സാങ്കേതികവിദ്യയുടെ വ്യാപകമായ പ്രവേശനക്ഷമത കാരണം, അത്തരം ഫൂട്ടേജുകൾ ആർക്കും സൃഷ്ടിക്കാൻ കഴിയും. സ്റ്റേറ്റ് സ്പോൺസർ ചെയ്‍ത അഭിനേതാക്കൾ, രാഷ്ട്രീയ ഗ്രൂപ്പുകൾ, സാധാരണ ടെക്കികൾ മുതൽ കുട്ടികൾക്ക് വരെ ആർക്കെതിരെയും എന്തും നിർമ്മിക്കാം.
നാളെ നിങ്ങൾ കുടുംബസമേതം ഒരു ചിത്രം കാണാൻ തീയേറ്ററിൽ പോകുന്നു. ചിത്രം തുടങ്ങുമ്പോൾ തന്നെ നിങ്ങൾ ഞെട്ടുന്നു. അതിൽ അഭിനയിക്കുന്നത് നിങ്ങളും നിങ്ങളുടെ വീട്ടുകാരും തന്നെയാണ്. ഇതൊരു മനശാസ്ത്ര പ്രതിഭാസം ആണെന്ന് തോന്നുന്നുണ്ടോ? തെറ്റി. ഇപ്പോൾ നിലവിലുള്ള ഒരു സാങ്കേതികവിദ്യയുടെ ലളിതമായ പ്രയോഗം മാത്രമാണ് അത്.
കഴിഞ്ഞ മാസം ESPN- ന്‍റെ ഹിറ്റ് ഡോക്യുമെന്‍ററി സീരീസായ 'ദ ലാസ്റ്റ് ഡാൻസി'നിടെ, ഒരു ടിവി കൊമേഴ്‌സ്യൽ അരങ്ങേറി, അത് സമീപകാല ഓർമ്മയിലെ ഏറ്റവും കൂടുതൽ ചർച്ച ചെയ്യപ്പെടുന്ന പരസ്യങ്ങളിലൊന്നായി മാറി. 2020 -നെ കുറിച്ച് ഞെട്ടിക്കുന്ന, കൃത്യമായ പ്രവചനങ്ങൾ നടത്തുന്ന ഒരു ഇഎസ്‍പിഎൻ അനലിസ്റ്റിന്‍റെ 1998 -ലെ ഫൂട്ടേജ് ആയിരുന്നു അത്. പിന്നീടാണ് ജനം അറിയുന്നത്, ആ ക്ലിപ്പ് യഥാർത്ഥമല്ല: ആർട്ടിഫിഷ്യൻ ഇന്‍റലിജൻസ് ഉപയോഗിച്ചു നിർമിച്ച ഒരു വീഡിയോ മാത്രമാണ് അതെന്ന്.
ആർട്ടിഫിഷ്യൻ ഇന്‍റലിജൻസ് ഉപയോഗത്തിന്റെ ഏറ്റവും അപകടകരമായ ഒരു പുതിയ പ്രതിഭാസത്തിന്റെ ഉത്തമ ഉദാഹരണമാണ് ഈ സ്റ്റേറ്റ് ഫാം പരസ്യം. ഡീപ്ഫേക്ക് എന്നാണ് ഇതിന് വിളിക്കുന്നത് (-Deep Learning + Fake)
കമ്പ്യൂട്ടറും ഇന്‍റർനെറ്റ് കണക്ഷനുമുള്ള ആർക്കും ആരുടേയും യഥാർത്ഥത്തിൽ പറയാത്തതോ ചെയ്യാത്തതോ ആയ കാര്യങ്ങൾ പറയുന്നതും ചെയ്യുന്നതുമായ റിയലിസ്റ്റിക് രൂപത്തിലുള്ള ഫോട്ടോകളും വീഡിയോകളും സൃഷ്ടിക്കാൻ ഡീപ്ഫേക്ക് സാങ്കേതികവിദ്യ പ്രാപ്‍തമാക്കുന്നു. ലോകമെമ്പാടുമുള്ള ദശലക്ഷക്കണക്കിന് ആളുകൾക്ക് ഈ പുതിയ സാങ്കേതികവിദ്യയുടെ ആദ്യരുചി നൽകിക്കൊണ്ട് നിരവധി ഡീപ്ഫേക്ക് വീഡിയോകൾ അടുത്തിടെ വൈറലായി. പ്രസിഡന്‍റ് ട്രംപിനെ വിവരിക്കാൻ പ്രസിഡന്‍റ് ഒബാമ ഒരു പ്രത്യേക പദപ്രയോഗം ഉപയോഗിച്ചത്, 'ഫേസ്ബുക്കിന്‍റെ യഥാർത്ഥ ലക്ഷ്യം ഉപയോക്താക്കളെ ചൂഷണം ചെയ്യുകയാണ്' എന്ന് മാർക്ക് സുക്കർബർഗ് സമ്മതിക്കുന്ന വീഡിയോ തുടങ്ങിയവ ചെറിയ ഉദാഹരണങ്ങൾ മാത്രം .
