനും സംഘവും.