സാഹസികർക്കും കുടുംബങ്ങൾക്കും ഒരുപോലെ പ്രിയപ്പെട്ട ഒരിടം; കൊല്ലത്തിന്റെ സ്വത്ത്, തെന്മലയുടെ മടിത്തട്ടിലേക്ക് സ്വാഗതം!

 കൾച്ചറൽ, അഡ്വഞ്ചർ, ലഷർ സോണുകളായി തിരിച്ചിരിക്കുന്ന ഇവിടെ ബോട്ടിംഗ്, മ്യൂസിക്കൽ ഫൗണ്ടൻ, ശില്പോദ്യാനം, സാഹസിക വിനോദങ്ങൾ തുടങ്ങി എല്ലാതരം സഞ്ചാരികൾക്കും ആസ്വദിക്കാനുള്ള കാഴ്ചകളുണ്ട്.

കൊല്ലം ജില്ലയിൽ സ്ഥിതി ചെയ്യുന്ന അതിമനോഹരമായ ഒരു വിനോദസഞ്ചാര കേന്ദ്രമാണ് തെന്മല. ഇന്ത്യയിലെ ആദ്യത്തെ ആസൂത്രിത ഇക്കോ ടൂറിസം പദ്ധതി എന്ന ഖ്യാതി തെന്മലയ്ക്കാണ്. പ്രകൃതിയെ നോവിക്കാതെ വിനോദസഞ്ചാരം എങ്ങനെ സാധ്യമാക്കാം എന്നതിന്റെ ഉത്തമ ഉദാഹരണമാണ് ഇവിടം.

പേരിന് പിന്നിലെ കൗതുകം

'തേൻ' എന്നും 'മല' എന്നും ചേർന്നാണ് തെന്മല എന്ന പേരുണ്ടായതെന്ന് പറയപ്പെടുന്നു. ഇവിടുത്തെ വനങ്ങളിൽ നിന്നും ലഭിക്കുന്ന തേനിന് ഏറെ ഔഷധഗുണമുണ്ടെന്നാണ് പറയപ്പെടുന്നത്. ഇതിൽ നിന്നാണ് ഈ പ്രദേശത്തിന് തെന്മല എന്ന പേര് ലഭിച്ചത്.

പ്രധാന ആകർഷണങ്ങൾ

തെന്മലയെ മൂന്ന് പ്രധാന മേഖലകളായി തിരിച്ചിരിക്കുന്നു.

1. കൾച്ചറൽ സോൺ

കേരളീയ സംസ്കാരവും പ്രകൃതിയും ഒത്തുചേരുന്ന ഇടം.

മ്യൂസിക്കൽ ഫൗണ്ടൻ: രാത്രിയിൽ വർണ്ണവെളിച്ചത്തിനൊപ്പം സംഗീതത്തിനനുസരിച്ച് നൃത്തം ചെയ്യുന്ന ജലധാര ഇവിടുത്തെ പ്രധാന ആകർഷണങ്ങളിൽ ഒന്നാണ്.

നക്ഷത്രവനം: 27 നക്ഷത്രങ്ങളുമായി ബന്ധപ്പെട്ട മരങ്ങൾ നട്ടുപിടിപ്പിച്ചിരിക്കുന്ന ഒരു വനമാണിത്. ജ്യോതിഷത്തിൽ താൽപ്പര്യമുള്ളവർക്കും പ്രകൃതി സ്നേഹികൾക്കും ഇവിടം സന്ദർശിക്കാം.

ഭക്ഷണശാലകൾ: കേരളീയ വിഭവങ്ങൾ ആസ്വദിക്കാൻ പറ്റിയ റസ്റ്റോറന്റുകൾ തെന്മലയിലുണ്ട്.

2. അഡ്വഞ്ചർ സോൺ

സാഹസികത ഇഷ്ടപ്പെടുന്നവർക്ക് ധൈര്യമായി സന്ദർശിക്കാവുന്ന ഇടമാണിത്.

എലവേറ്റഡ് വോക്ക്‌വേ: വനത്തിന്റെ മനോഹാരിത അടുത്തറിഞ്ഞ്, മരങ്ങളുടെ മുകളിലൂടെയുള്ള പാതയിലൂടെയുള്ള നടത്തം.

മൗണ്ടൻ ബൈക്കിംഗ്, റോക്ക് ക്ലൈംബിംഗ്: അഡ്വഞ്ചർ പ്രേമികൾക്ക് വേണ്ടി ഇവിടെ പ്രത്യേക സൗകര്യങ്ങൾ ഒരുക്കിയിട്ടുണ്ട്.

