സ്ഥലമുണ്ടോ? ഇഷ്ടം പോലെ പണം വരും; മാസവരുമാനം 22 ലക്ഷം രൂപ വരെ, സുഹൃത്തിന്റെ ബിസിനസിനെ കുറിച്ച് യുവതിയുടെ പോസ്റ്റ്

കയ്യില്‍ കുറേ സ്ഥലമിരുന്നിട്ട് കാര്യമില്ല. നല്ല നല്ല ബിസിനസ് ഐഡിയയും അത് നടപ്പിലാക്കാനുള്ള മനസുമുണ്ടാവണം. വലിയ ചെലവോ കഷ്ടപ്പാടോ ഇല്ലാതെ തന്നെ സ്ഥലമുണ്ടെങ്കില്‍ പണം കൊയ്യാം. സുഹൃത്തിന്‍റെ ബിസിനസിനെ കുറിച്ച് പോസ്റ്റുമായി യുവതി. 

'ചിലർ വെറുതെ സ്ഥലം വാങ്ങിയിടുക മാത്രമല്ല ചെയ്യുക, അവരതിനെ പണം അച്ചടിക്കുന്ന യന്ത്രമാക്കി മാറ്റിക്കളയും' പറയുന്നത് ഉത്തർപ്രദേശിൽ നിന്നുള്ളൊരു കണ്ടന്റ് ക്രിയേറ്ററാണ്. തന്റെ സുഹൃത്തിന്റെ മീററ്റിലുള്ള സ്വിമ്മിംഗ് പൂൾ ബിസിനസ്സിനെക്കുറിച്ചാണ് പൂജ എക്സിൽ (ട്വിറ്റർ) പങ്കുവെച്ച കുറിപ്പിൽ പറയുന്നത്. വേനൽക്കാലത്ത് മാസം 22 ലക്ഷത്തിലധികം രൂപയും, മറ്റ് മാസങ്ങളിൽ 7.5 ലക്ഷം രൂപ വരെയും ഈ ബിസിനസ്സിൽ നിന്ന് സുഹൃത്ത് സമ്പാദിക്കുന്നുണ്ടെന്നാണ് പൂജ അവകാശപ്പെടുന്നത്.

തന്റെ സുഹൃത്തിന്റെ ഫാമിലേക്ക് പോയപ്പോഴാണത്രെ പൂജ ഈ സ്വിമ്മിം​ഗ്പൂൾ കാണുന്നത്. ഇത് വെറുതെ ഒരു ഹോബിയായി തുടങ്ങിയതാണോ, അതോ ഇതിൽ നിന്നും വല്ലതും സമ്പാദിക്കാൻ സാധിക്കുന്നുണ്ടോ എന്ന് പൂജ സുഹൃത്തിനോട് ചോദിക്കുകയും ചെയ്തു. ഓ, കുഴപ്പമില്ലാതെ പോകുന്നു എന്നായിരുന്നു സുഹൃത്തിന്റെ മറുപടി. എന്നാൽ, സുഹൃത്തിനോട് വിശദമായി സംസാരിച്ചപ്പോഴാണ് പൂജ ശരിക്കും ഞെട്ടിയത്. മീററ്റിലെ NH 58 -ൽ സ്ഥിതി ചെയ്യുന്ന ഈ ഫാമിലേക്ക് വേനൽക്കാലത്ത് ദിവസം 700 മുതൽ 800 വരെ ആളുകൾ എത്താറുണ്ട്. ഒരാൾക്ക് 100 രൂപയാണ് ടിക്കറ്റ് നിരക്ക്.

വേനൽക്കാലത്ത് ശരാശരി 750 സന്ദർശകരെ വച്ച് കൂട്ടിയാൽ തന്നെ ദിവസം 75,000 രൂപ കിട്ടും. അങ്ങനെ വരുമ്പോൾ ഒരു മാസം ഏകദേശം 22.5 ലക്ഷം രൂപ ലഭിക്കും എന്നാണ് പൂജ പറയുന്നത്. ഇനി അഥവാ വേനൽക്കാലം കഴിഞ്ഞാലും സാധാരണ ദിവസങ്ങളിൽ പോലും ഇരുന്നൂറ്റിയമ്പതോളം ആളുകൾ ഇവിടെ എത്തുന്നുണ്ട്. അതായത് ദിവസം 25,000 രൂപ നിരക്കിൽ മാസം 7.5 ലക്ഷം രൂപയോളം കിട്ടുമെന്നർത്ഥം. ബിസിനസ്സിന്റെ ചെലവുകളെക്കുറിച്ച് ചോദിച്ചപ്പോൾ സുഹൃത്ത് പറഞ്ഞത്, സ്വന്തം സ്ഥലത്താണ് ഇത് നിർമ്മിച്ചിരിക്കുന്നതെന്നും സുരക്ഷയ്ക്കായി രണ്ട് ഗാർഡുകളെ മാത്രമാണ് നിയമിച്ചിട്ടുള്ളതെന്നുമാണ്. ഇവർക്ക് രണ്ടുപേർക്കുമായി പ്രതിമാസം 20,000 രൂപയാണ് ശമ്പളം നൽകുന്നത്.

Yesterday morning, I was walking towards my friend’s farm, where he has built a swimming pool.

Just for fun, I asked him, 
"Buddy, does this thing actually make any money, or are you just fulfilling a hobby ?"

He smiled and replied, "It’s doing okay, nothing extraordinary."… pic.twitter.com/7LczPCzAaJ

— Pooja (@poojaofficial5) June 10, 2026

അതുകൊണ്ടും തീർന്നില്ല, പൂളിലെ വെള്ളം മാറ്റുമ്പോൾ അത് വെറുതെ കളയുകയല്ല പൂജയുടെ സുഹൃത്ത് ചെയ്യുന്നത്. അത് കൃഷിക്കായി കർഷകർക്ക് വിൽക്കും. അതായത് ഒരേ വെള്ളത്തിൽ നിന്നുതന്നെ രണ്ടുതവണ പൂജയുടെ സുഹൃത്ത് വരുമാനമുണ്ടാക്കുന്നു. ഈ പൂളിൽ നിന്നുള്ള വരുമാനം കൊണ്ട് സുഹൃത്ത് നിരവധി വാഹനങ്ങൾ വാങ്ങിക്കൂട്ടിയതായും പൂജ പറയുന്നു. നിരവധിപ്പേരാണ് പോസ്റ്റിന് കമന്റുകൾ നൽകിയത്. സ്വിമ്മിം​ഗ് പൂൾ ഒരു മികച്ച ബിസിനസ് ഐഡിയ ആണെന്നും പൂജയുടെ സുഹൃത്ത് ആള് സ്മാർട്ടാണ് എന്നുമാണ് പലരുടേയും അഭിപ്രായം.