മല്ലിയില

അടുക്കളയിലെ ആവശ്യത്തിനുള്ള മല്ലിയില നമ്മുടെ അടുക്കളയിൽ തന്നെ വളർത്തിയെടുത്താലോ? എന്തൊക്കെ കാര്യങ്ങൾ ശ്രദ്ധിക്കണം?

കറികളിൽ ഉപയോഗിക്കുന്ന മുഴുവൻ മല്ലി വിത്ത് രണ്ടായി പിളർത്തിയെടുക്കുക (വിത്ത് പൊടിഞ്ഞു പോകാതെ ശ്രദ്ധിക്കണം).

രണ്ടായി പിളർത്തിയെടുത്ത വിത്തുകൾ 12 മുതൽ 24 മണിക്കൂർ വരെ വെള്ളത്തിൽ കുതിർത്തു വെക്കുക. ഇത് വിത്തുകൾ വേഗത്തിൽ മുളയ്ക്കാൻ സഹായിക്കും.

ഒരു ചെടിച്ചട്ടിയോ, പ്ലാസ്റ്റിക് ഡപ്പികളോ, അല്ലെങ്കിൽ ഒഴിഞ്ഞ പാലിന്റെ കവറുകളോ അടിയിൽ വെള്ളം വാർന്നു പോകാൻ സുഷിരങ്ങളിട്ട് എടുക്കുക.

ചാണകപ്പൊടി /കമ്പോസ്റ്റ്, ചകിരിച്ചോറ്, മണ്ണ് എന്നിവ തുല്യഅളവിൽ കലർത്തിയെടുക്കുക. മണ്ണ് അയവുള്ളതായിരിക്കണം. തയ്യാറാക്കിവെച്ച മണ്ണിലേക്ക് കുതിർത്ത മല്ലിവിത്തുകൾ വിതറിക്കൊടുക്കുക.

അതിനു മുകളിലായി വളരെ നേർത്ത രീതിയിൽ (ഏകദേശം ഒരു അര സെന്റീമീറ്റർ കനത്തിൽ) മണ്ണ് അല്ലെങ്കിൽ ചകിരിച്ചോറ് തൂവി വിത്തുകൾ മൂടുക.

ഒരു സ്പ്രേയർ ഉപയോഗിച്ചോ കൈകൊണ്ട് തളിച്ചോ പതുക്കെ നനച്ചു കൊടുക്കുക. നേരിട്ട് വെള്ളം ഒഴിച്ച് കൊടുത്താൽ വിത്തുകൾ ആഴത്തിൽ പോവുകയോ ഒലിച്ചു പോവുകയോ ചെയ്യും.

മല്ലി മുളയ്ക്കാൻ മിതമായ സൂര്യപ്രകാശം ആവശ്യമാണ്. അടുക്കളയിലെ ജനൽപ്പിടിയിലോ നന്നായി വെളിച്ചം കിട്ടുന്ന ബാല്ക്കണിയിലോ ഇത് എടുത്തു വെക്കാം. 

മണ്ണിൽ എപ്പോഴും നേരിയ ഈർപ്പം ഉണ്ടായിരിക്കണം. എന്നാൽ വെള്ളം കെട്ടിക്കിടക്കാൻ അനുവദിക്കരുത്

സാധാരണയായി 7 മുതൽ 10 ദിവസത്തിനകം മല്ലിവിത്തുകൾ മുളച്ചു വരും. 30 മുതൽ 45 ദിവസത്തിനുള്ളിൽ നിങ്ങൾക്ക് പുതിയ സുഗന്ധമുള്ള മല്ലിയില അടുക്കളയിൽ നിന്ന് തന്നെ നുള്ളിയെടുക്കാൻ പാകമാകും.

ചെടിയുടെ മുകളിൽ നിന്നുള്ള ഇലകൾ മാത്രം നുള്ളിയെടുത്താൽ താഴെ നിന്ന് വീണ്ടും പുതിയ ഇലകൾ വളർന്നു വന്നുകൊള്ളും.