റിവർ ക്രോസിംഗ്: കയറുകളുടെ സഹായത്തോടെ പുഴ കടക്കുന്ന സാഹസിക വിനോദവും തെന്മലയിലെ പ്രധാന ആകർഷണമാണ്.

3. ലഷർ സോൺ 

കുടുംബത്തോടൊപ്പം ശാന്തമായി സമയം ചെലവഴിക്കാൻ ആഗ്രഹിക്കുന്നവർക്കായി ഒരുക്കിയിട്ടുള്ള മേഖലയാണ് ലഷർ സോൺ.

ബോട്ടിംഗ്: തെന്മല ഡാമിലെ ബോട്ടിംഗ് വളരെ പ്രശസ്തവും ഒരിക്കലെങ്കിലും ആസ്വദിക്കേണ്ടതുമാണ്. വനത്തിലൂടെയുള്ള ബോട്ട് യാത്രയിൽ വന്യമൃഗങ്ങളെ കാണാൻ സാധ്യത കൂടുതലാണ്.

ശില്പോദ്യാനം: പ്രകൃതിയുമായി ഇണങ്ങിനിൽക്കുന്ന മനോഹരമായ ശില്പങ്ങൾ സജ്ജീകരിച്ചിരിക്കുന്ന ഇടമാണിത്.

മറ്റ് പ്രധാന കാഴ്ചകൾ

മാൻ പുനരധിവാസ കേന്ദ്രം (Deer Rehabilitation Centre): വനത്തിൽ പരിക്കേൽക്കുന്ന മാനുകളെയും മറ്റും സംരക്ഷിക്കുന്ന ഇടവും ഇവിടെ ഒരുക്കിയിട്ടുണ്ട്. ഇവിടെ എത്തുന്ന സന്ദർശകർക്ക് മാനുകളെ അടുത്തു കാണാൻ ഇവിടെ സാധിക്കും.

പാലരുവി വെള്ളച്ചാട്ടം: തെന്മലയിൽ നിന്ന് ഏകദേശം 13 കിലോമീറ്റർ അകലെ സ്ഥിതി ചെയ്യുന്ന അതിമനോഹരമായ വെള്ളച്ചാട്ടമാണ് പാലരുവി. പാലുപോലെ നുരഞ്ഞൊഴുകുന്ന വെള്ളച്ചാട്ടത്തിന്റെ കാഴ്ച സഞ്ചാരികളുടെ മനംനിറയ്ക്കും.

ശെന്തുരുണി വന്യജീവി സങ്കേതം: പരിസ്ഥിതി പഠനത്തിനും ട്രെക്കിംഗിനും താൽപ്പര്യമുള്ളവർക്ക് ശെന്തുരുണി വന്യജീവി സങ്കേതം സന്ദർശിക്കാം.

സന്ദർശിക്കാൻ അനുയോജ്യമായ സമയം

സെപ്റ്റംബർ മുതൽ മാർച്ച് വരെയുള്ള മാസങ്ങളാണ് തെന്മല സന്ദർശിക്കാൻ ഏറ്റവും അനുയോജ്യമായ സമയം. മഴക്കാലത്ത് വെള്ളച്ചാട്ടങ്ങളും വനവും കൂടുതൽ പച്ചപ്പോടെയും ഭംഗിയോടെയും കാണപ്പെടും.

എങ്ങനെ എത്തിച്ചേരാം?

അടുത്തുള്ള റെയിൽവേ സ്റ്റേഷൻ: പുനലൂർ (20 കി.മീ), കൊല്ലം (66 കി.മീ).

അടുത്തുള്ള വിമാനത്താവളം: തിരുവനന്തപുരം അന്താരാഷ്ട്ര വിമാനത്താവളം (72 കി.മീ).

റോഡ് മാർഗ്ഗം: തിരുവനന്തപുരം - ചെങ്കോട്ട റോഡിലാണ് തെന്മല സ്ഥിതി ചെയ്യുന്നത്. ഇവിടേയ്ക്ക് കെ.എസ്.ആർ.ടി.സി ബസുകളും സ്വകാര്യ വാഹനങ്ങളും ലഭ്യമാണ്.

പ്രത്യേക ശ്രദ്ധയ്ക്ക്: തെന്മല ഒരു ഇക്കോ ടൂറിസം കേന്ദ്രമായതിനാൽ പ്ലാസ്റ്റിക് മാലിന്യങ്ങൾ വലിച്ചെറിയാതിരിക്കാനും വനത്തിലെ നിയമങ്ങൾ പാലിക്കാനും സഞ്ചാരികൾ ശ്രദ്ധിക്കണം.