ഓൺലൈനിൽ ഡീപ്ഫേക്ക് ഉള്ളടക്കത്തിന്റെ അളവ് അതിവേഗം വളരുകയാണ്. 2019 -ന്‍റെ തുടക്കത്തിൽ 7,964 ഡീപ്ഫേക്ക് വീഡിയോകൾ ഓൺലൈനിൽ ഉണ്ടായിരുന്നു എന്നാണ് റിപ്പോർട്ട്. ഒൻപത് മാസത്തിന് ശേഷം ഈ കണക്ക് 14,678 ആയി ഉയർന്നു. അതിനുശേഷം ഇപ്പോൾ എന്തായിക്കാണും എന്നും ഇനി എന്താകും എന്നും ഊഹിക്കാമല്ലോ.
കണ്ണുകളെ വിശ്വസിക്കരുതേ
ഡീപ്ഫേക്ക് സാങ്കേതികവിദ്യ വ്യാപകമായി പ്രയോഗിച്ച ഏറ്റവും ഫലപ്രദമായ മേഖല ഏതൊരു സാങ്കേതിക വിദ്യയുടെ കാര്യത്തിലും എന്നതുപോലെ അശ്ലീലസാഹിത്യത്തിലാണ്. 2019 സെപ്റ്റംബർ വരെ, ഓൺലൈനിൽ ഇറങ്ങിയ 96 ശതമാനം ഡീപ്ഫേക്ക് വീഡിയോകളും അശ്ലീലമായിരുന്നു. അശ്ലീലസാഹിത്യത്തിനായി ഡീപ്ഫേക്ക് സാങ്കേതിക വിദ്യ ഉപയോഗിക്കുന്ന ഒരുപിടി വെബ്‌സൈറ്റുകൾ പുറത്തുവന്നിട്ടുണ്ട്. കഴിഞ്ഞ രണ്ട് വർഷത്തിനിടയിൽ മാത്രം ഇത് ദശലക്ഷക്കണക്കിന് വ്യൂസ് ആണ് നേടിയത് . പ്രശസ്‍ത സെലിബ്രിറ്റികളെയോ നിങ്ങൾക്ക് നേരിട്ട് അറിയാവുന്നരെയോ ഫീച്ചർ ചെയ്യുന്ന വീഡിയോകളുടെ കൃത്രിമ സമന്വയം അപകടകരമാണ്. അതും വരാനിരിക്കുന്നതേ ഉള്ളൂ.
ഡാർക്ക് വെബ്ബിൽ നിന്ന്, ഡീപ്ഫേക്കുകളുടെ ഉപയോഗം രാഷ്ട്രീയ മേഖലയിലേക്ക് വ്യാപിക്കാൻ തുടങ്ങിയിട്ടുണ്ട്. ഇതിന്റെ അപകടസാധ്യതകൾ വളരെ വലുതാണ് എന്നോർക്കുക.
മുഴുവൻ ജനങ്ങളും യഥാർത്ഥമാണെന്ന് വിശ്വസിക്കുന്ന കെട്ടിച്ചമച്ച വീഡിയോകൾ കാണിക്കാൻ സർക്കാരുകൾക്ക് കഴിയുമെങ്കിൽ സംഭവിച്ചേക്കാവുന്ന ദോഷം മനസിലാക്കാൻ വളരെയധികം ഭാവനയൊന്നും ആവശ്യമില്ല. തെരഞ്ഞെടുപ്പിന് തൊട്ടുമുമ്പ് ജയിക്കുമെന്ന് ഉറപ്പുള്ള ഒരു സ്ഥാനാർഥി കൈക്കൂലി വാങ്ങുന്നതിന്‍റെയോ, അല്ലെങ്കിൽ ലൈംഗികാതിക്രമത്തിൽ ഏർപ്പെടുന്നതിന്‍റെയോ കൃത്യമായ ഒരു ഫൂട്ടേജ് പുറത്തുവരുന്നു എന്ന് സങ്കൽപ്പിക്കുക. എന്തായിരിക്കും പിന്നീട് സംഭവിക്കുക?
