മഞ്ചിനല്‍; അടുക്കുന്തോറും അതീവ അപകടകാരിയായി തീരുന്ന മരം !

 ഉഷ്ണമേഖലാ കാലാവസ്ഥയിൽ വളരുന്ന ഈ മരം ഫ്ലോറിഡ മുതൽ കരീബിയൻ വരെയും മധ്യ, തെക്കേ അമേരിക്കയുടെ ചില ഭാഗങ്ങളിലുമാണ് പ്രധാനമായും കാണപ്പെടുന്നത്. 

മരം ഒരു വരമെന്നാണ് കുട്ടിക്കാലം മുതൽ നാമ്മളൊക്കെ പഠിച്ചത്, എന്നാൽ, അടുക്കുംതോറും അപകടകാരിയായ മാറുന്ന ഒരു മരമുണ്ട്. ലോകത്തിലെ തന്നെ ഏറ്റവും അപകടകാരിയായ വൃക്ഷമെന്നാണ് ഈ മരം അറിയപ്പെടുന്നത്. ഈ മരത്തിന്‍റെ പേര് മഞ്ചിനീൽ മരം (Manchineel tree). ഉഷ്ണമേഖലാ കാലാവസ്ഥയിൽ വളരുന്ന ഈ മരം ഫ്ലോറിഡ മുതൽ കരീബിയൻ വരെയും മധ്യ, തെക്കേ അമേരിക്കയുടെ ചില ഭാഗങ്ങളിലുമാണ് പ്രധാനമായും കാണപ്പെടുന്നത്. 

ഈ വൃക്ഷത്തിൽ ഉണ്ടാകുന്ന കാഴ്ചയില്‍  ചെറിയ ആപ്പിൾ പോലെയുള്ള പഴങ്ങൾ വിഷം നിറഞ്ഞവയാണ്. അതുകൊണ്ടുതന്നെ ഈ പഴങ്ങൾ അറിയപ്പെടുന്നത് മൻസാനില്ല ഡി ലാ മ്യൂർട്ടെ (manzanilla de la muerte) അഥവാ 'മരണത്തിന്‍റെ ചെറിയ ആപ്പിൾ' (little apple of death) എന്നാണ്.  ചരിത്രത്തിൽ മനുഷ്യര്‍ തമ്മിലുള്ള നിരവധി കലാപങ്ങള്‍ ഈ മരവും ഇതിന്‍റെ പഴവും വലിയ പങ്കു വഹിച്ചിട്ടുണ്ട്. കാരണം ശത്രുക്കളെ എയ്തു വീഴ്ത്തുന്നതിനായി അമ്പുകളിൽ വിഷം തേക്കാൻ ഉപയോഗിച്ചിരുന്നത് ഈ പഴങ്ങളില്‍ നിന്നുള്ള നീരായിരുന്നു. തീർന്നില്ല, എതിരാളികളെ തോൽപ്പിക്കാൻ അവരുടെ ജലസംഭരണികളിൽ മഞ്ചിനീൽ മരത്തിന്‍റെ നീര് കലർത്തുന്നതും പതിവായിരുന്നു എന്നാണ് പറയപ്പെടുന്നത്.

മരവും ഇതിന്‍റെ ഫലവും അപകടകരമാണെന്ന് പറയപ്പെടുന്നുണ്ടെങ്കിലും ഈ പഴം കഴിച്ച് ആരും ഇതുവരെയും മരിച്ചതായി റിപ്പോർട്ട് ചെയ്യപ്പെട്ടിട്ടില്ല. പഴത്തിന്‍റെ രുചി മധുരമുള്ളതാണെങ്കിലും ഇത് കഴിച്ചിറക്കാൻ അസാധ്യ ബുദ്ധിമുട്ടാണെന്നാണ് പറയുന്നത്. കാരണം ഇത് തൊണ്ടയിൽ മുറിവുകൾ ഉണ്ടാക്കുകയും വായിൽ കുമിളകൾ രൂപപ്പെടുത്തുകയും ചെയ്യും. മാത്രമല്ല ഗുരുതരമായ ദഹന പ്രശ്നങ്ങൾക്കും ഈ പഴം കാരണമാകും. തീർന്നില്ല മഴക്കാലത്ത് ഈ മരത്തിന്‍റെ കീഴിൽ നിൽക്കുകയോ ഇലകളിൽ സ്പർശിക്കുകയോ ചെയ്താൽ അത് ശരീരം മുഴുവൻ കുമിളകൾ രൂപപ്പെടുന്നതിന് കാരണമാകും. മാത്രമല്ല മരത്തിന്‍റെ സ്രവം അല്ലെങ്കിൽ മരം കത്തിച്ചാൽ ഉണ്ടാകുന്ന പുക എന്നിവ താൽക്കാലിക അന്ധത ഉണ്ടാക്കുന്നതിനും കാരണമാകും.