പിള്ളേര് കൂട്ടത്തോടെ ഇറങ്ങി, വൈറൽ വ്യൂ പോയിന്റിൽ വിലക്കുമായി വനം വകുപ്പ്; വിസ്മയ കാഴ്ച കാണാൻ എത്തേണ്ട
Synopsis
സാമൂഹിക മാധ്യമങ്ങളിൽ വൈറലായ ഇടുക്കി ഡാം വ്യൂ പോയിന്റിലേക്ക് വനം വകുപ്പ് പ്രവേശനം വിലക്കി. സുരക്ഷാ ക്രമീകരണങ്ങളുടെ അഭാവം കണക്കിലെടുത്താണ് നടപടി.
ഇടുക്കി: സാമൂഹിക മാധ്യമങ്ങളിൽ വൈറലായ ഇടുക്കി ഡാം വ്യൂ പോയിന്റിലേക്ക് സഞ്ചാരികൾക്ക് വിലക്ക്. വനം വകുപ്പാണ് നിരോധനം ഏർപ്പെടുത്തിയത്. വനമേഖലയിലൂടെ പ്രവേശിക്കാതിരിക്കാൻ വഴി അടച്ചു. സുരക്ഷാ ക്രമീകരണങ്ങൾ ഇല്ലാത്ത സ്ഥലത്ത് സഞ്ചാരികൾ അപകടത്തിൽ പെടാനുള്ള സാഹചര്യം കണക്കിലെടുത്താണ് വിലക്ക്.
പൈനാവിലെ മന്ത്രപ്പാറയിൽ നിന്നുള്ള ഇടുക്കി ഡാമിന്റെ ദൃശ്യങ്ങൾ കഴിഞ്ഞ ദിവസങ്ങളിലാണ് സമൂഹമാധ്യമങ്ങളിൽ തരംഗമായത്. ചെറുതോണി ഡാം, ആർച്ച് ഡാം, ഇടുക്കി മെഡിക്കൽ എന്നിവ ഒറ്റ ഫ്രെയിമിൽ കാണാൻ കഴിയുന്ന സ്ഥലം എന്നതായിരുന്നു പ്രത്യേകത. മഴക്കാലം വന്നെത്തിയതോടെ പലരും മൺസൂൺ യാത്രകൾ പ്ലാൻ ചെയ്യുന്ന തിരക്കിലാണ്. അത്തരത്തിൽ മഴക്കാലത്ത് കേരളത്തിൽ കണ്ടിരിക്കേണ്ട നിരവധി സ്ഥലങ്ങളുണ്ട്. കേരളത്തിൽ മൺസൂൺ യാത്രകൾ നടത്താൻ അനുയോജ്യമായ നിരവധി ഡെസ്റ്റിനേഷനുകളുണ്ട്.
മഴക്കാലത്ത് കണ്ടിരിക്കേണ്ട കേരളത്തിലെ ഏറ്റവും മനോഹരമായ സ്ഥലങ്ങളിലൊന്നാണ് മൂന്നാർ. പച്ച പുതച്ച തേയിലത്തോട്ടങ്ങൾ, മൂടൽമഞ്ഞ് നിറഞ്ഞ മലനിരകൾ, പതഞ്ഞൊഴുകുന്ന വെള്ളച്ചാട്ടങ്ങൾ എന്നിവ മഴക്കാലമെത്തുന്നതോടെ സജീവമാകുന്നു. പശ്ചിമഘട്ടത്തിന്റെ മനോഹരമായ കാഴ്ചകൾ കണ്ട് മൂന്നാറിലെ വളഞ്ഞുപുളഞ്ഞ റോഡുകളിലൂടെയുള്ള യാത്ര മറക്കാനാകാത്ത അനുഭവങ്ങൾ സമ്മാനിക്കുമെന്ന് ഉറപ്പാണ്. മാട്ടുപ്പെട്ടി ഡാമും ഇരവികുളം നാഷണൽ പാർക്കുമെല്ലാം മഴക്കാലത്ത് സജീവമാകും.
തേക്കടി വന്യജീവി സങ്കേതവും സ്പൈസ് ഗാർഡനുമെല്ലാം മഴക്കാലമെത്തുന്നതോടെ സജീവമാകും. ട്രെക്കിംഗിനും പ്രകൃതി നടത്തത്തിനും പേരുകേട്ടതാണ് പെരിയാർ വന്യജീവി സങ്കേതം. മൂടൽമഞ്ഞ് നിറഞ്ഞ കുന്നുകളും ഇടതൂർന്ന വനങ്ങളും കൊണ്ട് ചുറ്റപ്പെട്ട പെരിയാർ തടാകത്തിൽ നിങ്ങൾക്ക് ബോട്ട് സവാരി ആസ്വദിക്കാനും കഴിയും. മൺസൂൺ ടൂറിസത്തിന്റെ യഥാർത്ഥ ഫീൽ ലഭിക്കണമെങ്കിൽ തേക്കടിയിലെത്തണം. മഴക്കാലത്ത് വന്യജീവികളെ നേരിൽ കാണാനും സാധിക്കുമെന്നതാണ് മറ്റൊരു സവിശേഷത. പ്രകൃതി സ്നേഹികൾക്ക് ഏറെ അനുയോജ്യമായ ഇടമാണ് തേക്കടി.
’ഇന്ത്യയുടെ നയാഗ്ര’ എന്നറിയപ്പെടുന്ന അതിരപ്പിള്ളി വെള്ളച്ചാട്ടം മഴക്കാലത്ത് അവിസ്മരണീയമായ കാഴ്ചകളാണ് സഞ്ചാരികൾക്ക് സമ്മാനിക്കുക. കനത്ത മഴയിൽ അതിരപ്പിള്ളി വെള്ളച്ചാട്ടം നിറഞ്ഞൊഴും. പ്രകൃതി സ്നേഹികൾക്കും ഫോട്ടോഗ്രാഫർമാർക്കും പ്രിയപ്പെട്ട സ്പോട്ടാണ് അതിരപ്പിള്ളി. അതിരപ്പിള്ളി യാത്രയിൽ അതിരപ്പിള്ളിയിൽ നിന്ന് ഏകദേശം 5 കി.മീ അകലെ സ്ഥിതി ചെയ്യുന്ന വാഴച്ചാൽ വെള്ളച്ചാട്ടവും സന്ദർശിക്കാം.