ഉത്തരകൊറിയക്കെതിരെ ആണവായുധങ്ങൾ വിക്ഷേപിക്കുമെന്ന് പ്രസിഡന്‍റ് ട്രംപ് പ്രഖ്യാപിച്ചതിന്‍റെയോ, ട്രംപിനെ കൊല്ലുമെന് കിംഗ് യോങ് ഉൻ പറയുന്നതിന്‍റെയോ വീഡിയോകൾ പുറത്തു വന്നാലോ? അത്തരം ക്ലിപ്പുകൾ അനിശ്ചിതത്വങ്ങൾ നിലനിൽക്കുന്ന ഒരു ലോകത്ത്, വിതയ്ക്കുക ദുരന്തമായിരിക്കും.
സാങ്കേതികവിദ്യയുടെ വ്യാപകമായ പ്രവേശനക്ഷമത കാരണം, അത്തരം ഫൂട്ടേജുകൾ ആർക്കും സൃഷ്ടിക്കാൻ കഴിയും. സ്റ്റേറ്റ് സ്പോൺസർ ചെയ്‍ത അഭിനേതാക്കൾ, രാഷ്ട്രീയ ഗ്രൂപ്പുകൾ, സാധാരണ ടെക്കികൾ മുതൽ കുട്ടികൾക്ക് വരെ ആർക്കെതിരെയും എന്തും നിർമ്മിക്കാം.
യുഎസ് സെനറ്റർ മാർക്കോ റൂബിയോ അടുത്തിടെ പറഞ്ഞു. "പണ്ട് ആർക്കെങ്കിലും അമേരിക്കയെ ഭീഷണിപ്പെടുത്താൻ ആഗ്രഹിക്കുന്നുവെങ്കിൽ, അവർക്ക് 10 വിമാനവാഹിനിക്കപ്പലുകളും ആണവായുധങ്ങളും ദീർഘദൂര മിസൈലുകളും ആവശ്യമായിരുന്നു. ഇന്ന് നിങ്ങൾക്ക് വേണ്ടത് നമ്മുടെ തെരഞ്ഞെടുപ്പിനെ ദുർബലപ്പെടുത്തുന്ന, നമ്മുടെ രാജ്യത്തെ ആന്തരികമായി കടുത്ത പ്രതിസന്ധിയിലേക്ക് തള്ളിവിടുകയും ആഴത്തിൽ ദുർബലപ്പെടുത്തുകയും ചെയ്യുന്ന യാഥാർത്ഥമെന്ന് തോന്നുന്ന ഒരു വ്യാജ വീഡിയോ നിർമ്മിക്കാനുള്ള കഴിവു മാത്രമാണ്.”
കഴിഞ്ഞ മാസം ബെൽജിയത്തിലെ ഒരു രാഷ്ട്രീയ സംഘം ബെൽജിയൻ പ്രധാനമന്ത്രിയുടെ ഒരു ഡീപ്ഫേക്ക് വീഡിയോ പുറത്തുവിട്ടു. ഇതിൽ COVID-19 വിസ്ഫോടനം പാരിസ്ഥിതിക നാശവുമായി ബന്ധിപ്പിക്കുകയും കാലാവസ്ഥാ വ്യതിയാനത്തിനെതിരെ കടുത്ത നടപടിയെടുക്കുകയും ചെയ്യണം എന്ന് ഉദ്ബോധിപ്പിക്കുകയും ചെയ്തു. പ്രസംഗം യഥാർത്ഥമാണെന്ന് ഭൂരിപക്ഷം കാഴ്ചക്കാരും വിശ്വസിച്ചു.
ഡീപ്ഫേക്കുകളുടെ സാധ്യതകളെയും അപകടങ്ങളെയും കുറിച്ചുള്ള പൊതു അവബോധം വർദ്ധിപ്പിക്കുക എന്നതാണ് ഇനി നമ്മൾ ചെയ്യേണ്ടത്. വ്യാപകമായ വ്യാജ വാർത്തകൾക്കെതിരെ നിർണായക പ്രതിരോധം സ്വയം തീർക്കുകയുമാണ് വിവരമുള്ള ഒരു പൗരൻ ചെയ്യേണ്ടത്.
ഫോട്ടോഷോപ്പും, വാട്ട്സ്ആപ്പും, ഫേസ്ബുക്കും കൊണ്ട് അത്ഭുതങ്ങൾ സൃഷ്‍ടിച്ച നമ്മുടെ രാജ്യത്ത് ഡീപ്ഫേക്ക് സാങ്കേതികവിദ്യ ഉണ്ടാക്കുവാൻ പോകുന്ന പ്രഭാവം ഊഹിക്കാവുന്നതിനപ്പുറം ആണ്. ജാഗ്രത.