ആദ്യമായി ട്രെക്കിംഗിന് തയ്യാറെടുക്കുകയാണോ? പേടിയില്ലാതെ പോകാൻ ഇതാ 5 കിടിലൻ റൂട്ടുകൾ

ആദ്യമായി ട്രെക്കിംഗിന് പോകുന്നവർക്ക് പറ്റിയ ചില അടിപൊളി സ്ഥലങ്ങൾ നമ്മുടെ രാജ്യത്തുണ്ട്. ചെറിയ ബാഗും നല്ല ഷൂസും ഒരു ഗൈഡുമുണ്ടെങ്കിൽ യാത്ര സേഫും കളറുമാക്കാം.

മലകൾ നിങ്ങളെ മാടിവിളിക്കുന്നുണ്ടോ? പക്ഷേ ആദ്യമായി ട്രെക്കിംഗിന് പോകുന്നതിനെക്കുറിച്ച് ഓർത്ത് പേടിയുണ്ടോ? തുടക്കത്തിലേ കടുപ്പമുള്ള റൂട്ടുകൾ തിരഞ്ഞെടുത്താൽ ചിലപ്പോൾ പണി കിട്ടും, യാത്രയുടെ മൊത്തം രസം പോകും. അതുകൊണ്ട്, തുടക്കക്കാർക്ക് ആത്മവിശ്വാസം കൂട്ടാനും പ്രകൃതിയെ ശരിക്കും ആസ്വദിക്കാനും പറ്റിയ, അധികം ബുദ്ധിമുട്ടില്ലാത്ത ചില അടിപൊളി ട്രെക്കിംഗി റൂട്ടുകൾ പരിചയപ്പെടാം. 

സന്ദക്ഫു, നോർത്ത് ബംഗാൾ

തുടക്കക്കാർക്ക് പറ്റിയ ഏറ്റവും മികച്ച ഒരിടം. 11,930 അടി ഉയരത്തിലുള്ള ഇവിടെ നിന്ന് 'സ്ലീപ്പിംഗ് ബുദ്ധ' എന്നറിയപ്പെടുന്ന കാഞ്ചൻജംഗ, എവറസ്റ്റ്, ലോത്സെ, മക്കാലു കൊടുമുടികളുടെ ഗംഭീരമായ കാഴ്ച കാണാം. 32 കിലോമീറ്റർ ദൂരമുള്ള ഈ ട്രെക്കിംഗ് പൂർത്തിയാക്കാൻ 4-5 ദിവസം വേണം. പോകുന്ന വഴിയിൽ കോടമഞ്ഞും വസന്തകാലത്ത് പൂത്തുനിൽക്കുന്ന റോഡോഡെൻഡ്രോൺ മരങ്ങളും യാത്ര കൂടുതൽ മനോഹരമാക്കും. താമസിക്കാൻ ട്രെക്കേഴ്സ് ഹട്ടുകളും ചൂടൻ ഭക്ഷണവും വഴിയിൽ കിട്ടും. 

നാഗ് ടിബ്ബ, ഉത്തരാഖണ്ഡ് 

ദില്ലിയിൽ നിന്ന് ഏകദേശം 300 കിലോമീറ്റർ ദൂരമേയുള്ളൂ. വെറും രണ്ട് ദിവസം കൊണ്ട് പോയി വരാവുന്ന ഒരു ട്രെക്കാണിത്. 9,915 അടി ഉയരത്തിൽ നിന്ന് മഞ്ഞുമൂടിയ ഹിമാലയത്തിൻ്റെ 360 ഡിഗ്രി കാഴ്ചയാണ് ഇവിടുത്തെ ഹൈലൈറ്റ്. ഓക്ക്, റോഡോഡെൻഡ്രോൺ മരങ്ങൾ നിറഞ്ഞ കാട്ടിലൂടെ ചെറിയ ഗ്രാമങ്ങൾ കണ്ടാണ് യാത്ര. ശൈത്യകാലത്ത് ഇവിടെ ചെറുതായി മഞ്ഞുവീഴാറുണ്ട്, ഇത് യാത്രയുടെ ഭംഗി കൂട്ടും. 

ത്രിയുണ്ഡ്, ഹിമാചൽ 

ധർമ്മശാലയിൽ നിന്ന് വെറും 9 കിലോമീറ്റർ മാത്രം. 9,350 അടി ഉയരത്തിൽ ധൗലാധർ മലനിരകളുടെ മടിത്തട്ടിലാണ് ഈ സ്ഥലം. ഒരു ദിവസം കൊണ്ട് കയറി, രാത്രി ടെൻ്റിൽ താമസിച്ച് പിറ്റേന്ന് തിരിച്ചിറങ്ങാം. രാത്രിയിൽ ആകാശം നിറയെ നക്ഷത്രങ്ങളെ കാണുന്നതും പുലർച്ചെ സൂര്യോദയം കാണുന്നതും ജീവിതത്തിൽ മറക്കാനാവാത്ത അനുഭവമായിരിക്കും. 

രാജ്മാച്ചി ഫോർട്ട്, മഹാരാഷ്ട്ര 

മുംബൈയ്ക്കും പൂനെയ്ക്കും ഇടയിലുള്ള 5-6 മണിക്കൂർ മാത്രം ദൈർഘ്യമുള്ള ഒരു ചെറിയ ട്രെക്ക്. 2,710 അടി ഉയരത്തിലാണ് ഈ കോട്ട. മഴക്കാലത്ത് ഇവിടം പച്ചപ്പുകൊണ്ട് നിറയും, വഴിയിൽ ചെറിയ വെള്ളച്ചാട്ടങ്ങളും കാണാം. അധികം ബുദ്ധിമുട്ടില്ലാത്ത വഴിയായതുകൊണ്ട് തിരക്കും കുറവാണ്. 

കുദ്രെമുഖ്, കർണാടക 

കോടമഞ്ഞും തേയിലത്തോട്ടങ്ങളുമാണ് ഇവിടുത്തെ പ്രധാന ആകർഷണം. 6,207 അടി ഉയരത്തിലുള്ള ഈ റൂട്ടിൽ ഇടതൂർന്ന കാടുകളും പുഴകളും മുറിച്ചുകടന്നുവേണം പോകാൻ. വഴി അല്പം കഠിനമാണെന്ന് തോന്നാമെങ്കിലും കാഴ്ചകൾ ഗംഭീരമാണ്. ആദ്യമായി ട്രെക്കിംഗിന് പോകുമ്പോൾ ഭാരം കുറഞ്ഞ ഒരു ബാഗ്, നല്ല ട്രെക്കിംഗ് ഷൂ, വെള്ളക്കുപ്പി, ഫസ്റ്റ് എയ്ഡ് ബോക്സ് എന്നിവ കരുതാൻ മറക്കരുത്. തനിച്ച് പോകാതെ ഒരു ഗൈഡിന്റെ സഹായത്തോടെയോ സംഘമായിട്ടോ പോകുന്നത് നല്ലതാണ്. പോകുന്നതിന് മുൻപ് കാലാവസ്ഥാ പ്രവചനം ശ്രദ്ധിക്കുക. ട്രെക്കിംഗ് എന്നത് മലകയറ്റം മാത്രമല്ല, സ്വയം കണ്ടെത്താനുള്ള ഒരു യാത്ര കൂടിയാണ്. ചെറിയ റൂട്ടുകളിൽ തുടങ്ങി പതിയെ വലിയ ലക്ഷ്യങ്ങളിലേക്ക് മുന്നേറാം.